تۇركىستان وبلىسى قورعانىس ىستەرى جونىندەگى دەپارتامەنت باستىعى, پولكوۆنيك ن.ديۋسەباەۆ ازاماتتاردى مەرزىمدى اسكەري قىزمەتكە شاقىرۋ جۇرگىزۋ مەرزىمدەرى ماۋسىم ايىنان تامىز ايىنا دەيىن ۇزارتىلعانىن, ويتكەنى ەلىمىزدەگى ەنگىزىلگەن توتەنشە جاعدايدىڭ ارەكەتى كەزەڭىندە اسكەرگە شاقىرۋ جانە مەديتسينالىق كوميسسيالاردىڭ جۇمىستارى توقتاتىلعانىن ايتادى. "اسكەرگە شاقىرىلۋشىلار جانە قارۋلى كۇشتەرىن جاساقتاۋعا تارتىلعان لاۋازىمدى تۇلعالار اراسىندا كوروناۆيرۋستىق ينفەكتسيانىڭ تارالۋىن ەسكەرتۋ, الدىن الۋ شارالارىن كۇشەيتۋ ماقساتىندا اسكەرگە شاقىرۋ پۋنكتتەردىڭ كىرەبەرىس جەرلەرىندە مەديتسينالىق پوستتار ورنالاستىرىلدى. جاس بۋىندى سالتاناتتى شىعارىپ سالۋلار توقتاتىلدى. وبلىستىق مەديتسينالىق كوميسسيالار قۇرامدارىنا دارىگەر-ينفەكتسيونيستتەر ەنگىزىلدى. وسىعان وراي شاقىرۋدىڭ نەگىزگى تاپسىرماسى اسكەرلەردى دەنى ساۋ جانە مورالدى دايارلانعان جاستارمەن جاساقتاۋ بولىپ تابىلادى", دەيدى دەپارتامەنت باستىعى.
ءار اسكەر تۇرلەرىندە بەلگىلى ءبىر تالاپتار بار, سول تالاپتار بويىنشا اسكەرگە شاقىرىلۋشى قانداي اسكەري بولىمدەردە قىزمەت وتكەرەتىنى بەلگىلەنەدى. مىسالىعا: قورعانىس مينيسترلىگى ۇلتتىق ۋنيۆەرسيتەتىنىڭ اسكەري-عىلىمي ۆزۆودىن جاساقتاۋ ءۇشىن ءىت-ماماندىقتارى, سونداي-اق اسكەرگە شاقىرىلۋشىنىڭ دەنساۋلىق جاعدايى ماڭىزدى, ال دەسانتتىق اسكەرلەرى جانە ارنايى تاعايىندالعان اسكەرلەر ءۇشىن بويىنىڭ پارامەترلەرى 170 سم تومەن ەمەس سياقتى دەنە بىتىمدەرى ماڭىزدى, سپورتشىلارعا تاڭداۋ بەرىلەدى. الايدا وسىمەن بىرگە قارۋلى كۇشتەرى مۋزىكانتتارعا, اسپازشىلارعا, جۇرگىزۋشىلەرگە, بايلانىسشىلارعا جانە كوپتەگەن باسقا ماماندىقتارعا مۇقتاج. "اسكەرگە شاقىرىلعاننان جانە اسكەري بولىمدەرگە كەلگەننەن كەيىن ولاردى ەكى اپتالىق كارانتينگە وقشاۋلاي وتىرىپ جاس بۋىنعا پتر-زەرتتەۋ ادىسىمەن COVID-19-عا زەرتحانالىق زەرتتەۋ جۇرگىزىلەدى. كارانتين كەزىندە جاس بۋىن مەديتسينالىق تەكسەرۋدەن جانە الەۋمەتتىك-پسيحولوگيالىق زەردەلەۋدەن, سونداي-اق باستاپقى اسكەري دايىندىقتان وتەدى. اسكەرگە شاقىرىلعانداردىڭ بولىگى 6 اي ىشىندە بىرقاتار اسكەري ماماندىقتار بويىنشا وقىپ, ماماندار رەتىندە اسكەري بولىمدەرگە جولداناتىن بولادى. بۇدان باسقا نەگىزگى داعدىلاردىڭ اراسىندا اسكەر جاستاردى تارتىپكە, جاۋاپكەرشىلىككە, وزدىگىنە ۇيرەتەدى جانە دەنە كۇشىنە جانە شىدامدىلىققا يە بولادى", دەيدى پولكوۆنيك ن.ديۋسەباەۆ.
ارينە, اسكەري قىزمەتتىڭ قاۋىپسىزدىگى باستى نازاردا. اسكەري ءبولىمنىڭ ءار بولمەسىندە بەينەباقىلاۋ جۇرگىزىلگەن. ءار اسكەري بولىمدە گارنيزون پروكۋرورىنىڭ جانە اسكەري پوليتسيا جاساعى باستىعىنىڭ سەنىم جاشىكتەرى ورنالاسقان, حات-حابارلار پروبلەمالىق ماسەلەلەر بويىنشا تەزدەتىپ شەشىمدەر قابىلداۋ ءۇشىن مەكەنجايلارعا تۇسەدى. كازارمانىڭ ءار جايعاسۋ ورىندارىندا, شتابتا, اسحانادا, ءبوپ, كلۋبتا بارلىق دەڭگەيدەگى باسشىلىق قۇرامنىڭ, سونىڭ ىشىندە قىزمەتتىك تەلەفوننان قوڭىراۋ شالۋ ءۇشىن قولجەتىمدى سەنىم تەلەفوندارى تۋرالى اقپارات ورنالاستىرىلعان. اسكەري قىزمەتشىلەردىڭ قىزمەتتىك ارەكەتتەگى پروبلەمالارى تۋرالى ءار ۋاقىتتا ولارعا قوڭىراۋ شالۋعا نەمەسە سمس-حابارلاما جولداۋعا مۇمكىندىكتەرى بار. ءار كەلىپ تۇسكەن سيگنال بويىنشا پروبلەمالىق ماسەلەلەردى تەكسەرۋ جانە جويۋ بويىنشا, سونداي-اق وسىنداي وقيعالاردى الداعى ۋاقىتتا بولدىرماۋ ءۇشىن الدىن الۋ بويىنشا قاجەتتى جۇمىس جۇرگىزىلەدى. ياعني بۇگىندە ەلىمىزدە ازاماتتاردىڭ اسكەري بورىشىن وتەۋگە بارلىق جاعداي جاسالعان. دەپارتامەنت باستىعى اسكەري قىزمەتكە قىزىعۋشى جاستاردىڭ قاتارى كوبەيگەنىن ءپاتريوتيزمنىڭ, سەنىمنىڭ, ەلدەگى تۇراقتىلىق پەن بىرلىكتىڭ نىعايا تۇسۋىمەن بايلانىستىرادى.
تۇركىستان وبلىسى
