بيزنەستىڭ الەۋمەتتىك جاۋاپكەرشىلىگىن دە ارتتىرۋ ماڭىزدى

سول سەبەپتى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تەلەۆيزيالىق ۇندەۋى ماڭىزدى ءارى قاجەتتى قادام بولدى دەپ ەسەپتەيمىن.

تاجىريبە كورسەتىپ وتىرعانداي, كوروناۆيرۋسپەن كۇرەس مەملەكەت پەن حالىقتىڭ ءوزارا ارەكەتىن, قولداۋىن, تۇسىنىستىگىن, بيزنەستىڭ الەۋمەتتىك جاۋاپكەرشىلىگىن تالاپ ەتىپ وتىر.

بارىمىزگە ءمالىم, ەلىمىزدە كوروناۆيرۋس فاكتىلەرى تىركەلە باستاعان تۇستان مەملەكەت توتەنشە جاعداي رەجىمىن ەنگىزىپ, دەر كەزىندە قاجەتتى شارالاردى قابىلداي ءبىلدى. سونىڭ ناتيجەسىندە ىندەتتىڭ تارالۋىن ەداۋىر باسەڭدەتە الدىق. كەشە پرەزيدەنت كوروناۆيرۋسپەن اۋىرعاندارعا ارنالعان اۋرۋحانا توسەكتەرىنىڭ 70%-عا دەيىن كوبەيتىلىپ, 43 مىڭعا جەتكەنىن ايتتى.

تۇرعىندارعا ءۇي جاعدايىندا مەديتسينالىق قىزمەت كورسەتۋ ماقساتىندا 400 امبەباپ ءموبيلدى بريگادا جاساقتالعانىن جەتكىزدى. بۇل باعىتتاعى جۇمىستار, البەتتە, باسەڭدەمەۋى شارت. ءبىز مەديتسينا جۇيەسىن ۇيىمداستىرۋدا كەتكەن قاتەلىكتەردى دەر كەزىندە تۇزەتۋگە قابىلەتتى بولۋىمىز كەرەك دەپ ەسەپتەيمىن. پرەزيدەنت وسىنى ەسكەرتتى.

ال ازاماتتارىمىزدى ەموتسيونالدى جازبالار مەن دەرەگى جوق ۇرەي تۋعىزاتىن اقپاراتتارعا سەنبەۋگە شاكىرامىن.

ويتكەنى ۇرەيلى اقپارات كۇيزەلىسكە ۇشىراتىپ, يممۋنيتەتىڭىزگە كەرى اسەرىن تيگىزەدى قازىر ءبىر-بىرىمىزدەن كىنا ىزدەيتىن كەز ەمەس. الەمنىڭ بىردە-ءبىر ەلى بۇل ىندەتپەن كۇرەسۋدىڭ وڭاي جولىن تاپقان جوق. ءوزىڭىزدىڭ جانە جاقىندارىنىڭ قاۋىپسىزدىگى مەن دەنساۋلىعىن ساقتاپ, قاراپايىم گيگيەنا, الەۋمەتتىك ديستانتسيا تالاپتارىن ورىندايىق. ازاماتتارىمىز وسى ارقىلى ىندەتكە قارسى كۇرەستەگى جەڭىستى قامتاماسىز ەتۋگە كومەكتەسەدى.

وسى تۇستا بيزنەستىڭ الەۋمەتتىك جاۋاپكەرشىلىگىن دە ارتتىرۋ ماڭىزدى بولىپ وتىر. سەبەبى سوڭعى ۋاقىتتا ازاماتتارىمىز ءدارىحانالاردا دارىلەردىڭ جوقتىعىنا, بار بولسا دا ولاردىڭ باعالارىنىڭ شارىقتاپ كەتكەنىنە شاعىمدانۋدا. بۇعان قارسى كەش بولسا دا قاتاڭ شارالار قولعا الىنۋدا.

كوروناۆيرۋس ءبىزدىڭ بىرلىگىمىزدى سىنعا سالۋدا. بۇل ىندەتتى دە از ۋاقىتتا جەڭەتىنىمىزگە كامىل سەنەمىن.

ايگۇل قاپباروۆا,

پارلامەنت سەناتىنىڭ دەپۋتاتى