ايماقتار • 06 شىلدە، 2020

باتىس قازاقستان وبلىسىندا دارىگەرلەر ماراپاتتالدى

34 رەت كورسەتىلدى

باتىس قازاقستان وبلىسىندا كوروناۆيرۋس ينفەكتسياسىنا قارسى كۇرەستە جانقيارلىق كورسەتكەن مەديتسينا قىزمەتكەرلەرى مەملەكەتتىك ناگرادالارعا يە بولدى، - دەپ حابارلايدى Egemen.kz

الەمدى ابىگەرگە سالعان covid-19 پاندەمياسى باستالعالى ەڭ اۋىر سالماق دارىگەرلەر قاۋىمىنىڭ يىعىنا ءتۇستى. كۇندىز كۇلكىدەن، تۇندە ۇيقىدان ايىرىلعان اق جەلەڭدىلەر ناۋقاستاردى اجالدان اراشالاپ قالۋ ءۇشىن بىرنەشە ايدان بەرى مايداننىڭ العى شەبىندە ءجۇر.

- بۇگىن سىزدەرگە تابىس ەتىلىپ وتىرعان مەملەكەتتىك ناگرادا – قوعامنىڭ شىنايى قۇرمەتى، اقجۇرەك العىسى دەپ بىلىڭىزدەر. بارشا مەديتسينا قىزمەتكەرلەرى، مەدبيكەلەر، جەدەل جاردەم جۇرگىزۋشىلەرى بىرنەشە ايدان بەرى قاتەرلى ىندەتپەن جان اياماي كۇرەسىپ، مىڭداعان ادامدى اجال اۋزىنان قۇتقاردى. ناۋقاستاردىڭ ومىرىنە ارا ءتۇسىپ، ءوز دەنساۋلىعىن دا تاۋەكەلگە بايلادى. قانداي قيىندىققا قاراماستان گيپپوكرات انتىنا ادال بولدى. ءبىز وسى كوروناۆيرۋسپەن كۇرەستە وزدەرى دە ىندەت جۇقتىرىپ، سىرقاتتانىپ قالعان ارىپتەستەرىڭىزگە تەزىرەك جازىلىپ شىعۋىن تىلەيمىز، - دەدى ءوڭىر باسشىسى عالي ەسقاليەۆ دارىگەرلەرگە ماراپاتىن تاپسىرىپ تۇرىپ.

بۇل كۇنى "پاراسات" وردەنىمەن – باتىس قازاقستان وبلىستىق جۇقپالى اۋرۋلار اۋرۋحاناسىنىڭ ءبولىم مەڭگەرۋشىسى بيبىگۇل ايتباەۆا، "قۇرمەت" وردەنىمەن – وبلىستىق كوپبەيىندى اۋرۋحانانىڭ دارىگەرى مارات بالشامباەۆ، "ەرەن ەڭبەگى ءۇشىن" مەدالىمەن – وبلىستىق جۇقپالى اۋرۋلار اۋرۋحاناسىنىڭ رەانيماتولوگ-دارىگەرى سالاۋات اعداۋوۆ، وبلىستىق كارديولوگيالىق ورتالىقتىڭ دارىگەرى دانيار ارەنوۆ، وبلىستىق جۇقپالى اۋرۋلار اۋرۋحاناسىنىڭ اعا مەدبيكەسى ءاليا ماۋجانوۆا، "شاپاعات" مەدالىمەن – وبلىستىق كوپبەيىندى اۋرۋحانا مەدبيكەسى ءاسيما گاسينا، قازاقستان رەسپۋبليكاسىنىڭ قۇرمەت گراموتاسىمەن – وبلىستىق كارديولوگيالىق ورتالىق مەدبيكەسى ۆەنەرا مىرزاعاليەۆالار ماراپاتتالدى.

باتىس قازاقستان وبلىستىق دەنسۋلىق ساقتاۋ باسقارماسى باسشىسى بولاتبەك قايۋپوۆتىڭ ايتۋىنشا، بۇگىندە وڭىردەگى ەپيدەميولوگيالىق احۋال وتە كۇردەلى. ينفەكتسيالىق جانە پروۆيزورلىق ستاتسيونارلاردا 717 ناۋقاس ەم الۋدا. ونىڭ ىشىندە 92 ناۋقاستىڭ جاعدايى وتە اۋىر. 52 ادام وتتەگى تاپشىلىعىن باسۋ ءۇشىن ارنايى اپپاراتقا مۇقتاج. اۋداندىق اۋرۋحانالاردا پروۆيزورلىق باقىلاۋ ءۇشىن ارنايى كەرەۋەتتەر دايىندالعان، 4 اۋدان ناۋقاستاردى ەمدەۋگە ءازىر. اۋرۋحانالار قاجەتتى ءدارى-دارمەكپەن قامتىلعان، قوسىمشا تاعى جەتكىزىلۋدە.

باتىس قازاقستان وبلىستىق كلينيكالىق اۋرۋحاناسىندا بۇگىندە 20 مەدبيكە، 30 كىشى مەديتسينالىق قىزمەتكەر جەتپەيدى. ورال قالالىق كوپبەيىندى اۋرۋحانادا دا 30 مەدبيكە، 40 كىشى مەديتسينالىق قىزمەتكەر تاپشى. دارىگەرلەر قازىر تاۋلىك بويى قىزمەت ەتۋدە. ىندەتپەن كۇرەستە وڭىردە 700-دەن اسا مەديتسينا قىزمەتكەرى جۇمىسلسا، سونىڭ 150-دەن استامى ۆيرۋس جۇقتىرىپ، اۋىرىپ شىققان.

- مەملەكەتتىك ناگرادا يە بولعان ارىپتەستەرىمدى "بۇگىنگى كۇننىڭ باتىرلارى" دەپ ايتار ەدىم. ولار وزدەرى دە ۆيرۋس جۇقتىرىپ اۋىرىپ ءجۇرىپ، وزگە ناۋقاستارعا كومەكتەسۋمەن بولدى. وتباسىنان وقشاۋلانىپ، ءتورت ايدان بەرى ءوز شاڭىراعىن، جاقىن-جۋىعىن كورمەگەندەر بار. قوعامدى، حالىقتى قاۋىپتى دەرتتەن قۇتقارۋ ءۇشىن عانا ولار وسىنداي قۇرباندىققا بارىپ وتىر. مەملەكەت ولاردىڭ ەڭبەگىن ەسكەرىپ، جالاقىسىنا ۇستەمە قوسىپ، بارلىق جاعىنان قامقورلىق كورسەتۋدە، - دەدى بولاتبەك قايۋپوۆ.

Covid-19 ەڭ الدىمەن دارىگەرلەرگە قاۋىپتى بولعانىن بۇگىنگى شارادان دا اڭعارۋعا بولادى. ويتكەنى ماراپاتتاۋعا شاقىرىلعان 15 ادامنىڭ كوپشىلىگى سالتاناتتى شاراعا قاتىسا الماپتى. ولاردىڭ كەيبىرى اۋىرىپ قالعان، كەيبىرى جۇمىسىنان بوساپ كەلە الماعان.

جاسىراتىنى جوق، ءبىزدىڭ ءوڭىردىڭ دەنساۋلىق سالاسىندا ءتۇيىندى ماسەلەلەر بار. ونىڭ ەڭ ۇلكەنى – مامان تاپشىلىعى. جاقىندا مەديتسينالىق ينستيتۋت، كوللەدج بىتىرگەن ماماندار كەلەدى. اۋرۋحانالاردى مەديتسينالىق جابدىقتارمەن قامتيمىز. ەڭ باستىسى، دارىگەرلەر سىزدەر امان بولىڭىزدار! سىزدەر امان بولساڭىز، جۇرت امان بولادى، - دەدى ءوڭىر باسشىسى عالي ەسقاليەۆ.

باتىس قازاقستان

 

 

سوڭعى جاڭالىقتار

ۇقساس جاڭالىقتار