ءبىلىم • 09 شىلدە، 2020

گاۋحار الدامبەرگەنوۆا: باستى مىندەت – كارانتين ەرەجەلەرىن قاتاڭ ساقتاۋ

31 رەت كورسەتىلدى

مەملەكەت باسشىسى قاسىم-جومارت توقاەۆ رەسپۋبليكالىق تەلەارنالار ارقىلى پاندەمياعا وراي ەلىمىزدە قالىپتاسقان احۋالعا بايلانىستى تەلەۆيزيالىق ۇندەۋ جاساپ، وتانداستارىمىزدى مازالاعان تۇيىتكىلدى ماسەلەلەردى اتاپ ءوتىپ، ازاماتتاردى جالعان اقپاراتقا سەنبەۋگە شاقىردى.

«كوروناۆيرۋستىڭ تارالۋى باسەڭدەمەي وتىر. كەيبىر ەلدەردە بۇل ىندەت قايتادان ۋشىعىپ بارا جاتىر. الەم بويىنشا وسى ۆيرۋستى جۇقتىرعانداردىڭ سانى شامامەن 12 ميلليونعا جەتتى، سونىڭ سالدارىنان 500 مىڭنان استام ادام قايتىس بولدى. سول سەبەپتى، بىرقاتار ەلدەردە  كارانتين ءتارتىبى قايتا كۇشەيتىلىپ، اۋە، كولىك قاتىناسى قايتادان شەكتەلدى. وكىنىشكە قاراي، ءبىزدىڭ ەلدەگى جاعداي دا وڭاي بولىپ تۇرعان جوق»، – دەدى قاسىم-جومارت توقاەۆ.

راسىندا دا، قازاقستاندا اۋىرعاندار سانى ايتارلىقتاي كوپ، قايتىس بولعاندار دا از ەمەس. وسىعان وراي مەملەكەت باسشىسى 13 شىلدە – ۇلتتىق ازا تۇتۋ كۇنى بولىپ بەلگىلەنگەنىن اتاپ ءوتتى. بۇل – اتى جامان ىندەتتەن و دۇنيەلىك بولعان وتانداستارىمىزدىڭ، اسىل ازاماتتارىمىزدىڭ الدىنداعى پارىز دەپ ۇعىنعان ابزال.

سونىمەن قاتار پرەزيدەنت قازاقستاندىقتاردى ەكى اپتاعا بەلگىلەنگەن كارانتين شارالارىن قاتاڭ ساقتاپ، سانالى تۇردە ارەكەت ەتۋگە شاقىردى. ونىڭ ايتۋىنشا، ەرەجەلەردى ەسكەرگەندە عانا ناتيجە بولماق. بۇل ورايدا ول كوروناۆيرۋستىڭ تارالۋىنا بايلانىستى دەنساۋلىق ساقتاۋ جۇيەسىنە كوپ اۋىرتپالىق تۇسكەندىگىن اتاپ ءوتتى. دەگەنمەن، قالىپتاسقان جاعدايعا قاراماي، مەملەكەت تاراپىنان بارلىق قاجەتتى شارالار قابىلدانىپ جاتقاندىعىن دا ەسكەرگەن ءلازىم.

قاسىم-جومارت توقاەۆ ءوز سوزىندە ءدارى-دارمەكتىڭ جەتكىلىكسىزدىگى جايىنا دا توقتالدى. شىندىعىن ايتقان ءجون، بۇگىندە مەديتسينالىق پرەپاراتتاردىڭ ءدارىحانالاردا بولماۋى جۇرتشىلىقتىڭ اشۋ-ىزاسىن تۋدىرىپ جاتقانى راس. بار بولعان كۇننىڭ وزىندە باعاسىنىڭ بىرنەشە ەسە كوتەرىلگەندىگى تۋراسىندا الەۋمەتتىك جەلىدەگى الەۋمەت جازىپ تا، ايتىپ تا جاتىر. پرەزيدەنت قاجەتتى ءدارى-دارمەكتەر قورىنىڭ كوبەيەتىندىگىن، ونىڭ باعاسىن نەگىزسىز ءوسىرىپ، قيىن-قىستاۋ كۇندەردە پايدا تابۋدى كوزدەگەندەر زاڭ شەڭبەرىندە جازالاناتىندىعىن جەتكىزدى. بۇل تاراپتا ناقتى تاپسىرمالار بەرىلىپ، جۇمىستار كۇشەيەتىندىگىن مالىمدەدى.

مەملەكەت باسشىسى تەلەارنالار ارقىلى دارىگەرلەردىڭ كەڭەسى كوپتەپ بەرىلۋى قاجەتتىگىن دە اتاپ ءوتتى.

وسى ورايدا ايتا كەتەيىن، «Qazaqstan» ۇلتتىق تەلەارناسى 9 شىلدەدەن باستاپ تىكەلەي ەفيردە «تەلەدارىگەر» جوباسىن باستايدى. ەلىمىزدىڭ بىلىكتى دارىگەرلەرى بەس كۇن بويى تىكەلەي ەفير ارقىلى كورەرمەندەرمەن بايلانىسقا شىعىپ، الەمدى جاۋلاعان كوروناۆيرۋسپەن كۇرەسۋدىڭ جولدارىن تۇسىندىرەدى.   باعدارلاما سۇراق-جاۋاپ فورماتىندا ۇيىمداستىرىلىپ، ستۋدياعا كەلگەن ماماندار تەك كورەرمەن تاراپىنان كەلىپ تۇسكەن ساۋالدارعا جاۋاپ بەرەدى. نەگىزگى ماقسات – ەل تۇرعىندارىنا، اسىرەسە شالعاي اۋىل-ايماقتاعى كورەرمەنگە قازىرگى كۇردەلى احۋالعا بايلانىستى كۇندەلىكتى مەديتسينالىق كەڭەس بەرۋ. دارىگەرلەر تىكەلەي ەفير بارىسىندا COVID-19 ۆيرۋسى مەن وزگە دە اۋرۋلاردان ساقتانۋ مەن الدىن الۋ شارالارى، ەمدەۋ تاسىلدەرى تۋرالى نۇسقاۋلىق بەرەدى.

قولعا الىنىپ جاتقان ءىس-شارالاردىڭ كوزدەگەن ماقساتى ءبىر: اتى جامان ىندەتتى اۋىزدىقتاۋ، ۇلت ساۋلىعىن قالىپتاستىرۋ، ازاماتتاردى اۋرۋدان اراشالاۋ.

ءسوزىمدى مەملەكەت باسشىسىنىڭ پايىمدى ويىمەن تۇيىندەسەم: ء«بىز – تالاي زوبالاڭ مەن سىناقتى باستان وتكەرگەن، تاريحتىڭ تالاي داۋىلىنا بوي بەرمەگەن حالىقپىز. باتىر بابالاردىڭ جولىن جالعاعان بۇگىنگى ۇرپاق تا قازىرگى قيىندىققا توتەپ بەرەدى دەپ سەنەمىن. بالكىم، بۇل ءبىزدىڭ بىرلىگىمىزدى بايقاۋ ءۇشىن بەرىلگەن سىناق شىعار. ءبىر جەڭنەن قول، ءبىر جاعادان باس شىعارىپ، ۇيىمداسا بىلسەك، بۇل سىننان دا وتەرمىز.  «دەنساۋلىق – زور بايلىق» دەگەن حالقىمىزدىڭ دانا ءسوزىنىڭ قادىرىن بىلەيىك. ءار ازاماتتىڭ اماندىعى ءۇشىن كۇرەسەيىك!».

 

گاۋحار الدامبەرگەنوۆا،

قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى

سوڭعى جاڭالىقتار

قحل: ۆيزا بەرمەي جاتىر

حوككەي • بۇگىن، 15:18

COVID-19 ادامنان يتكە جۇققان

كوروناۆيرۋس • بۇگىن، 14:15

قيىن كەزەڭ ارتتا قالدى - مينيستر

قازاقستان • بۇگىن، 11:14

ۇقساس جاڭالىقتار