الەۋمەتتىك مەديتسينالىق ساقتاندىرۋ قورى كس جانە مرت قىزمەتتەرى كىرەتىن بەكىتىلگەن تاريفتەر بويىنشا كونسۋلتاتسيالىق-دياگنوستيكالىق قىزمەتتەردى قارجىلاندىرادى.
بۇگىنگى كۇنى قوردا كت بويىنشا 140-قا جۋىق ءونىم بەرۋشى جانە مرت قىزمەتى بويىنشا 100-گە جۋىق ءونىم بەرۋشى بار. بۇل رەتتە كت ءونىم بەرۋشىلەرىنىڭ ەڭ كوبى نۇر-سۇلتان, الماتى, قاراعاندى, شىعىس قازاقستان, الماتى وبلىستارىندا, مرت ءونىم بەرۋشىلەرى الماتى, شىمكەنت, نۇر – سۇلتان قالالارىندا, جامبىل, تۇركىستان جانە شىعىس قازاقستان وبلىستارىندا بايقالادى.
الايدا بۇل جاعدايدا اۋرۋشاڭدىقتىڭ وسۋىنە بايلانىستى كت-اپپاراتتارىنىڭ جەتىسپەۋشىلىگى بايقالادى. بۇل رەتتە جەكە كلينيكالاردا حالىقتىڭ قالتا شىعىندارىنا اسەر ەتەتىن وكپەنىڭ كومپيۋتەرلىك توموگرافياسىنا باعا ايتارلىقتاي ءوستى. تيىسىنشە ءمامس شەڭبەرىندە وسى قىزمەتتى كورسەتۋ كولەمى تومەندەدى, ويتكەنى ءونىم بەرۋشىلەر ولاردى اقىلى نەگىزدە ۇسىنۋعا مۇددەلى.
"شىنىندا دا, وڭىرلەردە ينفراقۇرىلىمدىق مۇمكىندىكتەرگە قاتىستى پروبلەمالار بار. بۇل ماسەلەلەر قوردىڭ قۇزىرەتىندە ەمەس, بىراق جابدىقتاردىڭ قىمباتتىعىنا بايلانىستى كومپيۋتەرلىك توموگرافيا اپپاراتتارى كوبىنەسە ورتالىق قالالاردا ورنالاساتىنىن تۇسىنەمىز. ازاماتتار ءۇشىن دارىگەرلەر بالاما ۇسىنادى – بۇل ايماقتاردا قولجەتىمدى رەنتگەن-زەرتتەۋ", - دەپ ءتۇسىندىردى الەۋمەتتىك مەديتسينالىق ساقتاندىرۋ قورىندا.
قور كومپيۋتەرلىك توموگرافيا قىزمەتتەرى ساقتاندىرىلعان پاتسيەنتتەرگە ءمامس جۇيەسى اياسىندا امبۋلاتوريالىق دەڭگەيدە تەگىن كورسەتىلەتىنىن ناقتىلادى. ول ءۇشىن ءتيىستى سيمپتومدار بولعان جاعدايدا تىركەلگەن جەرى بويىنشا ەمحاناعا جۇگىنۋ كەرەك. ۋچاسكەلىك دارىگەر ايعاقتاردى انىقتاعان كەزدە, كت-نىڭ تەگىن قىزمەتىنە جولداما بەرەدى. بۇل جاعدايدا ول ءمامس ارقىلى وتەدى جانە قور قاراجاتتى تولەيدى.
ءبىرىنشى توقساننىڭ قورىتىندىسى بويىنشا كت جانە مرت كورسەتىلگەن قىزمەتتەر سانى وتكەن جىلدىڭ ۇقساس كەزەڭىمەن سالىستىرعاندا 5 ەسە, ال قارجىلاندىرۋ كولەمى – 7 ەسە (269 ملن تەڭگەدەن 2 ملرد تەڭگەگە دەيىن) ءوستى.
