بيىلعى جىلدىڭ 26 ماۋسىمىندا قدكبق جەكە تۇلعالاردىڭ جاڭادان تارتىلعان دەپوزيتتەرى بويىنشا ەڭ جوعارى سىياقى مولشەرلەمەلەرىنىڭ مولشەرىن انىقتاۋ جانە بەكىتۋ ادىستەمەسىنە وزگەرىستەر ەنگىزدى. سوعان سايكەس دەپوزيتتەر بويىنشا سىياقىلاردىڭ جوعارعى شەگى بەكىتىلدى. ول بازالىق مولشەرلەمە مەن سپرەدتىڭ قوسىندى سوماسىنا تەڭ. بۇل وزگەرىستەر دەپوزيتتەرگە كەپىلدىك بەرۋ جۇيەسىنە قاتىسۋشى بانكتەرمەن كەلىسىلدى.
جاڭا ەنگىزىلىم بانكتەردىڭ قارجىلىق ورنىقتىلىعىن ساقتاۋ ماقساتىندا جۇيەلىك تاۋەكەلدەردى تومەندەتۋگە باعىتتالعان. بۇل بانكتەردىڭ قور جيناۋ قۇنى مەن پايىزدىق شىعىندارىنىڭ شەكتەن تىس وسۋىنە جول بەرمەي, ولاردى وڭتايلى دەڭگەيدە ۇستاپ تۇرۋعا مۇمكىندىك بەرەدى. پايىزدىق شىعىنداردىڭ شەكتەن تىس ءوسۋى نەسيە بويىنشا پايىزدىق مولشەرلەمەلەردىڭ جوعارىلاۋىنا اكەپ سوعاتىنى بەلگىلى.
سونىمەن دەپوزيتتەر بويىنشا ەڭ جوعارى سىياقى مولشەرلەمەلەرىنىڭ جوعارعى شەگى 14,5 پايىز (بازالىق مولشەرلەمە پليۋس 5 پ.ت.) دەڭگەيىندە بەكىتىلدى. بۇل دەپوزيتتەردىڭ جوعارى تابىستىلىعىن قامتاماسىز ەتۋگە مۇمكىندىك بەرەدى. اتاپ ءوتۋ كەرەك, بانكتەر قارجىلىق جانە ەكونوميكالىق جاعدايلارعا باعا بەرە وتىرىپ, دەپوزيتتەر بويىنشا مولشەرلەمەلەردى رەتتەۋ مۇمكىندىگىنە يە. ەگەر ورتاشا ولشەمدى نارىقتىق مولشەرلەمەلەردى ەسكەرە وتىرىپ ەسەپتەلگەن ەڭ جوعارى سىياقى مولشەرلەمەسى بەكىتىلگەن شەكتەن جوعارى بولسا, ۇسىنىلعان ەڭ جوعارى مولشەرلەمە رەتىندە وسى بەكىتىلگەن شەكتىڭ ءمانى قابىلدانادى. تامىزدا 12 جانە 24 ايعا ارنالعان جيناق سالىمداردىڭ ەڭ جوعارى مولشەرلەمەلەرىتولىقتىرۋعا بولاتىن ءتۇرى بويىنشا – 12,4 جانە 12,3 پايىزدى, ال تولىقتىرىلمايتىن ءتۇرى بويىنشا – 14,5 جانە 14,3 پايىزدى قۇرايدى.
12 ايلىق مەرزىمدى سالىمدار بويىنشا ۇسىنىلعان ەڭ جوعارى مولشەرلەمەلەر بۇرىنعى دەڭگەيىندە قالدى. ەسكە سالامىز, ولار ورتاشا ولشەمدى نارىقتىق سىياقى مولشەرلەمەلەرى نەگىزىندە ەسەپتەلەدى. ال 24 ايلىق مەرزىمدى سالىمدار بويىنشا مولشەرلەمەلەر تومەندەپ, تولىقتىرۋ قۇقىعى بار ءتۇرى بويىنشا – 8,7 پايىز, ال تولىقتىرۋ قۇقىعى جوق ءتۇرى بويىنشا – 9,5 پايىز بولادى. بۇل دەپوزيتتەردىڭ شەكتى سىيقىلارى دا ورتاشا ولشەمدى نارىقتىق سىياقى مولشەرلەمەلەرى نەگىزىندە ەسەپتەلەدى. وسى دەپوزيتتەردىڭ مولشەرلەمەلەرىنىڭ ەلەۋلى تۇردە تومەندەۋى بانكتەر تاراپىنان وعان دەگەن قىزىعۋشىلىقتىڭ تومەندىگىن جانە ەكونوميكالىق تۇرعىدان مولشەرلەمەنى جوعارىلاتۋدىڭ ورىنسىز ەكەندىگىن كورسەتەدى.
تامىز ايىندا مەرزىمسىز جانە قىسقا مەرزىمدى تەڭگەلىك دەپوزيتتەر بويىنشا ۇسىنىلاتىن ەڭ جوعارى مولشەرلەمەلەردىڭ تومەندەۋى – قوردىڭ اعىمداعى جىلدىڭ مامىر ايىندا مولشەرلەمەلەردى بىرتىندەپ تومەندەتۋدى قولعا العان شاراسىنىڭ سوڭعى كەزەڭى. ەسكە سالامىز, قور بۇعان دەيىن تومەندەتىلگەن بازالىق مولشەرلەمەگە قاتىستى سپرەدتى جوعارىلاتىپ, كەيىننەن بىرتىندەپ تومەندەتۋ تۋرالى شەشىم قابىلداعان بولاتىن. بۇل شارا تومەندەتىلگەن بازالىق مولشەرلەمە دەپوزيتتەردىڭ وسى ساناتىنا جانە جالپى دەپوزيت نارىعىنا كەرى اسەر ەتپەۋى ءۇشىن قاجەت بولدى.
تامىز ايىندا تەڭگەدەگى مەرزىمسىز دەپوزيتتەر بويىنشا ماكسيمالدى مولشەرلەمەلەر جىلىنا 9,5 پايىز دەڭگەيىندە بەكىتىلدى. بۇل قر ۇلتتىق بانكىنىڭ بازالىق مولشەرلەمەسىنە سايكەس كەلەدى. ەسكە سالامىز, بازالىق مولشەرلەمە اقشانىڭ قىسقا مەرزىم ىشىندەگى قۇنىن بىلدىرەدى جانە ىشكى جانە سىرتقى ەكونوميكالىق فاكتورلاردى ەسكەرە وتىرىپ بەكىتىلەدى.تولىقتىرۋ قۇقىعى بار, 3 جانە 6 ايعا ارنالعان مەرزىمدى دەپوزيتتەر بويىنشا شەكتى مولشەرلەمەلەر – 9,5 پايىزدى, تولىقتىرىلمايتىن ءتۇرى بويىنشا – 10,0 پايىزدى قۇرايدى. وسى مەرزىمدەگى جيناق سالىمداردىڭ تولىقتىرىلاتىن تۇرىنە قاتىستى شەكتى مولشەرلەمەلەر – 10,5 پايىزدى, تولىقتىرىلمايتىن ءتۇرى بويىنشا – 11,0 پايىز بولادى.
