«اكسەلەراتسيانىڭ العاشقى قادامىنان وتكەن 39 جوبانىڭ جيىرماسى تاڭدالىپ الىندى. ەندى ولار اكسەلەراتسيانىڭ تولىق باعدارلاماسىنان ءوتىپ, ەلىمىزدىڭ ءار ايماعىندا جۇزەگە اسۋى ءۇشىن جۇمىس جۇرگىزەدى. بۇگىندە اكسەلەراتورلاردىڭ الدىندا ءۇش باستى مىندەت تۇر. ياعني دايىن جوبالارعا ساراپتىق جانە ادىستەمەلىك كومەك كورسەتۋ, وعان ينۆەستيتسيالار تارتۋ جانە وسى جوبالاردى جان-جاقتى تاراتىپ, اياسىن كەڭەيتۋ كوزدەلىپ وتىر», دەدى جوبا كۋراتورى, «رۋحاني جاڭعىرۋ» قازاقستاندىق قوعامدىق دامۋ ينستيتۋتى ساراپتاۋ جانە ادىستەمەلىك قامتاماسىز ەتۋ باسقارماسىنىڭ جەتەكشىسى ليۋدميلا بۋرلاچەنكو.
ونىڭ ايتۋىنشا, «وزگەرىستىڭ ءسارۋارلارى» جوباسىنىڭ قاتىسۋشىلارى ءبىلىم, مادەنيەت, ينكليۋزيا, ەكولوگيا باعىتتارى بويىنشا ءتورت توپقا بولىنگەن.
ء«بىز تەك ءوز كاسىپتەرىنەن تابىس تاۋىپ وتىرعانداردى ەمەس, الەۋمەتتىك ماڭىزى بار, قوعامعا تيگىزەر پايداسى مول جوبالاردى قولدايمىز. ءار جوبا «رۋحاني جاڭعىرۋ» باعدارلاماسىنىڭ باستى ۇستانىمدارىنا سايكەس كەلەدى. ناقتى ايتقاندا, اتالعان جوبالار بارلىق قۇندىلىقتاردى ساقتاي وتىرىپ, ءوز سالاسىندا ۇزدىك بولۋى ءتيىس, سونداي-اق يننوۆاتسيالىق تۇردە ۇنەمى ۇزدىكسىز دامۋى قاجەت. قازىردىڭ وزىندە قازاقستاندى حالىقارالىق نارىقتا العا جەتەلەپ, اتىن قالىپتاستىرعان برەندتەر بار», دەپ اتاپ ءوتتى ليۋدميلا بۋرلاچەنكو.
ماسەلەن, سونداي جوبالاردىڭ ءبىرى – «Aspara Fashion week». مادەنيەت سالاسىندا جۇزەگە اسىپ جاتقان بۇل جوبا fashion-يندۋستريا تاريحىندا ءبىرىنشى رەت حالىقارالىق دەڭگەيدە ونلاين ءسان اپتالىعىن وتكىزىپ جاتىر.
ءبىلىم بەرۋ سالاسىندا «Open English» جوباسى دا ەرەكشە نازار اۋدارتادى. بۇل الەۋمەتتىك جوبادا ەرىكتى جاستار جوعارى سىنىپ وقۋشىلارىنا اعىلشىن ءتىلىن ۇيرەتەدى. سونىمەن قاتار ەرىكتى جاستاردى باسقارۋ تەحنولوگياسىنىڭ زاماناۋي ۇلگىلەرىنە بەيىمدەپ, كوشباسشىلىق قاسيەتتەرىن ارتتىرادى جانە الداعى ۋاقىتتا جۇمىسقا ورنالاسۋ ماسەلەسىن دە جەڭىلدەتەدى.
جيىرما جوبانىڭ سەگىزى ينكليۋزيۆتى سالاعا ارنالادى. ونى وسى باعىتتاعى تاجىريبەسى مول «بولاشاق», «سالاماتتى بولاشاق», «زامانداس» قورلارى جانە ەندى عانا قۇرىلعانىمەن الەۋمەتتىك سالاعا يننوۆاتسيالىق كوزقاراسىمەن ەنگەن «Altyn bala» كاسىپكەرلەرى جۇزەگە اسىرماق. بۇدان بولەك, ينكليۋزيۆتى باعىت بويىنشا «Kunde» جانە «Emoji» الەۋمەتتىك كافەلەرى جۇمىس جاساپ جاتىر.
«اكسەلەراتورلار جۇمىسىنىڭ باستى ەرەكشەلىگى رەتىندە ءار جوباعا جەكە توقتالىپ, تىڭعىلىقتى كوڭىل بۇراتىنىن ايتۋعا بولادى. ساراپشىلاردىڭ 3 اي ىشىندە اتقارعان جۇمىسى ارقىلى اتالعان جوبالار جان-جاقتى دامۋى ءۇشىن زور قولداۋعا قول جەتكىزدى», دەدى ليۋدميلا بۋرلاچەنكو.
