"جامان تۇماۋدىڭ" ارقا توسىندەگى ارىنى تىم-قاتتى-اق بولىپ تۇر. ناقتى ايتار بولساق, ىندەتكە قاتىستى اۋرۋشاڭدىقتىڭ ەلىمىز بويىنشا ءوسىمى 2,4 % بولسا, قاراعاندى وبلىسىنداعى كورسەتكىش 4,4 پايىزدى قۇراپ وتىر. سول سەبەپتى دە, تىعىرىققا تىرەگەن مۇنداي جاعدايدىڭ جەرگىلىكتى اتقارۋشى بيلىكتى قاتتى الاڭداتىپ تۇرعان جايى بار.
وسىعان وراي ۇيىمداستىرىلعان بريفينگ بارىسىندا قانات اسقاروۆ جوعارىدا ايتىلعان شەشىمنىڭ قانداي سەبەپتەرمەن قابىلدانعانىن ەگجەي-تەگجەيلى ءتۇسىندىردى. ىندەتتىڭ ورشۋىنە ماسكالىق رەجيم مەن الەۋمەتتىك قاشىقتىقتىڭ ساقتالماۋى بىردەن-ءبىر سەبەپكەر بولعان. ياعني تۇرعىندار كارانتين جاعدايىندا قويىلاتىن تالاپتاردى ءتىپتى دە ەلەڭ قىلمايدى ەكەن. قاۋىپسىزدىك ەرەجەلەرىن ادامداردىڭ وزدەرى دە, كاسىپورىنداردىڭ اكىمشىلىگى دە ساقتامايتىن كورىنەدى.
"ارنايى قۇرىلعان موبيلدىك توپتار قىزمەتىن قايتا باستاعان 153 نىساندى تەكسەرگەندە, ول جەرلەردە باس مەملەكەتتىك سانيتارلىق دارىگەر قاۋلىسىنىڭ تالاپتارى بۇزىلعانىن انىقتادى. نەگىزىنەن, مۇنداي جاعدايلار قوعامدىق تاماقتانۋ, ساۋدا, قوعامدىق كولىك نىساندارىندا انىقتالدى", – دەدى قانات اسقاروۆ.
مىنە, وسىنداي كۇردەلى جاعدايدا كوروناۆيرۋس ينفەكتسياسىنىڭ ءارى قاراي تارالۋىنا جول بەرمەۋ ماقساتىندا بۇگىننەن باستاپ قوسىمشا شارالار ەنگىزىلەتىن بولدى. ءبىر سوزبەن ايتقاندا, قاراعاندى وبلىسى بويىنشا كارانتين رەجيمى قاتاڭداتىلاتىن بولدى.
اتاپ ايتقاندا, حالىققا قىزمەت كورسەتۋ ورتالىقتارى قىسقارتىلعان جۇمىس كۇنى تارتىبىنە كوشىپ, ساعات 09.00-دەن 14.00-گە دەيىن عانا جۇمىس ىستەيدى. مەملەكەتتىك قىزمەتتەردىڭ باسىم بولىگى ونلاين رەجيمىندە ۇسىنىلاتىن بولادى.
قالا ىشىندە قوعامدىق كولىكتەردىڭ ءجۇرۋ ۋاقىتى شەكتەلىپ, ەندى ولار ساعات 06.00-دەن 21.00-گە دەيىن عانا تۇرعىندارعا قىزمەت كورسەتە الادى. جولاۋشىلار سالونعا تەك الدىڭعى ەسىك ارقىلى عانا كىرەتىن بولادى. ال شىعار كەزدە بارلىق ەسىكتەر ءبىر مەزەتتە اشىلۋى ءتيىس. بۇل تالاپتاردىڭ ساقتالۋى قاتاڭ تۇردە باقىلاۋعا الىناتىن بولادى.
تاكسيلەرگە تەك ءبىر جولاۋشىنى نەمەسە كامەلەتكە تولماعان ەكى بالانى ەرتىپ جۇرگەن ءبىر ەرەسەك ادامدى عانا تاسۋعا رۇقسات بەرىلەدى.
اۋرۋدىڭ ايىلىن جيماي تۇرعانىنا وتباسىلىق ءتۇرلى جيىندار, توي-تومالاق, ەسكە الۋ ءىس-شارالارىنىڭ تىيىلماي تۇرعانى دا تۇرتكى بولىپ وتىر دەگەندى ايتادى وبلىستىڭ باس مەملەكەتتىك سانيتارلىق دارىگەرى. مۇنىڭ ءبارى كوروناۆيرۋس ينفەكتسياسى جاعدايلارىنا تالداۋ جۇرگىزۋ بارىسىندا ءمالىم بولعان.
"كوپتەگەن جاعدايدا ناۋقاستار وزدەرىنىڭ اۋرۋ جۇقتىرۋىن ءۇي جاعدايىندا, مەيرامحانالاردا, ءدامحانالاردا وتكىزىلەتىن ءتۇرلى جاپپاي سالتاناتتى, وتباسىلىق, ەسكە الۋ ءىس-شارالارىنا قاتىسقاندىعىمەن بايلانىستىرادى. ىندەت ودان ءارى ورشىگەن جاعدايدا, امال جوق, قوعامدىق تاماقتاندىرۋ نىساندارىنىڭ جۇمىسىن ۇيگە جەتكىزىپ بەرۋ رەجيمىنە اۋىستىرۋ ماسەلەسى قارالادى", – دەدى قانات اسقاروۆ.
بۇدان بولەك, بۇرىن ەنگىزىلگەن كارانتيندىك شەكتەۋ شارالارى سول بەتى قالادى. ماسەلەن, 65 جاستان اسقان ادامدارعا اسا قاجەتسىز كوشەگە شىعۋ شەكتەلگەن. جاسى 14-كە دەيىنگى بالالاردىڭ ەرەسەكتەرسىز جۇرۋىنە, وتباسى مۇشەلەرىنەن باسقا, ءۇش ادامنان ارتىق ادامداردىڭ جينالۋىنا تىيىم سالىنادى. قوعامدىق تاماقتانۋ نىساندارىندا كەلۋشىلەردىڭ سانى 30 ادامعا دەيىن شەكتەلگەن, الەۋمەتتىك ارا قاشىقتىق پەن وتىرعىزۋ جانە جۇمىس ءتارتىبى ساعات 08.00-دەن 22.00-گە دەيىن ساقتالادى. بۇقارالىق (ۇجىمدىق) ءىس-شارالاردى وتكىزۋگە تىيىم سالىنادى. سونداي-اق ساۋدا-ويىن-ساۋىق ورتالىقتارىنىڭ, ساۋدا ۇيلەرىنىڭ (ورتالىقتارىنىڭ), ازىق-ت ۇلىك جانە ازىق-ت ۇلىك ەمەس بازارلارىنىڭ جۇمىس كۇندەرى مەن دەمالىس كۇندەرى جۇمىس ۋاقىتى شەكتەۋلى. دەمالىس سوو, ساۋدا ۇيلەرى جانە ازىق-ت ۇلىك ەمەس دۇكەندەر ساعات 9.00-دەن 13.00-گە دەيىن جۇمىس ىستەيدى. بازارلار مىندەتتى سانيتارلىق كۇنگە جابىلادى.
وبلىستىڭ باس سانيتارلىق دارىگەرى بەتپەردە تاعۋدىڭ دىم كومەگى جوق دەگەن اعايىننىڭ پىكىرىنە قارسى ناقتى دالەلگە نەگىزدەلگەن ءۋاج ايتتى.
"بەتپەردەنى تاعىپ ءجۇرۋ ىندەت جۇقتىرۋدىڭ الدىن الۋعا كومەكتەسەدى, – دەدى ول. – دۇرىس پايدالانعان جاعدايدا بۇل ماسكا ۆيرۋس جۇقتىرعان ادامنىڭ سىلەكەي شاشىراندىلارىن جىبەرمەي ۇستاپ قالادى. سونىمەن قاتار, ول كىرلەنگەن قولدارى بەتىنە ءجيى تيەتىن ادامداردىڭ اۋىز بەن مۇرىن قۋىسى ىشىندەگى شىرىشتى قاباتتارىن قورعايدى. ماسەلەن, اۋىرماعان ادامنىڭ قولىنا ميكروب توزاڭى جۇعادى دا, ونىڭ بىلعانعان سول قولدارى بەتىنە تيەدى. سودان بارىپ ميكروورگانيزم مۇرىن, اۋىز, كوزدىڭ شىرىشتى قاباتتارىنا جۇعىپ, السىرەگەن يممۋنيتەتتىڭ جاعدايىندا ورگانيزمگە تۇگەل تارايدى".
بريفينگ سوڭىندا قاراعاندى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى قانات اسقاروۆ تۇرعىنداردى كارانتيندىك شەكتەۋ تالاپتارىن قاتاڭ ساقتاۋعا شاقىردى.
