ايماقتار • 28 ماۋسىم، 2020

سولتۇستىك قازاقستاندا مال ۇرلىعى ءبىرشاما ازايدى

25 رەت كورسەتىلدى

بيىل سولتۇستىك قازاقستاندا مال ۇرلىعى ءبىرشاما ازايىپ وتىر. ناقتى ايتساق جىل باسىنان 16 مال ۇرلىعى تىركەلگەن. ال وتكەن جىلدىڭ سايكەس مەرزىمىندە 41 ۇرلىق بولعان ەدى. سانعا سالساق ۇرلىق 61%  ازايعان، دەپ جازادى Egemen.kz

بۇعان پوليتسيا قىزمەتكەرلەرىنىڭ جەرگىلىكتى اتقارۋشى بيلىك وكىلدەرىنىڭ كومەگىمەن مال يەسى، باقتاشى جانە جەرگىلىكتى ءوزىن ءوزى باسقارۋ وكىلدەرىمەن بىرلەسىپ جاساعان ۇشجاقتى كەلىسىمدى جاساتقىزعانى پايداسىن تيگىزىپ وتىرعان سياقتى. بۇل كەلىسىم تاراپتاردىڭ جاۋاپكەرشىلىكتەرىن قاراستىرعان، ەگەر مال ۇرلىعى وسىلاردىڭ ءبىرىنىڭ ءوز مىندەتتەمەلەرىن ورىنداماعانىنان بولسا، نەگىزگى جاۋاپكەرشىلىك سونىڭ موينىنا ارتىلادى. سونىڭ ىشىندە مال يەسى باقتاشىنىڭ الدىنا مالىن سالىپ بەرەدى، ال مالشى جەرگىلىكتى ءوزىن ءوزى باسقارۋ ورگاندارىنىڭ بەلگىلەگەن جەرىنە مالدى جايادى. 

ەگەر وسى ارادان مال جوعالسا باقتاشى كىنالى، ال باقتاشىعا بەرمەي، قوراسىنان جوعالتسا، يەسىنىڭ ءوزى كىنالى، مال باعاتىن جەر بەلگىلەنبەسە، جەرگىلىكتى ءوزىن ءوزى باسقارۋ ورگانى كىنالى بولىپ تابىلادى. وبلىستىڭ اققايىڭ، مامليۋت، تيميريازەۆ، ع.مۇسىرەپوۆ  جانە شال اقىن اۋداندارىندا وسى تاجىريبە تياناقتى قولدانىلىپ ەدى، بۇلارداعى مال ۇرلىعى ءتىپتى سيرەدى. قىسقاسى، جاۋاپكەرشىلىك ناقتى بولسا، ساقتىق سونشالىق ءجىتى بولاتىنىن ءومىر كورسەتىپ وتىر.

"باقتاشىنىڭ كەلىسىم-شارتقا قول قويىپ، جاۋاپكەرشىلىگىن ارتتىرۋ – مالدىڭ جايىلىمنان جوعالۋىن تومەندەتۋدە. وسىلاي ۇيىمداستىرىلعان تۇردە باعۋ، سونداي-اق مالعا تاڭبا سالۋ كوپتەگەن پروبلەمادان قۇتقارادى. بۇل باعىتتا اقپاراتتاندىرۋ جۇمىستارىنا زور ءمان بەرىلۋدە"، دەيدى سقو پد باستىعىنىڭ ورىنباسارى، پوليتسيا پولكوۆنيگى رۋسلان نازاروۆ.

سونىمەن قاتار مالدىڭ ەگىستىككە ءتۇسۋى، قورعالعان شابىندىقتى ءبۇلدىرۋى، ءتۇرلى ەكپەلەردى تاپتاۋى دا باقتاشىعا قوسىمشا جاۋاپكەرشىلىك جۇكتەيدى. قاڭعىرىپ، بوسىپ كەتكەن مال جول-كولىك وقيعالارىنىڭ جاسالۋىنا دا سەبەپ بولىپ جاتادى. سوندىقتان باقتاشىنىڭ جاۋاپكەرشىلىك جۇگى اۋىرلاي تۇسەتىنى كەلىسىمدە قاتتى ەسكەرتىلگەن.

سوڭعى جاڭالىقتار

ۇقساس جاڭالىقتار