ايماقتار • 30 ماۋسىم، 2020

اقمولادا 43 مادەنيەت وشاعى كۇردەلى جوندەۋدەن وتكىزىلمەكشى

22 رەت كورسەتىلدى

جوندەۋ جۇمىستارىنا 1 ميلليارد 700 ميلليون تەڭگە ءبولىنىپ وتىر. شىنىن ايتقاندا، كوپتەن بەرى كوڭىلدەن قاعىس قالعان مادەنيەت سالاسىنىڭ ءوڭى كىرىپ قالاتىن بولدى، - دەپ جازادى Egemen.kz

مادەني وشاقتارىن قامقورلىققا الۋ جۇمىستارى "جۇمىسپەن قامتۋدىڭ جول كارتاسى" جانە "اۋىل – ەل بەسىگى" باعدارلامالارى اياسىندا جۇزەگە اسىرىلۋدا. وبلىس ورتالىعىنداعى "كوكشەتاۋ" جانە "دوستار" مادەنيەت سارايلارى دا جاڭعىرتىلماق. ءبىر قۋانىشتىسى، 30 جىل جوندەۋ كورمەگەن كراسنىي يار اۋىلىنداعى "كوكشە" مادەنيەت ءۇيى دە نازاردان تىس قالمادى.  

بۇل مادەنيەت وشاعى سوناۋ 1990 جىلى پايدالانۋعا بەرىلىپتى. سودان بەرى جوندەۋ كورمەگەن. وسى جىلى نىساندى قالىپقا كەلتىرۋگە "اۋىل – ەل بەسىگى" جوباسى اياسىندا 241 ملن تەڭگە ءبولىنىپ وتىر. "دوستار" مادەنيەت سارايىنىڭ توزىعى جەتكەن شاتىرى دا اۋىستىرىلۋدا. وبلىستا ءالى دە كۇردەلى جوندەۋدى قاجەت ەتەتىن 20-عا جۋىق مادەني نىسان بار. 

"ونىڭ   35-ءى مادەنيەت ءۇيى، 5 كىتاپحانا، مەملەكەتتىك 2  مۇراعات جانە وبلىستىق فيلارمونيا بار. جوندەۋ جۇمىستارى بارىسىندا 486 ادام جۇمىسپەن قامتىلعان. ولاردىڭ 249-ى جۇمىسپەن قامتۋ ورتالىعىنان جىبەرىلىپ وتىر"، دەيدى وبلىستىق مادەنيەت، ارحيۆتەر مەن قۇجاتتامالار باسقارماسىنىڭ باس مامانى ءانۋار ءايتىموۆ. 

وڭىردە كۇردەلى جوندەۋدەن بولەك، ىرگەتاسى جاڭادان قالانىپ جاتقان مادەني نىساندار دا بار. سونىڭ ءبىرى اتباسار اۋدانىندا قۇرىلىسى باستالعان "باستاۋ" جاستاردىڭ بوس ۋاقىتىن ۇيىمداستىرۋ ورتالىعى. جوبا قۇنى 270 ملن تەڭگە. بۇل نىسان كەلەر جىلى اياقتالادى دەپ كۇتىلۋدە.

 

سوڭعى جاڭالىقتار

ۇقساس جاڭالىقتار