اۋرۋ اسقىندى: ءدارى جوق, ماسكا قىمبات

بۇگىنگى تاڭدا جامبىل وبلى­سىندا كوروناۆيرۋس ىندەتىن جۇق­تىرۋدىڭ 693 سيمپتومدى دەرەگى تىركەلگەن. بۇل 100 مىڭ تۇرعىنعا شاققانداعى كورسەتكىش 59,9 پا­يىز­دى قۇرايدى. سونىمەن قاتار, وڭىردە ىندەتتىڭ 683 سيمپتومسىز جاعدايى انىقتالعان. بۇگىنگى تاڭدا ينفەكتسيالىق ستاتسيوناردا 272 ناۋقاس ەم الۋدا. دەگەنمەن جامبىل وبلىسى بويىنشا تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ باسشىسى بەرىك جارقىنبەكوۆتىڭ ايتۋىنشا, ستاتيستيكا كوڭىل كون­شىت­پەيدى. ەگەر 15-21 ماۋ­سىم ارالىعىندا وڭىردە 317 جاع­داي انىقتالسا, 22-28 ماۋسىم ارالىعىندا 473-ءتى قۇراعان. ناۋ­قاستاردىڭ 60 پايىزى تاراز قالاسىندا تىركەلگەن. ءتىپتى دەپارتامەنت باسشىسى كورسەتكىشتىڭ ناشارلاۋىنا كارانتيندىك شارالاردى جەڭىلدەتۋ جانە ەپيدەمياعا قارسى شارالار الگوريتمدەرىنىڭ ساقتالماۋى دا اسەر ەتكەنىن ايتتى. «ەپيدەميولوگيالىق توپتاردىڭ جۇكتەمەسىنىڭ اۋىرلىعىن ەسكەرە وتىرىپ, تۇرعىندارعا مەديتسينا قىزمەتكەرلەرى مەن ەپيدەميولوگتار جەتكەنگە دەيىن بارلىق ساقتىق شارالارىن ساقتاۋدى ۇسىنامىز. اتاپ ايتساق, ءوزىن ءوزى وقشاۋلاۋ, تەمپەراتۋرانى ولشەۋ, دەنساۋلىق جاعدايىن باقىلاۋ, قاجەت بولعان جاعدايدا اۋماقتىق دارىگەردى شاقىرتۋ, جۇمىسقا شىق­پاۋ قاجەت», دەيدى بەرىك جار­قىنبەكوۆ. دەگەنمەن اتالعان تالاپتاردى دا تولىعىمەن ورىندالىپ وتىر دەۋگە كەلمەيدى.

بۇگىندە قالىپتاسىپ وتىرعان قيىن جاعدايعا بايلانىس­تى قايتادان ناقتى شارالار قا­بىل­داۋ قاجەتتىگى تۋىنداۋدا. ماسەلەن, جۋىردا تاراز قالا­سىنىڭ ىشىندە قوعامدىق كو­لىك­­تەر قايتا جۇرە باستادى. الايدا ونىڭ بەكىتىلگەن ءتار­تى­بى تولىعىمەن ورىندالىپ وتىر­عان جوق. جولاۋشىلاردىڭ اراقاشىقتىعى ساقتالماۋى ءوز الدىنا, كولىك ىشىندە مەديتسينالىق ماسكا تاعىپ وتىرعانداردىڭ دا از ەكەنىن بايقاۋعا بولادى. مۇنداي جاعدايلاردىڭ ءبارى دە ىندەتتىڭ ودان ءارى تارالۋىنا اكەلىپ سوقتىراتىن كورىنىس. ال بۇگىندە قوس وكپەسى قىسىپ, دەنە قىزۋى كوتەرىلىپ, ناۋقاستانىپ جاتقان ادام كوپ. بىراق قازىرگى تاڭدا ءوڭىر ءدارىحانالارىندا ۆيرۋسقا قارسى جانە دەنە قى­زۋىن تۇسىرەتىن دارىلەردىڭ جەتىس­پەۋشىلىگى ورىن الۋدا. بۇل دا جەر­گىلىكتى حالىق ءۇشىن وزەكتى بولىپ تۇر. جامبىل وبلىسىنىڭ اكىمى بەردىبەك ساپارباەۆ بۇل رەتتە اتالعان ماسەلەنى شەشۋ ءۇشىن جاۋاپتى مەكەمەلەر سالالىق مينيسترلىكپەن, «سك-فارماتسيا» كومپانياسىنىڭ وكىلدەرىمەن بىر­لەسىپ جۇمىس ىستەۋى كەرەكتىگىن ايتۋدا. سونىمەن قاتار حالىق اراسىندا ءتۇسىندىرۋ جۇمىستارىن جۇرگىزىپ, جوق پرەپاراتتاردىڭ انا­لوگتارى تۋرالى حاباردار ەتۋ قاجەتتىگىن دە ەسكەرتۋدە. ال ەل ابىگەرگە ءتۇسىپ, قاۋىپتى ىندەتتە­ن قۇتىلاتىن كۇندى تىلەپ وتىر­عاندا وبلىستىڭ مويىنقۇم, سا­رىسۋ جانە ت.رىسقۇلوۆ اۋداندارىندا مەديتسينالىق ماسكا­لاردىڭ بەلگىلەنگەن باعادان قىمباتقا ساتىلىپ جاتقاندىعى انىقتالعان. بۇل دا قاداعالاۋدىڭ كەمشىندىگىنەن ورىن الاتىن جايتتار.

اتىشۋلى ىندەتتى اۋىزدىقتاۋ ءۇشىن جان-جاقتى شەشىمدەر مەن ناقتى ءىس-ارەكەتتەردىڭ قاجەت ەكەن­دىگىن ۋاقىتتىڭ ءوزى كورسەتىپ وتىر. ماسەلەن, ءدارىحانالاردا قاجەتتى دارىلەردىڭ جانە مەديتسينالىق ماسكالاردىڭ جەتىسپەۋشىلىگى, نە بولماسا قىمباتتىعى قاراپايىم حالىق ءۇشىن كادىمگىدەي كۇردەلى ماسەلە. ءتىپتى قاجەتتى دۇنيەلەردى قولدان قىمباتتاتۋ كىم-كىمگە دە جىعىلعان ۇستىنە جۇدىرىق بولعانداي اسەر ەتەدى. سونداي-اق ناۋقاستار ءۇشىن جاتىن ورىندار مەن دارىگەرلەردىڭ جەتىسپەۋشىلىگى سياقتى ماسەلەلەر دە ءوزى ءۇمىت پەن ۇرەيدىڭ قۇشاعىندا جۇرگەن حالىق ءۇشىن وڭاي ەمەس. ءتىپتى بەردىبەك ساپارباەۆتىڭ ءوزى دە ادامداردىڭ جەدەل جاردەم جۇمىسىنا جانە اۋرۋحانالاردا ورىنداردىڭ جوقتىعىنا قا­تىستى شاعىمدانۋدا ەكەنىن ايت­قان. سول سەبەپتى دە وڭىردە مەديتسينا قىزمەتكەرلەرىنىڭ جەتىسپەۋشىلىگىنە بايلانىستى رەزيدەنتۋرادا وقيتىن ستۋدەنتتەردى جانە زەينەت جاسىنداعى دارى­گەرلەردى جۇمىسقا تارتۋ ما­سەلەلەرى سارالانۋدا. وبلىس­تىق دەنساۋلىق ساقتاۋ باسقارما­سىنىڭ باسشىسى مارات جۇمان­قۇلوۆتىڭ ايتۋىنشا, بۇل باعىت­تاعى جۇمىستار قازىردىڭ وزىندە جۇرگىزىلىپ جاتىر ەكەن. توسەك سانىن كوبەيتۋ بويىنشا دا شارالار قابىلداناتىن بولادى.

بۇگىندە دۇنيەگە دۇربەلەڭ تۋدىرىپ, جاھاندى جاي وتىنداي شارپىپ كەلە جاتقان كوروناۆيرۋس ىندەتىنەن بارىنشا ساقتانۋ ءاربىر ازاماتتىڭ مىندەتى. بۇل كۇندە وڭىردە اۆتوبۋس ايالدامالارى مەن حالىق كوپ جينالاتىن جەرلەرگە ۇنەمى دەزينفەكتسيالىق وڭدەۋ جۇرگىزىپ وتىرۋ قاجەتتىگى ءجيى ايتىلۋدا. سونىمەن قاتار تەحنولوگيالىق پروتسەسكە قاتىسى جوق مەملەكەتتىك ورگاندار مەن مەكەمەلەر قىزمەتكەرلەرىنىڭ 80 پايى­زىن قاشىقتان جۇمىس ىستەۋگە اۋىستىرۋ ماسەلەسى دە تال­قىلانعان. الايدا بۇل شا­را­لاردىڭ قاشان ىسكە اساتىنىن ۋاقىت كورسەتەدى. بۇگىنگى تاڭ­دا جامبىل وبلىسى بويىن­شا 45 مونيتورينگ توبى سا­ني­تارلىق-ەپيدەميالىق تا­­لاپتاردىڭ ساقتالۋىن تەكسەرۋ­دە. ناتيجەسىندە, 3268 نىسان تەكسەرىلىپ, كارانتين تالاپتارىن بۇزعانى ءۇشىن 66 حاتتاما تولتىرىلعان. سونداي-اق 59 ءىس بويىنشا ماتەريالدار سوت­قا جولدانعان. جالپى, بۇگىندە اكىم­دىك تاراپىنان تۇرعىندار اراسىندا ءتۇسىندىرۋ جۇمىستارى ءتيىستى دەڭگەيدە جۇرگىزىلمەيدى. دەسەك تە, ءاربىر تۇرعىن ءوز ومىرىنە ءوزى جاۋاپتى ەكەنىن ۇمىتپاعانى ءجون. ءتىپتى ۇيىندە بەتاشار جاساپ, قوناق كۇتكەن تالاي ادامداردىڭ جاسىرىن ارەكەتى اشكەرە بولعان. سوندىقتان دا ءاربىر ادام ءوز تاعدىرىنىڭ تىزگىنشىسى ەكەنىن ەستەن شىعارماعان دۇرىس.

جامبىل وبلىسى