ايماقتار • 10 شىلدە، 2020

ءموبيلدى توپ باقىلايدى

537 رەت كورسەتىلدى

اتىراۋدا قاۋىپتى ىندەت ءورشىپ، جۇقتىرۋشىلار قاتارى كۇن سايىن وسۋدە. وبلىس اكىمى ماحامبەت دوسمۇحامبەتوۆتىڭ مالىمەتىنشە، 27 ناۋ­رىز-7 شىلدە ارالىعىندا سيمپتومسىز ناۋقاستاردى قوسا ەسەپتەگەندە كوروناۆيرۋسقا شالدىققاندار سانى 6 156 ادامعا جەتتى. ال سوڭعى جەتى كۇندە ىندەتتى جۇقتىرۋشىلار 6 پايىزعا وسكەن. بۇل – 8 شىلدەدەگى مالىمەت.

ناۋقاستاردىڭ كوبى جىلىوي اۋدانىندا تىركەلىپ وتىر. بۇل اۋداننان 2822 ادام ىندەتكە شالدىعىپتى. ونىڭ ىشىندە 2 063 جاعداي تەڭىز كەنىشىندەگى كاسىپورىنداردىڭ جۇمىسشىلارىنان راستالدى.

مۇنايلى وڭىردە كوروناۆي­رۋس ينفەكتسياسىنىڭ ورشۋىمەن بىر­نە­شە ماسەلە تۋىنداعانى بەلگىلى. بىرىن­شى­دەن، مەديتسينا سالاسىنداعى كادر­دىڭ جەتىسپەۋشىلىگى جەرگىلىكتى بي­لىكتى كوپتەن بەرى تولعاندىرعان ەڭ وزەكتى پروبلەمانىڭ بىرىنە اينال­دى. مۇنى وبلىس اكىمى دە راستاپ وتىر. ەندى بۇل ماسەلە قالاي شەشى­لە­­دى؟ قازىر اتىراۋ وبلىسىنا جالپى تاجىريبەلىك دارىگەرلەر، انەستەزيولوگ-رەانيموتولوگ، اكۋشەر-گينەكولوگ، ينفەكتسيونيست جانە ەپيدەميولوگ سىندى 278 مامان اۋاداي قاجەت. وسىعان باي­لانىستى وبلىستىق اكىمدىك مەدي­تسينا سالاسىن بىلىكتى ماماندارمەن قامتاماسىز ەتۋ ءۇشىن بىرنەشە نۇسقانى قاراستىرىپتى. ونىڭ ىشىندە رەسەيدەن بىلىكتى دارىگەرلەردى شاقىرۋ ماسەلەسى دە بار. سونىمەن بىرگە ەلىمىز­دە­گى مەديتسينالىق جوعارى وقۋ ورنىن بىتىرگەن جاس مامانداردى تارتۋ كوزدەلىپ وتىر.

ەكىنشىدەن، وسى اپتا باستالعانعا دەيىن ءدارى-دارمەكتىڭ تاپشىلىعى سەزىل­دى. سىرقاتىنا شيپا بولار ءدارى-دارمەك ىزدەگەن جۇرت اپتاپ ىستىقتا ءدارىحانانىڭ الدىندا سا­عات­تاپ كەزەكتە تۇردى. بىرىنەن تاپ­­­پا­عانىن ىزدەۋ ءۇشىن قالانىڭ ءار بۇ­رى­شىنداعى ءدارىحانالاردى تاڭ الا­­كەۋىمنەن كۇزەتەتىن بولدى. بۇل ارينە ءوڭىر باسشىلىعىن شۇ­عىل شەشىم قابىلداۋعا ءماجبۇر ەتتى. م.دوسمۇحامبەتوۆتىڭ ءمالىم ەتۋىنشە، جا­قىندا اتىراۋعا 220 ملن تەڭگەنى قۇ­رايتىن ءدارى-دارمەكتەردىڭ 430 ءتۇرى شۇعىل جەتكىزىلدى. ونىڭ 50-گە جۋىعى – انتي­­بيوتيكتەر، ازيتروميتسين، تسەفازو­لين، تسەفترياكسون جانە ينەكتسياعا ار­نال­­عان ليدوكاين ەرىتىندىسى سىندى پرەپا­راتتار، ىستىقتى تۇسىرەتىن دارىلەر مەن دارۋمەندەر. دارىلىك پرەپاراتتار پارتياسى وبلىس حالقىنىڭ سۇرانىسىن قام­تاماسىز ەتەدى. ءدارى-دارمەكتەر قالا­داعى جانە اۋداندارداعى 314 دا­رى­­حاناعا تاراتىلدى.

– وبلىس اكىمدىگى «فارمقاۋىم­داس­تىق» قوعامدىق بىرلەستىگىمەن جانە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىمەن مەموراندۋمعا قول قويدى. ماقسات – دارىلەردىڭ باعاسىن باقىلاۋدا ۇستاپ، ءار ادامعا تيەسىلى كولەمىن عانا ساتۋ. قازىر وبلىستا بىرنەشە باقىلاۋشى ورگاننان قۇرالعان موبيلدىك توپتار رەيد جۇرگىزەدى. ولار ءدارى-دارمەك باعاسىنىڭ شەكتى مولشەردەن اسپاۋىن قاداعالايدى. ءدارى-دارمەك باعاسىن شەكتى مولشەردەن اسىرعاندار زاڭ شەبەرىندە جاۋاپقا تارتىلادى. باعانى زاڭسىز كوتەرگەندەردى انىقتاۋ جۇمىسى جالعاسادى، – دەيدى وبلىس اكىمى.

ۇشىنشىدەن، ەكى اپتالىق قاتاڭ كارانتيندىك شەكتەۋ تالابىنا مويىن­سۇ­نبايتىندار ءالى كەزدەسىپ وتىر. وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە، 5-6 شىلدەدە قاتاڭ كارانتيندىك شەك­تەۋ­لەر­دىڭ ساقتالۋىنا رەيد جۇرگىزىلدى. رەيدتىك ءىس-شارا كەزىندە اتىراۋ قالا­سى­نىڭ «نۇرسايا» شاعىن اۋدانىندا ور­نالاسقان جەمىس-جيدەك ساتاتىن دۇڭ­گىرشەك، ەكى سۋپەرماركەت، ازىق-ت ۇلىك دۇكەنى، سامسا ساتۋ ورنى، مەيرامحانا يەلەرىنىڭ كارانتين تالابىن بۇزعانى انىقتالدى. سونىمەن قاتار سەنبى، جەكسەنبى جانە مەرەكە كۇندەرى اۆتوكولىك قوزعالىسىنا تىيىم سالۋ تۋرالى شەكتەۋدى ەلەمەگەن 127 جۇرگىزۋشى ۇستالدى.

دەگەنمەن، ىندەتپەن كۇرەستە مەدي­تسي­­نانىڭ 1429 مامانى ءوز كاسى­بى­نە ادال­دىعىن تانىتىپ وتىر. مەدي­تسي­نا­لىق مەكەمەلەردەگى 41 جەدەل جاردەم اۆتوكولىگى قىركۇيەك-قازان ايلارىندا رەسپۋبليكالىق بيۋدجەتتەن بولىنگەن قاراجاتقا ليزينگپەن 40 سانيتارلىق اۆتوكولىكپەن تولىقپاق. سونداي-اق وب­لىس­­تىق اكىمدىك 15 كولىكتى ساتىپ الۋ­دى جوسپارلاپ وتىر.

ال كەشە تاعى دا 658 ناۋقاستان قا­ۋىپ­­تى ىندەت بەلگىسى راستالىپ، جالپى سانى 6814-كە جەتتى.

 

اتىراۋ وبلىسى

 

سوڭعى جاڭالىقتار

ۇقساس جاڭالىقتار