قوعام • 01 شىلدە، 2020

اۋلالارداعى احۋال

29 رەت كورسەتىلدى

اۋا جايىلىپ، ۇدەپ بارا جاتقان ىندەت قارقىنى كىسى شوشىرلىقتاي. قاي جاعىنان دا وڭاي سوقپاي، قۇربانى دا از بولماي تۇر. كۇندەلىكتى اقپاراتتى مايدان دالاسىنان كەلگەن مالىمەت دەرسىڭ، - دەپ جازادى Egemen.kz.

راسىمەن ۆيرۋس بيلىك قۇرىپ، ىندەت ءورشىپ تۇرعاندا جايماشۋاق حابار قايدان بولسىن. ناعىز ءبىر ەس جيىپ، ءوزىڭنىڭ دە، ماڭايىڭنىڭ دا، تۋعان-تۋىس، اۋىل-ايماق، كورشى-كولەمىڭنىڭ دە قاۋىپسىزدىگىن ويلار شاق تۋدى. ويتكەنى اۋرۋ جاس تاڭداپ، ءالى بالعىن بالاۋسا ەكەنسىڭ، سەنى اينالىپ وتەيىن دەپ نەمەسە سەن بايسىڭ، سەن كەدەيسىڭ دەپ  اجىراتپايدى، جىنىسىنا دا قاراپ جاتقان جوق.

ال وسىنداي ەل ءۇشىن، ۇلت ءۇشىن الماعايىپ كەزەڭ تۋعاندا اركىم اق ويلانۋى ءتيىس قوي. بىراق تەرەزەدەن اۋلاعا كوز تىكسەڭ ولاي دەپ ايتا المايسىڭ. ءورىپ جۇرگەن ادام، ۋ-شۋ بولىپ ويناعان بالا. انا ءبىر تەمىر اتكەنشەككە كۇنىنە قانشا بالا  وتىرىپ، قانشا ەرەسەك ۇستاپ تەربەتتى. ال تەمىر، پلاستيك بەتىندە ۆيرۋس ساقتالۋ قاۋىپى بىرنەشە تاۋلىككە بارادى ەمەس پە؟

وزگە قالالاردى قايدام، ال ەلوردادا ءاربىر ءتورت-بەس ۇيلىك ورامادا دەنە جاتتىعۋلارىنا ارنالعان  قانشاما قۇرىلعىلار بار. بۇرىن ۆيرۋس جوقتا سونىڭ بارلىعى ۇلكەن قۋانىش ەدى. كۇنىنە ءبىر مەزگىل شىعىپ، بويداعى قۇرىس-تىرىستى جازىپ، قيمىلداپ، ۇيگە ءبىر قىرۋار شارۋا تىندىرعانداي كىرەتىن ەدىك. قازىر جاقىنداۋعا قورقاسىڭ. ول جەر كادىمگى قۇمىرسقانىڭ يلەۋىندەي، ادام قۇجىناپ ءجۇر.

كەشە نان الۋعا اۋلاداعى دۇكەنگە شىقتىم. الگى جەردە ويناپ جۇرگەن ءبىر بالانىڭ قولىندا نە قولعابى، نە اۋزى-مۇرنىن جاپقان تۇمشاسى جوق. انالارى اۋزىن جاۋىپ، مۇرنىن اشىپ قويىپ جايباراقات وتىر. كوز الدىمدا تالاي ادام ۇستاپ كەتكەن تەمىردەن قولىن جاڭا عانا بوساتقان بالا كوزىن ۋقالادى. جانىم شىعىپ كەتە جازدادى. بالام، سەن قازىر اۋرۋ بار ەكەنىن بىلەسىڭ بە؟ مىنا تەمىردى ۇستاعان قولىڭمەن ەشقانداي زالالسىزدانباستان كوزىڭدى ۋقالاپ جاتسىڭ، تەز ۇيىڭە بارىپ بەتى قولىڭدى دۇرىستاپ سابىنداپ جۋ دەدىم. بۇل ءبىر ساتتە شىققاندا كۋا بولعانىم عانا. ال كۇنىنە سوندايدىڭ قانشاماسى ءوتىپ، قانشا بالا ۆيرۋس جۇقتىرۋ قاۋىپىنە ۇشىراپ جاتىر. سوندا اتا-انا ءۇشىن بالا ءومىرىنىڭ ماڭىزدى بولماعانى ما؟ ءسىرا بۇل ۇلكەننىڭ جاۋاپسىزدىعى. باۋىر ەتىنە قولىنا قولعاپ كيگىزىپ، بەتىن تۇمشالاپ، انتيسەپتيگىن بەرىپ شىعارۋدىڭ ءوزىنىڭ قاۋىپى بار، ال ال جالاڭاش، ەشتەڭەمەن قارۋلاندىرماي، بالاعا كوزىڭە قولىڭدى تيگىزبە، اۋىزىڭا ساق بول، اۋلادا ەشتەڭەنى اۋزىڭا سالما دەمەي تاۋەكەل ەتىپ قويا بەرۋ ەش اقىلعا سىيمايدى –اۋ، سىيمايدى. كوزسىز ەرلىك پە، الدە مۇلدەم ەش نارسەنىڭ پارقىنا بويلاپ ويلاي المايتىن ەسسىزدىك پە؟

بالالار ءبىر-بىرىمەن اسىر سالىپ ويناپ جاتقاندا ەڭ بولماعاندا كوز سالىپ قويسايشى. ءۇش كەلىنشەكتىڭ اڭگىمەلەرى قىزعان، بالاعا قارار شاما جوق. كۇنىنە قانشا ادام اۋىرىپ جاتقانىن، ۆيرۋستىڭ اۋادان جىبەرىلىپ جاتقانىن اڭگىمە ەتۋدە. دۇكەنگە جۇگىرىپ كىرىپ شىققان بالا تاتتىلەر الىپ، ويىن الاڭىندا تۇرىپ ءوزى جەپ، جانىنداعى دوستارىنا بەرىپ جاتىر. ەشقايسى قولىن سپيرتپەن سۇرتپەدى، ويتكەنى قامسىز اتا-انا ويىنعا شىققاندا قالتاسىنا سالۋدى قاداعالاماسا قايدان بولسىن. قولدارىنا ءتاتتى تۇسكەندەرىنە ءماز. اۋاسى جەلدەتىلمەيتىن ول دۇكەنگە كۇنىنە قانشا ادام كىرىپ شىقتى، قايسى ساۋ، قايسى ءوزى بىلمەي اۋرۋ جۇقتىرىپ ونى تاراتىپ ءجۇر؟ كىم بىلەدى؟ قازاقتىڭ "قۇداي دا ساقتانساڭ، ساقتارمىن" دەگەن دانىشپاندىعىن باسشىلىققا الاتىنى قايدا قالعانى بەلگىسىز. ايتەۋىر اۋلا بىتكەندە قامسىز جۇرگەن حالىق. ءتىپتى كوپ قاباتتى ۇيلەردىڭ جەدەلساتىسىنىڭ ىشىنە كىرۋ دە قاۋىپسىز ەمەس. بالالار بولسا سونىمەن تۇمشاسىز نەشە رەت كوتەرىلىپ، نەشە رەت تومەن ءتۇسىپ ءجۇر. ويلاۋدىڭ ءوزى قورقىنىشتى.

تەرەزەدەن قاراپ تۇرمىن. انە، اۋلاعا "جەدەل جاردەم" كەلىپ توقتادى. ىشىنەن اپپاق كيىمدى باس-اياعى تەگىس تۇمشالانعان مەديتسينا قىزمەتكەرلەرى ءتۇستى. جىلدام باسىپ ىشكە ەنىپ بارادى. ۇلكەندەرسىز وزدەرى عانا ويناپ جۇرگەن بالالار اڭتارىلىپ شامالى تۇردى دا ويىندارىن ءارى قاراي جالعاستىرا بەردى. ال سول ماڭايدا وتىرعىشتا وتىرعاندار جەدەل ورىندارىنان تۇرىپ، بالاسىن قولدارىنان جەتەكتەپ ۇيلەرىنە كىرىپ بارادى. قالعان بالالار قالا بەردى. «جەدەل جاردەم» كەلگەنىن كوزدەرىمەن كورگەندەر بالالارىن اۋلاعا قايتىپ شىعارا ما بىلمەيمىن، ال انا ويناپ جۇرگەندەر قاپەرلەرىنە دە قىستىرعان جوق. بالكىم تۇرعىن ءۇي باسقارمالارىنا قاي ۇيدە اۋرۋ بارلىعى جايىندا مالىمەت ءتۇسىپ، ونى ولار ءار ءۇيدىڭ اۋلاسىنا حابارلاندىرۋ ءتارىزدى كۇندەلىكتى جاڭالاپ، ءىلىپ قويۋلارى كەرەك شىعار. ايتەۋىر ەلدى قۇلاقتاندىرىپ، اياقتارىن تارتاتىنداي ەتكىزەتىن امال كەرەك!

نە بولسا دا اۋلالارداعى احۋال قاتتى الاڭداتادى.

سوڭعى جاڭالىقتار

ۇقساس جاڭالىقتار