ايماقتار • 02 شىلدە، 2020

ورالدا بوبروۆ تىنىس الۋ اپپاراتى قۇراستىرىلادى

101 رەت كورسەتىلدى

باتىس قازاقستان وبلىسىندا كوروناۆيرۋس ىندەتىمەن كۇرەستى كۇشەيتۋ ماقساتىندا ارنايى جيىن ءوتتى. ءوڭىر باسشىسى عالي ەسقاليەۆ مەديتسينا ارداگەرلەرىمەن، دەنساۋلىق ساقتاۋ جانە ەمدەۋ مەكەمەلەرى باسشىلارىمەن وسى ماسەلەنى تالقىلادى، - دەپ حابارلايدى Egemen.kz. 

وڭىردە ءدارى-دارمەك تاپشىلىعىن ازايتۋ ءۇشىن «تالاپ» اق ءدارىحانالارىنا 300 مىڭ پاراتسەتامول، 45 مىڭ پاكەت اتسەتيلساليتسيل قىشقىلى، "ستوفارم" جشس ءدارىحانالارىنا 2 مىڭ تسەفترياكسون، 1 مىڭ دانا تسەف3، 150 دانا №50 گروپرينوسين الىندى. 4 شىلدە كۇنى "مەدسەرۆيس پليۋس" جشس-نە 75 300 دانا انتيبيوتيك جەتكىزىلەدى.

2020 جىلدىڭ 10 شىلدەسىنە دەيىن وبلىسقا پاراتسەتامول، اتسەتيلساليتسيل قىشقىلى، انالگين، انتيبيوتيكتەردىڭ قوسىمشا پارتياسى جەتكىزىلەتىن بولادى.

سونداي-اق، قازاقستاننىڭ رەسەيدەگى ەلشىلىگى ارقىلى رەسەيلىك وندىرۋشىلەرمەن انتيپيرەتيكالىق، قابىنۋعا قارسى پرەپاراتتار مەن انتيبيوتيكتەردى جەتكىزۋ بويىنشا كەلىسسوز جۇرگىزىلۋدە. بەلارۋس رەسپۋبليكاسىنىڭ بوريسوۆ زاۋىتىمەن كەلىسىم جاسالعان.

حالىقتى ءدارى-دارمەكپەن قامتاماسىز ەتۋ ءۇشىن نەگىزگى ءدارىحانالاردىڭ يەلەرىمەن ءدارى-دارمەكتى بەلگىلەنگەن باعامەن جانە ءبىر ادامعا 5 دانادان ارتىق ساتپاۋ تۋرالى كەلىسىم جاسالدى. ءدارىحانالاردا باكتەرياعا جانە ۆيرۋسقا قارسى پرەپاراتتار دارىگەردىڭ كەلىسىمى بويىنشا ساتىلادى.

سونىمەن قاتار، قالالىق ءدارىحانا جەلىلەرىندە ءدارى-دارمەك باعاسىن نەگىزسىز وسىرۋشىلەردى انىقتاۋ ماقساتىندا ارنايى جۇمىس توبى رەيد ۇيىمداستىرىپ ءجۇر. وسىنىڭ ناتيجەسىندە "ماۋتوۆا ا.ج." جانە "ي.پ.سۋلتانبەكوۆا" ءدارىحانالارىندا شەكتى باعانى كوتەرۋ فاكتىسى انىقتالعان. ال ءوڭىر دارىحانالارىنداعى ءدارى-دارمەك بويىنشا اقپارات www.stopcovid.kz سايتىنا جاريالانادى.

دەنساۋلىق ساقتاۋ باسقارماسىنىڭ مالىمەتىنشە، وڭىردەگى مەديتسينالىق ۇيىمدار ءدارى-دارمەكپەن تولىق قامتاماسىز ەتىلگەن. كوروناۆيرۋس ينفەكتسياسى بار ناۋقاستاردى ەمدەۋ ءۇشىن ايماقتاعى بارلىق مەديتسينالىق مەكەمەلەر انتيپيرەتيكالىق، ۆيرۋسقا قارسى پرەپاراتتار مەن انتيبيوتيكتەرمەن قامتىلعان.

بۇگىنگى تاڭدا جەدەل جاردەم ستانتسياسىندا 63 تەحنيكا قىزمەت ەتۋدە. الداعى قىركۇيەك ايىندا جاڭادان 35 رەانيموبيل مەن 2 جەدەل جاردەم كولىگى الىنباق.

جەرگىلىكتى كاسىپكەرلەردىڭ قولداۋىمەن كوپبەيىندى قالالىق اۋرۋحانادا قوسىمشا 140 ورىندىق ينفەكتسيالىق اۋرۋحانا اشىلاتىن بولدى. بۇعان دەيىن كارانتيندىك اۋرۋحانا رەتىندە پايدالانۋعا جوسپارلانعان وبلىستىق اۋرۋحانانىڭ ءىى كورپۋسىندا 130 ورىندىق پروۆيزورلىق اۋرۋحانا اشىلادى. سونداي-اق، بۇرىنعى №2 پەرزەنتحانا بازاسىندا قوسىمشا اۋرۋحانا جانە قپو قاراجاتى ەسەبىنەن جۇقپالى اۋرۋلار اۋرۋحاناسىن اشۋ ماسەلەسى قاراستىرىلۋدا. بۇعان قوسا، اۋداندارداعى جۇقپالى اۋرۋلار اۋرۋحانالارىندا كەرەۋەت سانىن كوبەيتۋ جۇمىسى باستالعان. تاجىريبەلى مەديتسينا قىزمەتكەرلەرىن ونلاين كەڭەس وتكىزۋ شارالارىنا تارتۋ كەلىسىلدى. ناۋقاستاردى ۇيىنە بارىپ جوسپارلى ەمدەۋ ءۇشىن ەمحانالارعا 12 اۆتوموبيل بولىنەتىن بولدى.

وڭىردەگى قازىرگى ەڭ ۇلكەن ماسەلە – كادر تاپشىلىعى جانە وتتەگى كونتسەنتراتورىنىڭ جەتىسپەۋشىلىگى بولىپ وتىر.

دارىگەرلەرگە جۇكتەمەنى ازايتۋ ءۇشىن ورال قالاسىنداعى جوعارعى مەديتسينالىق كوللەدجدەگى فەلدشەرلەر مەن مەدبيكەلەردى جەدەلدەتىپ وقىتۋ قولعا الىندى. سونداي-اق، ەلىمىزدىڭ باسقا قالالارىنان ۋنيۆەرسيتەت تۇلەكتەرى كەلەدى دەپ كۇتىلۋدە.

وسى كەڭەستە ايتىلعان جاڭالىق – الداعى 10 كۇن ىشىندە ورالداعى كاسىپورىنداردىڭ بىرىندە بوبروۆتىڭ موديفيكاتسيالانعان تىنىس الۋ اپپاراتتارىن قۇراستىرۋ جولعا قويىلاتىنى بەلگىلى بولدى.

ءوڭىر باسشىسى عالي ەسقاليەۆ مەديتسينا ارداگەرلەرى مەن جەكەمەنشىك مەديتسينالىق مەكەمە باسشىلارىن ورتاق قاۋىپ-قاتەرگە بىرلەسە قارسى تۇرۋعا شاقىردى.

"قازىر ءبىز ءۇشىن كەز-كەلگەن كومەك ماڭىزدى. بىزگە ماماندار، عيماراتتار، دەمەۋشىلىك قاجەت. ماسەلە ورتاق جانە ونى بىرگە شەشۋ كەرەك"، - دەدى عالي ەسقاليەۆ.

سوڭعى مالىمەت بويىنشا باتىس قازاقستان وبلىسىندا كوروناۆيرۋستىڭ سيمپتومدى تۇرىنە 1547 ادام، سيمپتومسىز تۇرىنە 1338 ادام شالدىققان. 66 ناۋقاستىڭ جاعدايى اۋىر. اۋرۋعا شالدىققان 21 ءسابيدىڭ جاعدايى ورتاشا دەڭگەيدە. جاساندى وكپە جەلدەتكىشىنە 13 ادام قوسىلعان. بۇگىنگە دەيىن كوروناۆيرۋستان وبلىستا 10 ناۋقاس قايتىس بولدى.

 

باتىس قازاقستان

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار