حالىق "ساقتانساڭ ساقتايمىن" دەگەن ءسوزدىڭ ءمانىن ءالى دە تۇسىنە قويماعان سىڭايلى. كوشە بويىندا بەتپەردە تاقپاعان ادام كوپ. وسى ءبىر اڭعالدىق كەي تۇستا ورنى تولماس وكىنىشكە ۇرىندىرىپ جاتادى. ەلگە ساقتانۋ شاراسىن بۇلجىتپاي ورىنداۋ كەرەكتىگى دە ەسكەرتىلىپ جاتىر. جامان تۇماۋ قايتادان بەل العالى وبلىس ورتالىعىنداعى سانيتارلىق جۇمىسقا ەرەكشە ءمان بەرىلىپ وتىر. حالىق كوپ باراتىن مەكەمەلەردەگى ساقتىق شارالارى كۇشەيتىلدى.
"كارانتين كەزىندە ءبىزدىڭ قىزمەتكەرلەردىڭ 70 پروتسەنتى ءوز جۇمىستارىن جالعاستىرىپ جاتىر. جەرگىلىكتى تۇرعىندار بەلگىلى ءبىر ماسەلەلەرگە وراي شاعىم ايتىپ كەلەدى. ادام اياعى ۇزىلمەيدى دەسە دە بولعانداي. سوندىقتان, عيماراتتىڭ ءىشىن ۇنەمى زالالسىزداندىرىپ تۇرامىز", – دەيدى كوكشەتاۋ قالالىق پوليتسيا باسقارماسى باستىعىنىڭ ءبىرىنشى ورىنباسارى جانات ءشارىپوۆ.
سانيتارلىق تازالاۋ جۇمىستارىنا كوكشەتاۋ تەحنيكالىق ينستيتۋتىنىڭ وكىلدەرى دە ءوز ۇلەستەرىن قوسۋدا. وقۋ ورداسىنان ارنايى توپ قۇرىلعان. ول توپتا ينستيتۋتتىڭ وقىتۋشىلارى مەن وفيتسەرلەرى بار. ولار وسى ەكى كۇننىڭ ىشىندە 5 عيماراتتى دەزينفەكتسيالاعان.
دەزينفەكتسيالاۋعا جۇمىلدىرىلعان جانداردىڭ بارلىعى قاجەت جابدىقتارمەن تولىق جاراقتاندىرىلعان. ياعني, قالالىق اكىمشىلىكتەن 200 دەزينفەكتسيالاۋ قۇرىلعىسى مەن 350 ارنايى فورما بەرىلگەن. سونداي-اق, دياحلور سۇيىقتىعى دا جەتكىلىكتى ءبولىنىپتى. قالا بويىنشا زالالسىزداندىرۋ جۇمىستارى كۇشەيتىلە ءتۇستى.
