ايماقتار • 01 شىلدە، 2020

بالقاشتى قوقىستان كىم قۇتقارادى؟

40 رەت كورسەتىلدى

ءتۋريزمنىڭ ورداسىنا اينالادى دەگەن بالقاشتىڭ ماڭايى كۇل-قوقىستان كوز اشپاي-اق قويدى. قالانى ايتپاعاننىڭ وزىندە، جاعاجايلار مەن كورشى ەلدى مەكەندەردى قوقىستان تازارتۋ كادىمگىدەي ۇلكەن پروبلەماعا اينالعان، – دەپ حابارلايدى Egemen.kz.

دەگەنمەن، سەڭ ەندى قوزعالىپ، بۇل سالادا باياۋ بولسا دا ءىس-ارەكەتتىڭ نىشانى بايقالا باستادى. مىسالى، قازىرگى ۋاقىتتا قالا ماڭىنداعى تەحسناب كەنتىندەگى تاۋ بولىپ ۇيىلگەن قوقىستى تىسقا شىعارۋ قول الىنعان. بۇعان دەيىن مۇنداعى تۇرعىندار قوقىس شىعارۋعا كەلىسىم-شارت بولماعاندىقتان، تۇرمىستىق قالدىقتاردى ءار جەرگە تاستاي بەرگەن ەكەن.

بالقاش قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ سەكتور مەڭگەرۋشىسى اسىلمۇرات ءتۇسىپوۆ كەنتتەگى بىرنەشە جىلدان بەرى جاتقان 400 تەكشە مەتر قالدىقتىڭ تىسقا شىعارىلعانىن ايتادى.

ء"بىز رۇقسات ەتىلمەگەن قوقىستاردى جويۋمەن اينالىسامىز. قازىر بارلىق جەردى تازالايمىز. جەكە سەكتور تۇرعىندارىمەن قاتتى تۇرمىستىق قالدىقتاردى شىعارۋعا كەلىسىم-شارتتار جاساسۋ ءۇشىن ءتۇسىندىرۋ جۇمىستارىن جۇرگىزەتىن بولامىز. بۇعان قوسا، قوقىس توگەتىن ورىندارعا بەينە كامەرالار ورناتامىز، سودان كەيىن قوقىستى رەتسىز توگەتىندەرگە ايىپپۇل سالىنادى باستايدى"، – دەيدى ول.

بۇل جەردە جەرگىلىكتى اتقارۋشى بيلىك پەن كوممۋنالدىق قىزمەت وكىلدەرىنىڭ تۇرعىندارعا وكپەلەيتىن ءجونى بار. ولاردىڭ كوبى سالاقتىق تانىتىپ، ۇيىنەن شىققان كۇل-قوقىستى كورىنگەن جەرگە توگە سالۋدى ابدەن ادەتكە اينالدىرىپ العان.

"قوقىس شىعارۋ تۋرالى وتىنىشپەن بىزگە ەشكىم كەلگەن جوق. ازىرگە ەشقانداي كەلىسىم جوق. ول ءۇشىن تەحسناب كەنتىنىڭ تۇرعىندارى بىزگە كەلىپ، كەلىسىم شارت راسىمدەۋلەرى كەرەك. بىزدە تەحنيكا جەتكىلىكتى"، – دەيدى "بالقاش ۋنيۆەرسال" جشس-ءنىڭ ۋچاسكە باستىعى مانات دىلداشەۆ.

بۇگىنگى كۇندە كەنتتەگى ءاربىر ءۇي ءۇشىن اي سايىنعى تاريف ورناتىلىپ، ەكونوميست ماماندار ناقتى ەسەپتەۋلەر جاساۋ ۇستىندە. وسىنداي قادامداردان كەيىن ساناسى ويانا باستاعان كەنت تۇرعىندارى بۇل باستاماعا قولداۋ بىلدىرە باستاعان.

ء"بىز تولەۋگە دايىنبىز، – دەيدى ولار. – كەنتىمىزدىڭ كوپتەگەن تۇرعىندارى دا مۇنىمەن كەلىسەدى. بۇرىن ءبىز قالدىقتاردى قايدا تاستايتىنىمىزدى بىلمەيتىنبىز".

كوممۋنالدىق قىزمەتتىڭ وكىلدەرى الداعى ۋاقىتتا تەحسناب  كەنتىن عانا ەمەس، جبي ىقشام اۋدانىن، شۇبارتۇبەك جانە جۇمىسشى ەلدى مەكەندەرىن، ساياجايلار مەن جاعاجايلاردى دا كۇل-قوقىستان تازارتۋدى جوسپارلاپ وتىر.

بۇدان بولەك، "بالقاش ۋنيۆەرسال" كاسىپورنى بالقاش قالاسىنىڭ كونتەينەرلىك الاڭدارىن رەتكە كەلتىرۋمەن اينالىسپاقشى. بۇل جۇمىس اياقتالعان سوڭ، 190-عا جۋىق قوقىس جاشىكتەرى الاڭدارمەن بىرگە سەنىمدى باسقارۋعا بەرىلەدى.

 

قاراعاندى وبلىسى

سوڭعى جاڭالىقتار

75،7 ملن ادام ايتۆ جۇقتىردى

مەديتسينا • كەشە

2021 جىلعى ورازا كەستەسى

رۋحانيات • كەشە

ۇقساس جاڭالىقتار