ايماقتار • 13 شىلدە، 2020

م.ايتەنوۆ: "قالادا ەپيدەميولوگيالىق جاعداي قالىپقا تۇسە باستادى"

62 رەت كورسەتىلدى

شىمكەنت قالاسى اكىمدىگىندە قالاداعى ەپيدەميولوگيالىق جاعدايعا بايلانىستى قۇرىلعان جەدەل شتابتىڭ كەزەكتى وتىرىسى ءوتتى. ءماجىلىس بارىسىندا شتاب مۇشەلەرى قالا باسشىسى مۇرات ايتەنوۆكە ءوز باعىتىندا اتقارىپ جاتقان جۇمىستارىن باياندادى، دەپ حابارلايدى Egemen.kz.

ەڭ الدىمەن، شىمكەنت قالالىق دەنساۋلىق ساقتاۋ باسقارماسىنىڭ باسشىسى رۋستام الباەۆ جانە جەدەل مەديتسينالىق جاردەم كورسەتۋ ستانتسياسى باس دارىگەرىنىڭ ورىنباسارى شولپان وسپانوۆا بايانداما جاسادى. رۋستام قۋانىشبەك ۇلى ىندەتكە بايلانىستى تىركەلگەن ستاتيستيكالار مەن جۇرگىزىلىپ جاتقان ەم جونىندە ءسوز قوزعاسا، ش.وسپانوۆا جەدەل جاردەم قىزمەتى بويىنشا احۋال قالىپقا تۇسكەنىن جانە وزەكتى ماسەلە جوق ەكەنىن جەتكىزدى. وسى رەتتە مۇرات دۇيسەنبەك ۇلى ءتيىستى ماماندارعا ءبىر كۇندە 30 مىڭ شاقىرتۋ قابىلداي الاتىن ديسپەتچەرلىك ورتالىقتىڭ اشىلۋىن تەزدەتۋدى تاپسىردى. سونداي-اق شتاب وتىرىسىندا بۇگىندە 323 يۆل (وكپەنى مەحانيكالىق جەلدەتۋ اپپاراتى) اپپاراتى الداعى ۋاقىتتا 475-كە جەتكىزۋ جوسپارلانىپ جاتقانى بەلگىلى بولدى. سونىمەن قاتار قالا اۋماعىندا بارلىق 24 اۋرۋحانالاردا ءبىر كۇندە 1200 كيسلورودتى باللون قاجەتتىلىگى ايتىلدى. وسىعان وراي قازىرگى تاڭدا شىمكەنت قالاسىندا كيسلورود وندىرەتىن 5 مەكەمەمەن كەلىسىمشارتقا تۇرىپ، كيسلورودتى باللوندار بارلىق اۋرۋحانالارعا تۇراقتى تۇردە جەتكىزىلۋدە ەكەن.

ءوز كەزەگىندە قالا اكىمى ەپيدەميولوگيالىق احۋالدى جاقسارتۋ بارىسىندا حالىققا قاجەتتى دۇنيەلەردى ىسكە اسىرۋ بارىسىن تەزدەتۋ كەرەكتىگىن قاداپ ايتتى.

– ەكى كۇندەپ شەشىم شىعاراتىن ۋاقىت جوق. جۇمىستى شۇعىل تۇردە ناقتى ءبىر جۇيەگە قويۋىمىز كەرەك. ال اقپاراتتاردى ۋاقىتىلى جەتكىزۋىمىز كەرەك. بۇل جۇيە رەتتەلىپ، ەندىگى كەزەكتە قالا تۇرعىندارى "سovid-19 شىمكەنت" سايتى ارقىلى بۇگىنگى جاعدايعا بايلانىستى مالىمەتتەردى تولىق الىپ وتىرادى، – دەدى م.دۇيسەنبەك ۇلى. وعان قوسا، قالا اكىمى ءتيىستى ماماندارعا مەملەكەتتىك كۇندىزگى ستاتسيونارلارعا بەكىتىلگەن ارنايى ەرەجە تاراتىلۋىن تاپسىردى. "ياعني، ناۋقاستار ەمنىڭ تەگىن ەكەنىن ءبىلۋى كەرەك. ەگەر مەديتسينا قىزمەتكەرى ەم ءۇشىن ءدارى-دارمەك سۇراسا، "109" نومىرىنە حابارلاسىپ، قۇقىقتارىن قورعاۋعا مۇمكىندىكتەرى بار"، – دەدى ءوز سوزىندە قالا اكىمى.

شىمكەنت قالاسىنىڭ باس سانيتاريالىق دارىگەرى ءابدىماناپ تولەباەۆ زالالسىزداندىرۋ جۇمىستارى قارقىندى تۇردە ءجۇرىپ جاتقانىن جەتكىزىپ، ارنايى مونيتورينگتىك توپتىڭ جۇمىسى ناتيجەسىندە قالادا دارىحانالارداعى دارىلەرلەردىڭ باعاسى تۇراقتالا باستاعانىن العا تارتتى. ودان بولەك، ايىپپۇل سالۋ جۇمىسى كۇشەيگەنىن تىلگە تيەك ەتتى. ياعني، ەندى تۇتىنۋشىلارعا ەسەپشوت بەرمەگەن ءدارىحانالار دا اكىمشىلىك جاۋاپقا تارتىلادى.

جيىن بارىسىندا قالاداعى دارىلىك زاتتار ساقتايتىن قويمالار مەن دارىحاناداعى دارىلەردىڭ جەتىسپەۋشىلىگى بۇگىندە جاقسارا تۇسكەنى ايتىلدى. بۇل ماسەلەنى شەشۋ جونىندە شەت ەلدەردەن ەڭ كەرەكتى ءدارى-دارمەكتەر الىنعان. ايتا كەتەيىك، قازىرگى تاڭدا قالاداعى ءدارىحانالاردا 11 893 – قىزۋ باساتىن ءدارى، 40 845 – انتيكواگۋليانتتار، 90 106 – باكتەرياعا قارسى تەراپيا، 81 175 – ۆيرۋسقا قارسى ءدارى، 907 – اسكوربين قىشقىلى جانە 87 148 جەكە قورعانۋ قۇرالدارى بار.

شتاب وتىرىسىندا م.ايتەنوۆ بايانداماشىلاردى تىڭداپ بولعان سوڭ، ءار سالانىڭ باسشىلارىنان تۇيتكىلدى ماسەلەلەرىن سۇراپ، ول ماسەلەلەر لەزدە شەشىلەتىنىن جەتكىزدى. سونداي-اق ءتيىستى ماماندارعا جان ساقتاۋ بولىمىندەگى احۋالدى قالىپقا كەلتىرۋدى تاپسىرىپ، رەانيماتسياداعى بوس ورىندار سانىن 60 پايىزعا ءتۇسىرۋ كەرەك ەكەنىن ايتتى. ال پروۆيزورلى ورىندار جەتكىلىكتىگىن، قازىرگى تاڭدا ولاردىڭ 40 پايىزى بوس ەكەنىن العا تارتتى. وسى رەتتە م.دۇيسەنبەك ۇلى شىمكەنت قالاسى اكىمىنىڭ ورىنباسارى نۇرسادىق ەرگەشبەكتەن جاقىندا اشىلعالى وتىرعان پروۆيزورلى ورتالىق جايىندا سۇرادى. ورىنباساردىڭ ايتۋىنشا، بەس قاباتتى 1500 ورىندىق پروۆيزورلى ورىن اشىلادى. 1-2 قاباتتا – 300 ورىن، 3-4-5 قاباتتا 1200 ورىن بولادى. مەديتسينالىق كيسلورودتى باللوندارمەن تولىق قامتىلادى.

جيىن سوڭىندا قالا باسشىسى قالادا شەكتەۋ شارالارى كۇشەيىپ جانە ەپيدەميولوگيالىق احۋالدى جاقسارتۋ ماقساتىندا اتقارىلىپ جاتقان اۋقىمدى جۇمىستاردىڭ ناتيجەسىندە بۇگىندە جاعداي قالىپقا تۇسە باستاعانىن جەتكىزدى. دەگەنمەن بۇل جۇمىستاردى ءالى دە كۇشەيتۋ كەرەك ەكەنىن ايتتى.

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار