سالالىق ءبىلىم باسقارماسى وكىلىنىڭ ايتۋىنشا, بيىلعى ۇبت كەزىندە جىلداعىداي زاڭ بۇزۋشىلىق ورىن العان. الايدا بىلتىرمەن سالىستىرعاندا كورسەتكىش تومەن. تۇركىستان وبلىسىندا 200 ءبىتىرۋشى ۇبت كەزىندە ءتۇرلى قۇيتىرقىلىققا بارماق بولعان. تالاپكەردى تەكسەرۋ كەزىندە ەمتيحانعا الىپ كىرۋگە تىيىم سالىنعان زاتتار تابىلعان. بۇل تۋرالى تەستىلەۋ بارىسىن تالقىلاۋعا ارنالعان بريفينگتە تۇركىستان وبلىسى بويىنشا ءبىلىم سالاسىندا ساپانى قامتاماسىز ەتۋ دەپارتامەنتى باسشىسىنىڭ ورىنباسارى قۇدايبەرگەن شەرباەۆ ايتىپ بەردى. سونداي-اق وتىرار اۋدانى, ءشاۋىلدىر اۋىلىندا ۇبت كەزىندە 10 مينۋتقا بەينە-ترانسلياتسيا ۇزىلگەن.
ال تۇلكىباستاعى مەملەكەتتىك كوميسسيا قۇرامىنا ەنگەن ءبىلىم ءبولىمىنىڭ باس مامانى مەن مەملەكەتتىك كوميسسيا توراعاسىنىڭ اۋىرىپ قالۋىنا بايلانىستى مەلەكەتتىك كوميسسيا توراعاسى مىندەتى ءبىلىم ءبولىمىنىڭ باس مامانىنا جۇكتەلگەن. الايدا اتالعان مەملەكەتتىك قىزمەتكەرلەر وقۋشىلارعا كومەك بەرىپ جاتقانىن ۇقك قىزمەتكەرلەرى بەينەجازباعا ءتۇسىرىپ العان. جاسالعان زاڭبۇزۋشىلىق بويىنشا ىشكى ىستەر ورگاندارىنىڭ تەرگەۋ توبى شاقىرىلىپ, ءتيىستى شارالار جۇرگىزىلۋدە. دەگەنمەن تەستىلەۋ پۋنكتتەرىندە سانيتارلىق تالاپتاردىڭ ساقتالۋى ءۇشىن وبلىس كولەمىندە دايىندىق قارقىنى باسەڭدەگەن ەمەس. ياعني سانيتارلىق نورمالاردىڭ ساقتالۋى قاتاڭ باقىلاۋعا الىنعان.
«تۇركىستان وبلىسىندا 26-28 ماۋسىم ارالىعىندا 13 اۋدان-قالادا جانە سايرام اۋدانى, شىمكەنتتە ورنالاسقان Silkway ۋنيۆەرسيتەتىندەگى پۋنكتتەردە ۇبت وتكىزىلدى. اتالعان ءۇش كۇندە ۇبت تاپسىرۋعا ءوتىنىش بەرگەن وقۋشىلاردىڭ 6714-ءى تەست تاپسىرۋ كەرەك بولاتىن. بىراق 132 وقۋشى تەستىلەۋگە كەلمەدى. 28 وقۋشى كىرەبەرىستە تىيىم سالىنعان زاتتاردى الىپ كىرمەك بولعاندىقتان تەستىلەۋگە كىرگىزىلمەگەن. بارلىعى 6554 وقۋشى ۇبت-عا قاتىسىپ, ونىڭ ىشىندە ۇبت ەرەجەسىن بۇزعانى ءۇشىن 39 وقۋشى اۋديتوريادان شىعارىلىپ, تەستىلەۋ ناتيجەسى جويىلدى», دەيدى ازامات سەرىكباي ۇلى.
بيىل ۇبت وتە كۇردەلى كەزەڭدە ءوتىپ جاتىر. ددۇ Covid-19 ۆيرۋسىن پاندەميا دەپ جاريالانۋىنا بايلانىستى ەلىمىزدەگى ءبىلىم بايگەسىنە مەملەكەتتىك دەڭگەيدە كوڭىل بولىنۋدە. ءبىلىم جانە عىلىم مينيسترلىگىنىڭ مالىمەتىنشە, ەلىمىزدە ۇلتتىق بىرىڭعاي تەستىلەۋدىڭ العاشقى كۇنىندە 160 تالاپكەر ەرەجە بۇزعان. ۇبت-دا ەرەجە بۇزعانداردىڭ باسىم بولىگى شىمكەنت جانە تۇركىستان وبلىسىندا تىركەلدى.
تۇركىستان وبلىسى
