ايماقتار • 09 شىلدە، 2020

نۇر-سۇلتاندا ينفەكتسيالىق توسەك-ورىن سانى 4 ەسەگە ارتتى

16 رەت كورسەتىلدى

نۇر-سۇلتاندا پاندەميا باستالعالى ينفەكتسيالىق توسەك-ورىن سانى 1 مىڭنان 3 مىڭ 700-گە دەيىن ارتتى. وسىلايشا، ستاتسيونارلار سانى 3-تەن 13-كە دەيىن ءوستى. سوڭعى كۇندەرى ۇلتتىق عىلىمي مەديتسينالىق ورتالىق بازاسىندا 240 توسەك-ورىنعا ارنالعان ينفەكتسيالىق ستاتسيوناردىڭ جەكە بلوگى اشىلدى. № 1 كوپ بەيىندى اۋرۋحانا جۇقپالى اۋرۋلار ستاتسيونارىنا تولىعىمەن قايتا جابدىقتالعان. "Ramada Plaza" قوناق ءۇيى بازاسىندا 500 قوسىمشا توسەك-ورىن ورنالاسقان. قالا اكىمدىگى مەملەكەت باسشىسىنىڭ تاپسىرماسى بويىنشا وسى باعىتتا جۇيەلى جۇمىستار جۇرگىزۋدە. بۇل تۋرالى قالا اكىمدىگىنىڭ رەسمي سايتى حابارلادى، - دەپ جازادى Egemen.kz

كۆي انىقتالعان جۇكتى ايەلدەر ءۇشىن قوسىمشا پەريناتالدىق ورتالىق اشىلدى. سونىمەن قاتار پنەۆمونيامەن اۋىراتىن ناۋقاستاردى ەمدەۋمەن اينالىساتىن مەديتسينالىق مەكەمەلەردىڭ سانى 1-دەن 7-گە دەيىن ارتتى. "ەپيدەميالىق احۋال اسقىنعان جاعدايدا ءبىز تاعى 1،5 مىڭ ورىنعا رەزەرۆ دايىندادىق. ۇلتتىق كارديوحيرۋرگيا عىلىمي ورتالىعى بازاسىنداعى جاتاقحانا مەن قوناق ءۇي ناۋقاستاردى قابىلداي الادى. سونىمەن قاتار توتەنشە جاعداي كەزىنە دايىندالعان قوسىمشا نىساندار بار. ول ءۇشىن ارنايى جابدىقتالعان 800 مەديتسينالىق توسەك ساتىپ الامىز.

الداعى كۇندەرى قالاعا 200، 500 فلۋومەترلەردەن تۇراتىن 50 وكپەنى جاساندى جەلدەتۋ اپپاراتى، 500 وتتەگى كونتسەنتراتورلارى، كومپيۋتەرلىك توموگرافتىڭ ەكى جيىنتىعى كەلىپ تۇسەدى. وسى ايدا قوسىمشا 15 ءوجج اپپاراتى الىندى"، دەدى قالا اكىمى التاي كولگىنوۆ.

رەسپۋبليكالىق تراۆماتولوگيا جانە ورتوپەديا عزي، ۇلتتىق عىلىمي مەديتسينالىق ورتالىق، Green Clinic، باس اسكەري كلينيكالىق گوسپيتالدا ءاربىر ەمحاناعا تىركەلگەن قالا تۇرعىندارى ءۇشىن كت زەرتتەۋىن جۇرگىزۋ مۇمكىندىگى بار. پنەۆمانيانىڭ ەرتە كەزەڭىندە زەرتتەۋ جاسالسا، اسقىنۋعا جول بەرمەۋگە مۇمكىندىك بەرەدى.

سوڭعى جاڭالىقتار

ۇقساس جاڭالىقتار