ايماقتار • 11 شىلدە، 2020

ەپيدەميالىق احۋالدا وڭ قۇبىلىس بايقالادى

403 رەت كورسەتىلدى

اقتوبە وبلىسىنىڭ اكىمى وڭداسىن ورازالين وڭىرلىك كوممۋنيكاتسيا قىزمەتىندە تىكەلەي ەفير ارقىلى جۇرگىزىلگەن بريفينگتە وبلىستا ەپيدەميالىق احۋالعا تەرەڭ ءارى جان-جاقتى تالداۋلار جاسادى. ءوڭىر باسشىسى سوڭعى ۋاقىتتا تۇرعىندار اراسىندا كۆي-دان گورى وكپە قابىنۋىنىڭ ءجيى تارالۋى الاڭداتىپ وتىرعانىن ايتىپ بەردى. وسىعان وراي ول از ۋاقىتتىڭ ىشىندە شەشىمىن تاۋىپ ۇلگەرگەن شارالارعا توقتالىپ ءوتتى، - دەپ حابارلايدى Egemen.kz.

- قازىر ناۋقاستاردى قابىلداۋ ءۇشىن 3300 ورىن بار. تەك سوڭعى اپتانىڭ ىشىندە 924 ورىندىق پروۆيزورلىق گوسپيتال جاساقتالدى. تۇتاستاي العاندا وڭىردەگى پروۆيزورلىق ورىندار جەتپىس پايىزعا عانا تولىق. ارتىق قوردا 715 كەرۋەت تۇر. سونىمەن بىرگە ەمحانالار جانىنان 725 ورىندىق كۇندىزگى ستاتسيونارلار جۇمىس جاسايدى. ونىڭ ءبارى قاجەتتى مەديتسينالىق قوندىرعىلارمەن تولىقتاي قامتىلعان. ارينە باستى ماسەلە ساندا ەمەس، ساپالىق كورسەتكىشتەر مەن تۇپكى ناتيجەدە عوي. بۇل رەتتە وتكەن ماۋسىم ايىندا مىڭعا جۋىق ادام دەرتىنەن قۇلان تازا ەمدەلىپ شىققانى كوڭىلگە اجەپتاۋىر مەدەۋ، - دەدى بۇدان ءارى وڭداسىن سەيىل ۇلى.

كەلەسى كەزەكتە ءدارى-دارمەكتەرمەن قامتۋ ماسەلەسىنە كوشكەن بريفينگ وتكىزۋشى ءدارىحانا جەلىسىنىڭ اينالىمىن تولىقتىرۋ ءۇشىن شەتەلدەردەن ونىڭ ون التى ءتۇرى قوسىمشا ساتىپ الىنعانىن العا تارتتى. بريفينگ كەزىندە ءدارىحانالار قاجەتتى پرەپوراتتارمەن كۇن سايىن تولىعىپ وتىرعانى ايتسە دە سۇرانىستىڭ تىم كوپتىگىنەن ونىڭ تەز ازايىپ كەتەتىنى، سونىڭ سالدارىنان قاجەتتى پرەپوراتتار دەر كەزىندە تابىلماي قالاتىنى دا اشىق ايتىلدى. مۇنداي جاعدايدا تۇبەگەيلى شەشىم قابىلداۋ قاجەتتىگى انىق. وبلىس اكىمى بۇل ماسەلەنىڭ شەشىمىن دە سوقىرعا تاياق ۇستاتقانداي شەگەلەپ كورسەتتى. اتاپ ايتقاندا بۇل ينۆەستورلارمەن ءوزارا كەلىسىمگە سايكەس بولىنگەن 500 ميلليون تەڭگە قاراجات بولىپ وتىر. وسى ارقىلى وكپە قابىنۋىنا قاجەتتى ءدارى-دارمەك قورى ودان ءارى تولىقتىرىلماق.

قازىرگى جاعدايدا اتالعان جانا ۆيرۋستىق دەرتكە قارسى ءدارى شىعارۋ مۇمكىن ەمەستەي ءىس. ايتسە دە اقتوبە قالاسىنداعى "تك فارم" فارماتسەۆتيكالىق كومپانياسى گەپارين دەگەن ۆيرۋسقا قارسى پرەپورات شىعارۋ ءىسىن قولعا العانى وتاندىق ءدارى ونەركاسىبىنىڭ باعا جەتپەس جاڭاشىل قادامى بولارى انىق. اتالعان پرەپورات تاياۋ كۇندەردە اۋرۋحۋنالارعا تۇسەدى دەپ بەلگىلەنگەن. سونىمەن بىرگە ناۋقاستاردى تىنىس الۋ اپپاراتىمەن قامتۋ جونىندە دە اتقارىلعان ءىس از ەمەس.

و.س.ورازالين وبلىستا ىندەتپەن كۇرەستە تەك ينفەكتسيونيست دارىگەرلەر عانا ەمەس، سونىمەن بىرگە بارلىق جوعارى ءبىلىمدى دەنساۋلىق ساقشىلارى جانە مەديتسينا ۋنيۆەرسيتەتىنىڭ تۇلەكتەرى تۇتاستاي جۇمىلدىرىلعانىن جەتكىزدى. بۇعان قوسىمشا ءۇش مىڭعا جۋىق ورتا بۋىن مەديتسينا ماماندارى تارتىلعان. وسى ارقىلى اۋرۋحۋنالار مەن ەمحانالارداعى ماماندار تاپشىلىعىن جويۋعا قول جەتكىزە الدىق دەدى ول. ىندەتپەن بەتپە بەت كەلۋ كەزىندە ۆيرۋس جۇقتىرعان ءبىر مەدبيكە، ءتۇرلى سالادا قىزمەت جاسايتىن ءتورت مەديتسينالىق قىزمەتكەر قايتىس بولعانىن بريفينگ يەسى ۇلكەن وكىنىشپەن تولقۋ ءساتى ۇستىندە جەتكىزدى.

وبلىس اكىمى جوعارىدا ءوزى ايتىپ وتكەندەي شۇعىل اتقارىلعان كەشەندى ءىس-قيمىلدىڭ ناتيجەسىندە سوڭعى اپتادا ناۋقاستار سانى باسەڭدەگەنىن وڭ قۇبىلىس رەتىندە اتاپ ءوتتى. ايتالىق وتكەن ماۋسىم ايىنىڭ سوڭعى اپتالارىندا اۋرۋحۋنالارعا كۇن سايىن 120-130 ادام تۇسكەن بولسا بۇگىندە ولاردىڭ سانى 70-80 ادامعا دەيىن ازايدى. جوعارىدا ايتىپ وتكەنىمدەي ەمدەۋ ورىندارىنان دەرتتەن ايىعىپ جازىلىپ ۇيلەرىنە ورالعان اقتوبەلىكتەردىڭ سانى وسە ءتۇستى. ماسەلەن تەك سوڭعى تاۋىلىكتىڭ ىشىندە 81 ادام وكپە قابىنۋى دەرتىمەن اۋرۋحۋناعا تۇسسە، وسى دياگنوز بويىنشا 161 ادام جازىلىپ شىققانى ەپيدەميالىق احۋال اۋقىمىنداعى وڭ قۇبىلىس رەتىندە باعالاۋعا بولادى دەدى وبلىس اكىمى.

باق وكىلدەرى تاراپىنان بەرىلگەن اۋرۋحۋنادا ورىن بولماعاندىقتان ناۋقاستى قابىلداماپتى. قابىلدانعانداردىڭ ءوزى دالىزدەردە جاتادى ەكەن. شاقىرىلعان قوڭىراۋعا جەدەل جاردەم كولىگى كەلمەپتى دەگەن ۋاجدەر دە ەستىلىپ قالادى. بۇعان نە دەيسىز دەگەن ساۋالعا ول. رەسمي انىقتاما مەن دەرەك كوزدەرى بويىنشا مۇنداي جاعدايلار ورىن العان جوق. اۋرۋحۋنالاردا ورىن بار. تۇرعىندار اراسىندا وسىنداي الىپ قاشپا سوزدەر ايتىلىپ قالىپ جۇرگەنىن ەستىگەن سوڭ ونىڭ انىق-قانىعىنا كوز جەتكىزۋ ءۇشىن پروۆيزورلىق گوسپيتالدارعا ارنايى بارىپ ناقتى ءىستىڭ ءمان-جايىمەن تانىسىپ جاعدايدى ءوز كوزىممەن كورىپ ناۋقتاستارمەن جانە دارىگەرلەرمەن كەزدەستىم دەگەن جاۋاپ قايتاردى.        

بريفينگتى قورىتىندىلاي كەلە اقتوبە وبلىسىنىڭ اكىمى وڭداسىن ورازالين سوڭعى كەزدە وڭىردەگى ەپيدەميالىق احۋالدى ساۋىقتىرۋدا وڭ قۇبىلىس بايقالعانىمەن بۇل ءجايت بوساڭسۋعا ەش نەگىز بولا المايتىنى جونىندە ءتۇيىن جاسادى.

 

 اقتوبە

 

 

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار