كوروناۆيرۋس • 10 شىلدە، 2020

ساقتىقتا قورلىق جوق

16 رەت كورسەتىلدى

سولتۇستىك قازاقستان وبلىسىنىڭ اكىمى قۇمار اقساقالوۆ ايماقتىق كوممۋنيكاتسيا قىزمەتىندەگى بريفينگىندە جالپى جاعدايدىڭ باقىلاۋدا ەكەنىن جەتكىزدى.

8 شىلدەدەگى مالىمەتكە قاراعاندا قازىر وڭىردە 1 446 وقيعا تىركەلدى. سونىڭ ىشىندە 480 ادام اۋرۋدىڭ سيمپتومدى تۇرىمەن، ال 67 پايى­زى سيمپتومسىز تۇرىمەن ناۋقاستانعان. وتكەن تاۋلىكتە ناۋقاستانعاندار سانى – 1،9 پايىزعا ءوستى نەمەسە بۇل – 28 ادام، ونىڭ 19-ى سيمپتومدى، 9-ى سيمپتومسىز.

ينفەكتسيالىق ستاتسيونارلاردا قازىر 136 ادام ەمدەلىپ جاتىر. 545 ادام ەمدەلىپ شىقتى.

مەديتسينالىق قىزمەتكەرلەرگە ەڭبەكاقى قالاي تولەنۋدە دەگەن سۇراققا اكىم ولاردىڭ ەڭبەكتەرىن جوعارى باعالايتىنىن جانە ولارعا ءوزىنىڭ ريزاشىلىعىن جەتكىزدى. بۇگىنگى تاڭدا پرەزيدەنتتىڭ اتىنان 15 دارىگەرگە جوعارى مەملەكەتتىك ناگرادالار تاپسىرىلدى. ال ەڭبەكاقى جونىندە ايتار بولساق، بارلىق ينفەكتسيالىق، پروۆيزورلىق ستاتسيونارلار، سونداي-اق جەدەل جاردەم، قابىلداۋ بولمەلەرىندەگى فيلتر قىزمەتكەرلەرىنە اي سايىنعى ۇستەمەاقى دەن­ساۋلىق ساقتاۋ ءمينيسترىنىڭ 2020 جىلدىڭ 4 ساۋىرىندەگى بۇيرىعىنا سايكەس تولەنەدى. بارلىق مەديتسينا قىزمەتكەرلەرى تاۋەكەلدىلىگى بويىنشا 3 توپقا بولىنگەن، سونىڭ ىشىندەگى ءبىرىنشى توپتا 184 ادام بار. وسىنداعى ءار دارىگەردىڭ نەگىزگى ەڭبەكاقىسىنا 120 مىڭنان باستاپ 825 مىڭ تەڭگەگە دەيىن جۇمىس ىستەگەن ۋاقىتىنا سايكەس تولەنەدى. ەكىنشى توپتاعى تاۋەكەلدەگىلەرگە 425 مىڭ تەڭگەگە دەيىن تولەنەدى. بۇل ساناتتاعىلار وبلىستا – 258 ادام. ال ءۇشىنشى توپتاعىلاردىڭ سانى – 744 ادام، ولاردىڭ ارقايسىنا قوسىمشا 225 مىڭ تەڭگەگە دەيىن تولەنەدى. وسىلايشا ناۋ­رىز ايىندا 48،6، ساۋىردە 161،2 ملن، مامىردا 150،3 جانە ماۋسىمدا 209،8 ملن تەڭگە قوسىمشا اقى تولەندى.

مەديتسينا قىزمەتكەرلەرىنە ارنالعان جەكە قورعانىش قۇرالدارى جەتكىلىكتى، الداعى 2 اپتاعا دا جەتەدى. ياعني ءبىر رەتتىك بەتپەردە – 338 مىڭ دانا، قورعانىش كاستومى – 4 مىڭ، قولعاپ – 596 مىڭ، انتيسەپتيكتەن 9 توننا بار. بولشەك ساۋدا جاسايتىن ءدارىحانالار جەلىسىندە بەتپەردە مەن انتيسەپتيك تاپشىلىعى جوق. قازىر سۇرانىستىڭ ارتۋىنا بايلانىستى №1 قالالىق اۋرۋحانا، وبلىستىق فتيزيوپۋلمونولوگيا ورتالىعى جانە م.جۇماباەۆ، ع.مۇسىرەپوۆ اۋدان­دارىندا پاتسيەنتتەرگە ارنالعان توسەكتىك ورىن سانىن 65-تەن 435-كە دەيىن كوبەيتتىك. پروۆيزورلىق ستاتسيونارلارداعى ورىندار 100-دەن 905-كە دەيىن ارتتى، سونىڭ ىشىندە وبلىستىق اۋرۋحانادا 200، قالالىق اۋرۋحانادا 110، قىزىلجار اۋداندىق اۋرۋحاناسىندا 120-عا دەيىن قوسىمشا ورىندار اشىلدى. باسقا اۋدانداردا ورىندى كوبەيتۋ قولعا الىنعان.

كارانتين سالدارىنان ۋاقىتشا جۇمىسسىز قالعانداردى جۇمىسقا ورنالاستىرۋ بويىنشا 3 شىلدە كۇنى بوس قىزمەت ورىندارىنىڭ جارمەڭكەسى ءوتىپ، وعان 29 كاسىپورىن مەن 280 ادام قاتىستى. 103 ادام جۇمىسقا تۇرۋ ءۇشىن قۇجاتتار جيناپ جاتىر. كەشە پوگودين اتىنداعى تەاتردا ەكىنشى رەت جارمەڭكە وتكىزىلدى.

ق.اقساقالوۆ وڭىردە جامان ىندەتتىڭ تارالۋى تولىق باقىلاۋدا ەكەنىنە سەندىرە كەلىپ، «ساقتىقتا قورلىق جوق» ەكەنىن اتاپ ءوتتى.

 

سولتۇستىك قازاقستان وبلىسى

 

سوڭعى جاڭالىقتار

ۇقساس جاڭالىقتار