COVID-19-عا قارسى شارالاردى ۇيلەستىرۋگە ارنالعان جەدەل شتابتىڭ ءباسپاسوز ورتالىعىنىڭ مالىمدەۋىنشە, قازىرگى ەپيدەميولوگيالىق جاعدايعا بايلانىستى وسى جانە وزگە دە سۇراقتار وبلىس اكىمىنىڭ توراعالىعىمەن وتكىزىلگەن ونلاين كەڭەستە تالقىلاندى.
وتكەن اپتادا وبلىستاعى پروۆيزورلىق ورىندار سانى 2,4 ەسەگە ارتىپ, 1852-گە جەتتى. بۇگىنگى كۇندە ولاردىڭ 94,2 پايىزى بوس ەمەس. ابىلقايىر سقاقوۆ ناۋقاستارعا ارنالعان پروۆيزورلىق توسەك-ورىندار سانىن 2500-گە جەتكىزىپ, قوسىمشا 3000 ورىننان تۇراتىن رەزەرۆتى جاساقتاۋدى تاپسىردى.
"وسى ماقساتتى ورىنداۋعا اقسۋداعى «ەۋرازيا» مەديتسينالىق ورتالىعىنىڭ, "مويىلدى" شيپاجايىنىڭ جانە وزگە دە مەكەمەلەردىڭ رەسۋرستارى جۇمىلدىرىلادى. سونىمەن قاتار, پاۆلودارداعى "بايانتاۋ" سپورت سارايىنىڭ نەگىزىندە تاۋلىكتىك قابىلداۋ-سۇرىپتاۋ ستاتسيونارىن جاساقتاۋ جوسپارلانعان", - دەدى ءباسپاسوز ورتالىعىندا.
پروۆيزورلىق ستاتسيونارلار كوبەيگەن سايىن ولاردى مەديتسينالىق كادرلارمەن قامتۋ ماسەلەسىنىڭ وزەكتىلىگى ارتا تۇسۋدە. قازىرگى ۋاقىتتا وبلىستاعى ءتۇرلى ستاتسيونارلاردا 1193 مەديتسينا قىزمەتكەرى جۇمىس ىستەۋدە (وتكەن اپتادا +213), ولاردىڭ 763-ءى – پروۆيزورلىق ورىنداردا (+274). وبلىس اكىمى دەنساۋلىق ساقتاۋ باسقارماسىنىڭ باسشىلىعىنا جۇمىسقا ستۋدەنت مەديكتەردى, ۆولونتەرلەردى, دەنساۋلىق ساقتاۋ ارداگەرلەرىن تارتۋ مۇمكىندىكتەرىن قاراستىرۋدى تاپسىردى.
"مەديتسينالىق مەكەمەلەردى ءدارى-دارمەكپەن ۋاقىتىلى جانە تولىققاندى قامتاماسىز ەتۋ ءۇشىن دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءبىرجان دوسمايىلوۆقا "سك-فارماتسيا" كومپانياسىمەن قۇرىلعان ءوزارا ارەكەتتەستىكتەن بولەك, فارماتسەۆتيكالىق كومپانيالارمەن جانە ديستريبيۋتەرلەرمەن مەموراندۋم جاساسۋ ارقىلى ىنتىماقتاستىققا جەتۋ تاپسىرماسى بەرىلدى", - دەدى ءباسپاسوز ورتالىعىندا.
ابىلقايىر سقاقوۆ مەديتسينالىق قىزمەتتەر مەن ايماق تۇرعىندارى اراسىنداعى ءتيىمدى كوممۋنيكاتسيانىڭ ماڭىزدىلىعىن اتاپ ءوتتى. اكىمنىڭ ايتۋىنشا, شتاتىن ۋاقىتشا مەديتسينا قىزمەتكەرلەرىمەن تولىقتىرۋعا بولاتىن 109 بايلانىس ورتالىعى سىندى بىرىڭعاي call-ورتالىق قاجەت.
"تۇرعىندار ءبىر قوڭىراۋدان-اق تۇسىنىكتى, تولىققاندى جانە راستالعان اقپارات الۋى ءتيىس", - دەدى ايماق باسشىسى.
سونىمەن قاتار, ول ۇيدە ەم الىپ جاتقان پاتسيەنتتەردىڭ جاعدايىن باقىلاۋدى ساپالى تۇردە جۇرگىزۋدى تاپسىردى. دارىگەرلەر ولارمەن ۆيدەوبايلانىس ارقىلى قاتىناسىپ, بىردە-ءبىر پاتسيەنتتىڭ مەديكتەردىڭ نازارىنان تىس قالماۋىن قاداعالاپ, كەڭەس بەرۋى ءتيىس.
پاۆلودار وبلىسى
