قازاقستان • 12 شىلدە، 2020

مينيسترلىك دۇنيەجۇزىلىك بانكتەن بەرىلەتىن نەسيە قايدا جۇمسالاتىنىن ءتۇسىندىردى

31 رەت كورسەتىلدى

دۇنيەجۇزىلىك بانكتىڭ 500 ملن. دوللارى قازاقستانعا كەزەڭ-كەزەڭىمەن جانە مال شارۋاشىلىعىن تۇراقتى دامىتۋ جوباسىن ىسكە اسىرۋدىڭ ناقتى ناتيجەلەرىنە قول جەتكىزىلگەننەن كەيىن عانا بەرىلەدى، دەپ حابارلايدى Egemen.kz اۋىل شارۋاشىلىعى مينيسترلىگىنىڭ باسپاسوز قىزمەتىنە سىلتەمە جاساپ.

بۇعان دەيىن حابارلاعانىمىزداي،  دۇنيەجۇزىلىك بانك قازاقستانعا كولەمدى  نەسيە بەرۋگە نيەتتى.  دۇنيەجۇزىلىك بانكتىڭ ساراپشىلار توبى ازىرلەگەن 2021-2025 جىلدارعا ارنالعان مال شارۋاشىلىعىنىڭ تۇراقتى دامۋ جوباسىن ىسكە اسىرۋعا 500 ميلليون دوللار (459،8 ميلليون ەۋرو) بولىنەدى. قر ۇكىمەتى اتىنان نەسيە الۋشى قارجى مينيسترلىگى.

دۇنيەجۇزىلىك بانك جوباسىنىڭ نەگىزگى ماقساتى - ۇلكەن ەكسپورتتىق الەۋەتكە يە ءارى  قۇنى جوعارى ءونىم رەتىندە ەكولوگيالىق تازا سيىر ەتىن ءوندىرۋدى جانە قازاقستاندىق ەت ەكسپورتىن قولداۋ. سول ارقىلى قازاقستان ەكونوميكاسىنىڭ وسۋىنە ىقپال ەتۋ جانە اۋىلدىق جەرلەردە ءومىر ءسۇرۋ جاعدايىن جاقسارتۋ.

جوبا اياسىندا كەلەسىدەي ناتيجەلەرگە قول جەتكىزۋ جوسپارلانىپ وتىر:

  • 20 مىڭ فەرمەرگە نەسيە بەرۋ;
  • 100 مىڭ فەرمەرگە ءبىلىم بەرۋ;
  • بالاما ەنەرگيا كوزدەرىن قولدانا وتىرىپ، مال شارۋاشىلىعىنىڭ ينفراقۇرىلىمىن دامىتۋعا فەرمەرلەرگە قارجىلىق قولداۋ;
  • سيىر ەتىن يمپورتتايتىن ەلدەردىڭ تالاپتارىنا سايكەس مال شارۋاشىلىعى ونىمدەرىن باقىلاۋ جۇيەسىن قۇرۋ;
  • جەكە جانە تاجىريبەلىك ۆەتەرينارلاردى شاعىن جانە ورتا فەرمالارعا قىزمەت كورسەتۋگە، سونداي-اق ۆەتەرينارلىق ءىس-شارالارعا تارتۋ.

جوبا جوعارىدا اتالعان ءىس-شارالاردى تىكەلەي قارجىلاندىرۋدى كوزدەمەيتىنىن اتاپ وتكەن ءجون. نەسيە قاراجاتى قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ مەملەكەتتىك باعدارلاماسىن ىسكە اسىرۋدى قولداۋعا جۇمسالادى.

سونىمەن قاتار، جوبانى ىسكە اسىرۋ كەزىندە قازاقستان ءۇشىن مۇلدە جاڭا قارجى قۇرالى - «ناتيجەگە باعىتتالعان باعدارلاما» (Program-for-Results – PforR) بويىنشا نەسيە قولدانىلادى. بۇل مەحانيزم قاراجات  قارىز الۋشىعا قارجى ينستيتۋتىمەن كەلىسىلگەن ناتيجەلەر مەن كورسەتكىشتەرگە قول جەتكىزىلگەندە عانا  تولەنەتىنىن قاراستىرادى.

سونداي-اق، ينديكاتورلار جەتىستىگىنە  اۋدارىلاتىن قاراجات ءليميتى مەملەكەت جۇمساعان قاراجات كولەمىنە ەمەس، مال شارۋاشىلىعى سالاسىن دامىتۋعا ارنالعان ينديكاتورلار جەتىستىگىنىڭ كورسەتكىشىنە بايلانىستى بولادى.

سوڭعى جاڭالىقتار

ۇقساس جاڭالىقتار