قازىرگىدەي جاھاندانۋ زامانىندا ۇلتتىق بولمىسقا دەگەن كوزقاراس وزگەرىپ كەلەدى. دەسەك تە قوعام قاي باعىتقا وزگەرسە دە ۇلتتىق سانانىڭ دەرتكە ۇشىراۋىنا جول بەرىلمەۋى كەرەك. كىتاپحانا الاڭىندا وتكەن كەلەلى اڭگىمەدە وسىنداي رۋحتى تاقىرىپ قوزعالدى.
- ۇلتتىق بولمىسىمىز قانداي؟ ونىڭ قادىرىن ءبىلىپ ءجۇرمىز بە؟ تامىرى تەرەڭ, تۇعىرى بيىك, مارتەبەسى جوعارى – ول, ارينە ءبىزدىڭ ۇلتتىق بولمىسىمىز. ۇلتقا جانى اشىپ, ۇلتتىڭ بولمىسىن جىرلاپ وتكەن ۇلى اباي, دانا مۇحتار, قانىش ساتباەۆ, جامبىل سىندى تۇلعالارىمىزدىڭ وزدەرى نەگە تۇرادى؟ گارۆارد ۋنيۆەرسيتەتىنەن ءبىلىم الماي-اق, وسى كىسىلەر بۇكىل ۇلتتىڭ بولمىسىن عاسىرلار بويى ۇرپاقتان ۇرپاققا ايتىپ, جەتكىزىپ كەتتى. دانالار قالدىرعان سوزدەر تالاي جىلدار قازاق ەلىن سۋسىنداتاتىنىنا كۇمان جوق. دەمەك, تامىرى تەرەڭ بويلاعان ەلدىڭ تۇعىرى قاشان دا بيىك! – دەگەن ىرزا تۇرسىنزادا ەلدىڭ رۋحىن كوتەرىپ, جىگەرلەندىرەتىن ايەل قاۋىمىنىڭ ورنى دا بيىك ەكەنىن تىلگە تيەك ەتتى.
- قوعامدا ايەل قاۋىمىنىڭ ورنى ارقاشان بولەك. ءدال قازىرگى جاعدايدا كوپ كۇش ەر ازاماتتارعا ءتۇسىپ تۇرعانى بەلگىلى. سەبەبى بالا-شاعانىڭ كۇندەلىكتى جەيتىن تاعامى, قارا قازاننىڭ قامى ەرلەردىڭ موينىندا. قيىنشىلىق تۇسكەن سونداي كەزدە ەر ازاماتتارعا قولداۋ كورسەتەتىن ءبىزدىڭ انالارىمىز ەمەس پە؟! تاريحتان بىلەسىزدەر, قازاق انالارىنىڭ يىعىنا تالاي اۋىر جۇك تۇسكەن. سول قيىنشىلىقتى دا جەڭىپ شىققان قازاق ارۋلارى ەدى, دەدى ول.
ايتا كەتەيىك, جاقىندا ىرزا تۇرسىنزادا ەتنوديزاينەرلىككە قاتىستى "Yrza Tursynzada live" يۋتۋب كانالىن اشىپ, تەگىن شەبەرلىك ساباقتارىن جۇرگىزگەن بولاتىن.
