تاعدىردىڭ تالاي-تالاي تەپەرىشىن كورىپ, سان تاراۋ جولدان وتكەن ەلىمىزدىڭ ءومىرى ازاتتىق دەيتىن اياۋلى ۇعىممەن قايتا تۇلەدى. سول تۇستا ەل تىزگىنىن قولىنا العان ەلباسىمىز سىندارلى شەشىمدەر جاساپ, تاۋەكەلدى قادامدارعا بارا ءبىلدى. شەكارامىز شەگەندەلىپ, ىرگەمىز بەكي ءتۇستى. جۇمىر جەردىڭ بەتىندەگى قازاق دەيتىن قاسيەتتى حالىقتى تۇتاس الەم تانىدى. مادەنيەت, ءبىلىم, ەكونوميكا, سپورت سىندى ۇلت ايبارىنىڭ تەمىرقازىعىنا بالاناتىن سان سالادا تولايىم تابىستارعا قول جەتكىزدىك. وشكەنىمىز جاعىلىپ, جوعالعانىمىز تابىلدى. مۇنىڭ ءبارى جايدان-جاي كەلە قالعان جوق. قاجىرلى ەڭبەك, بەرىك ۇستانىم, كورەگەن شەشىمدەر اسقاق ارمانعا قانات بايلادى. بۇل جەتىستىكتەر تىكەلەي ەلباسىنىڭ ايشىقتى ەڭبەگىمەن استاسىپ, ساباقتاسىپ جاتىر. نيەتى دۇرىس, كوڭىلى وياۋ جۇرت مۇنى كورمەۋى مۇمكىن ەمەس.
نۇرسۇلتان نازارباەۆ ەلدىڭ مادەني ءومىرىن وركەندەتۋگە ەرەن ەڭبەك ءسىڭىردى. تۇڭعىش پرەزيدەنت تۇسىندا «حالىق – تاريح تولقىنىندا», «مادەني مۇرا», «رۋحاني جاڭعىرۋ» سىندى ۇلتىمىزدىڭ تاريحى مەن ونەرىن, مادەنيەتى مەن سالت-ءداستۇرىن جاڭعىرتۋعا ارنالعان مەملەكەتتىك باعدارلامالار قولعا الىندى. ولاردىڭ ىسكە اسۋى كينو مەن تەاتر, ءداستۇرلى مۋزىكا مەن ساۋلەت, بەينەلەۋ ونەرلەرىندە تىڭ سەرپىلىس جاسادى.
ول كىسى ونەر مەن بىلىمگە باي ادام. بۇل ءوز كەزەگىندە ونەر ادامدارىنا ۇلكەن قولداۋ بولدى. ۋاقىتتىڭ اعىسىن, زاماننىڭ جىلدامدىعىن سەزىپ وتىراتىن زەردەلى جان قانشاما تالانتتى ازاماتتىڭ ونەرى مەن ءومىرىنىڭ ورىستەۋىنە جاعداي جاسادى. «ونەر سۇيگەن پاتشا – حالىق بايلىعى» دەگەن ءسوز بار. ءبىر جولى قاسيەتتى قاراشاڭىراعىمىز «اكەم-تەاترعا» ارنايى كەلىپ, جيىرما جاس ارتىسىمىزگە پاتەر كىلتىن ۇلەستىرىپ ەدى. بۇل تاريحتا بولماعان نارسە. ۇلتتىڭ مادەنيەتىن قولداۋ – حالىقتىڭ بولاشاعىن ويلاۋ. سوندىقتان مەن جۇرگەن جەرىمدە ەلباسىنىڭ وسى ءبىر كورەگەندى ءىسىن ۇنەمى ايتىپ جۇرەمىن.
قازاقتىڭ بولمىسىندا ارازداسقاندى تاتۋلاستىرۋ دەيتىن جاقسى قاسيەت بار. مەن وسىناۋ قۇندىلىقتىڭ ورەلى ورنەگىن, سالتاناتتى ۇلگىسىن ەلباسىمىزدىڭ ءىس-ارەكەتىنەن باعامداپ, ناعىز قازاقتىڭ قاسيەت-قالىبىن بويىنا دارىتقان جان دەپ پايىمدايمىن. ءبىر عانا مىسال ايتايىن. باۋىرلاس تۇرىك اعايىندار مەن رەسەي اراسىندا تۇتانعان الاۋىزدىقتى اۋىزدىقتاۋعا ول كىسى قوماقتى ۇلەس قوستى. قوس ەلدىڭ پرەزيدەنتتەرىن بىتىمگەرلىككە شاقىرىپ, الەمگە وزىق ۇلگى كورسەتتى. وسى جاعدايدان كەيىن تۇركيا مەن رەسەيدىڭ مەملەكەت باسشىلارىنىڭ ءبىر-بىرىنە دەگەن رەنىش توڭى ءجىبىپ, ۇلكەن قاۋىپ دەر كەزىندە سەيىلدى. كۇنى بۇگىن ەكى مەملەكەتتىڭ حالقى وسى ءبىر ساليقالى ءىسى ءۇشىن نۇرسۇلتان نازارباەۆقا ءدان ريزا. سەبەبى اراداعى بۇل شيەلەنىس ۋشىعىپ كەتەر بولسا, ەكى مەملەكەتتىڭ دە ەكونوميكاسىنا سالقىنىن تيگىزەر ەدى. ءتىپتى سوعىس ءورتى تۇتانىپ كەتۋى دە ىقتيمال-تۇعىن.
حالىقارالىق ديپلوماتيا اسقان جاۋاپكەرشىلىكتى تالاپ ەتەتىن تىم نازىك سالا. ساباعىن ءۇزىپ الساڭ, قايتىپ ورنىنا كەلتىرۋ مۇمكىن ەمەس. الەم كۇن سايىن وزگەرىسكە ۇشىراپ وتىرعان الماعايىپ داۋىردە مۇنىڭ ءبارىن ءدال تارازىلاۋ پاراساتى مەن پايىمى, اقىلى مەن ءبىلىمى كەمەل باسشىنىڭ عانا قولىنان كەلەتىن شارۋا. جەر-جاھانعا مەملەكەتتىڭ بەيبىت جانە يادرولىق قارۋسىز ساياساتىن پاش ەتىپ, باسقالاردى دا وسى جولدى ۇستانۋعا شاقىرۋ ارقىلى كەڭدىك پەن كەمەلدىكتىكتىڭ كوركەم ۇلگىسىن كورسەتتى. كوپۇلتتى قازاقستاننىڭ ىنتىماعى مەن تاتۋلىعىن نىعايتتى. مەملەكەتىمىز بىرلىك پەن قوعامدىق كەلىسىمنىڭ التىن ۇياسىنا اينالدى. بۇل تۇرعىدان العاندا دا تۇڭعىش پرەزيدەنتىمىزدىڭ قايراتكەرلىك جولى تالايلارعا جاقسى ۇلگى. حالقىمىزدى تانىم مەن تاعىلىمعا شاقىرعان تىڭ باستامالار ءالى دە جالعاسا بەرگەي.
اسقان اسۋ, اتتاعان بەلەس تاريح دەيتىن ۇلى كىتاپقا وشپەستەي بولىپ قاشالدى. قوعام بولعاننان كەيىن, ادامدار جۇرگەن ورتادا قيسىندى-قيسىنسىز ءتۇرلى پىكىرلەر ايتىلا بەرەدى. ءتاي-ءتاي باسقان جاس مەملەكەتىمىزدىڭ وتكەنى مەن بۇگىنىن ءادىل تارازىلايتىن حالقىمىز جارقىراعان جاقسىلىقتى, وسىناۋ جىلداردىڭ بەدەرىندەگى شۋاقتى شاقتاردى كورە بىلسە يگى.
مەرەيلى سەكسەن جاسقا تولىپ وتىرعان تولاعاي تۇلعاعا تەمىردەي بەرىك دەنساۋلىق تىلەيمىن. سىرقاتتانىپ قالدى دەگەندى ەستىپ: «جانىپ تۇرعان وتتىڭ ىشىنەن شىققان ازامات قوي, بۇل سىناقتان سۇرىنبەي وتەر» دەپ ەدىم. كوپتىڭ تىلەۋىمەن دەنەنى دەندەگەن كەسەلدەن قۇلان تازا ايىقتى دەگەندە شىن قۋاندىق. قازاق دەيتىن قاراورمان حالىقتىڭ ارمانىمەن استاسقان, جىرتىعىنا جاماۋ بولعان جىگەرلى جان ءالى دە ەل ءۇشىن ەلەۋلى قادامدارعا بارىپ, مەملەكەتىمىزدىڭ وركەندەۋى جولىندا ەڭبەك ەتە بەرەدى دەپ سەنەمىز. اسىلىمىزدى ارداقتايىق, جاقسىمىزدى قۇرمەتتەيىك. قازاناتتارىمىز تۇعىرلى, ازاماتتارىمىز عۇمىرلى, تاۋەلسىزدىگىمىز باياندى بولعاي!
ءسابيت ورازباەۆ,
قازاقستاننىڭ حالىق ءارتىسى
