راسىندا دا اتالعان ماسەلە وبلىس ءۇشىن بۇگىنگى تاڭدا كۇردەلى بولىپ تۇر. وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ پروۆيزورلىق ستاتسيونارداعى توسەك قورىنىڭ تولتىرىلۋى شامامەن 50 پايىزدى قۇرايتىنىن اتاپ ءوتتى. «دارىگەرلەر از بولعاندىقتان, ناۋقاستاردى قابىلداۋعا ۋاقىتتارى جەتپەۋدە», دەيدى ول. ءوز سوزىندە بەردىبەك ساپارباەۆ ادامدار اۋرۋحاناعا كەلىپ, قابىلداۋ بولىمىندە بىرنەشە ساعات كەزەك كۇتىپ وتىراتىنىن, ناۋقاستارعا قولايلى جاعداي جاساۋدىڭ ورنىنا اۋرۋحانالار ودان سايىن ناشارلاتاتىنىن ايتتى. سوندىقتان دا قابىلداۋ بولىمىندەگى دارىگەرلەر سانىن كوبەيتۋدى تاپسىردى.
جالپى, تۇرعىندار اۋرۋحاناعا جاتقىزىلعان سوڭ دا تيىسىنشە ەم الا المايتىنىنا, ءدارى-دارمەكتەردىڭ جەتىسپەۋشىلىگىنە شاعىمدانۋدا. بۇل رەتتە «سك-فارماتسيا» جاۋاپكەرشىلىگى شەكتەۋلى سەرىكتەستىگى وكىلدىگىنىڭ باسشىسى ايجان تورتاەۆا پنەۆمونيامەن اۋىراتىن ناۋقاستاردىڭ كوبەيۋىنە بايلانىستى جۋىردا 25,3 ميلليون تەڭگەگە شۇعىل ءدارى-دارمەكتەر جەتكىزىلگەنىن اتاپ ءوتتى. ول ءوز سوزىندە مەديتسينالىق ۇيىمداردىڭ ءوتىنىشى بويىنشا ءدارى-دارمەكتەردى جەتكىزۋ جۇمىستارىنىڭ جالعاسا بەرەتىنىن ايتتى. سونداي-اق, تۇرعىندار دارىگەرلەردەن تۋىستارى تۋرالى اقپارات الا المايتىنىن ءجيى ايتادى. ءتىپتى مۇنداي شاعىم وڭىردەگى پروۆيزورلىق ستاتسيونار بولىپ جابدىقتالعان وبلىستىق كوپسالالى بالالار اۋرۋحاناسى دارىگەرلەرىنىڭ دە ۇستىنەن تۇسكەن. اتالعان اۋرۋحانانىڭ باس دارىگەرى ازات ءساتجانوۆ كەمشىلىكتەر بويىنشا جۇمىستار اتقارىلعانىن جەتكىزدى. بۇگىنگى تاڭدا اۋرۋحانادا جەدەل ورتالىق جۇمىس ىستەيدى. «باس دارىگەرلەر كابينەتتە تىعىلىپ وتىرماي, شىعىپ, ادامدارعا قازىرگى جاعدايدى ءتۇسىندىرۋى كەرەك. سونىمەن قاتار, قيىن جاعدايلارداعى ازاماتتاردىڭ دەنساۋلىعىن ساقتاۋ ءۇشىن شۇعىل ناقتى شارالار قابىلداۋى ءتيىس», دەدى بەردىبەك ساپارباەۆ. تۇرعىندار ءۇشىن تاعى ءبىر وزەكتى ماسەلە – جەدەل جاردەمدى كۇتۋ ۋاقىتىنىڭ بىرنەشە ساعاتقا سوزىلاتىندىعى. بۇل ماسەلە دە ايتىلدى. ال, وبلىستىق مەديتسينالىق جەدەل جاردەم ستانتسياسى باس دارىگەرىنىڭ مىندەتىن اتقارۋشى ۇلپان پىحىباەۆا ديسپەتچەرلىك قىزمەت جۇكتەمەسىنىڭ ەكى ەسەگە ارتقانىن جەتكىزدى. «ناۋقاس جەدەل جاردەم قىزمەتىن بىرنەشە ساعات كۇتەتىن بولسا, وندا كەدەرگىسىز مەديتسينالىق كومەك تۋرالى ايتۋدىڭ ءوزى ارتىق شىعار. جەدەل جاردەم بريگادالارىنىڭ سانىن كوبەيتۋ جانە ولاردىڭ جۇمىسىن جۇيەلەۋ قاجەت», دەدى بەردىبەك ساپارباەۆ.
بۇگىندە جەدەل جاردەم ستانتسياسىندا call ورتالىق جانە كەڭەس بەرۋ ورتالىعى جۇمىس ىستەيدى. دارىگەرلەردىڭ كومەگىنسىز تۇرعىندار ءوز بەتىمەن ەمدەلە المايدى. قازىرگى كەزدە ءدارىحانالاردا ۆيرۋسقا قارسى جانە قىزۋ تۇسىرەتىن دارىلەردىڭ جەتىسپەۋشىلىگى بايقالادى. بۇل رەتتە ءدارىحانالار جەلىسىنىڭ وكىلدەرى مۇنداي جاعدايدى تۇرعىنداردىڭ وزدەرى قالىپتاستىرىپ وتىرعانىن ايتتى. ولار ءدارى-دارمەكتەردى ساۋ ادامداردىڭ ساتىپ الىپ جاتقانىن جەتكىزدى. بۇل رەتتە بەردىبەك ساپارباەۆ وبلىستىق دەنساۋلىق ساقتاۋ باسقارماسى مەن وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە حالىق اراسىندا اقپاراتتىق-ءتۇسىندىرۋ جۇمىستارى ءتيىستى دەڭگەيدە جۇرگىزىلمەي وتىرعانىن, سونداي-اق ءدارىحانا جەلىلەرىنىڭ وكىلدەرىنە باعانى شەكتى باعادان جوعارى كوتەرۋگە بولمايتىنىن تاپسىردى.
جامبىل وبلىسى
