بريفينگتە ەڭ العاش ءسوز العان قالا اكىمى مۇرات دۇيسەنبەك ۇلى قالاداعى ەپيدەميولوگيالىق جاعداي جانە ونى قالىپقا كەلتىرۋ بارىسىنداعى جۇمىستار جونىندە ايتتى.
"قۇرمەتتى قالا تۇرعىندارى! رەسپۋبليكالىق دەڭگەيدە شىمكەنت قالاسى بويىنشا ءتۇرلى جاڭالىقتار ءجۇرىپ جاتىر. ياعني, قازنەتتە شىمكەنت قالاسىندا «ناۋقاستار اۋرۋحانا قاقپاسىنا جەتپەي قايتىس بولىپ جاتىر جانە ناۋقاستارعا ورىن جوق» دەگەن سەكىلدى اقپاراتتار تاراۋدا. وسى جونىندە ارنايى تۇسىندىرمە بەرسەم, بۇگىندە قالادا 650 ينفەكتسيالىق توسەك-ورىن بار. ونىڭ ىشىندە جۇقپالى اۋرۋحانالاردا 350, جاڭا سالىنعان گوسپيتالدا 200 جانە اتامەكەن پروۆيزورلى ستاتسيوناردا 100 ورىن بار. اتالعان ەسكى جۇقپالى اۋرۋحانالار اۋرۋحاناسىندا 321 ناۋقاس جاتىر, گوسپيتالدا 172 جانە اتامەكەن پروۆيزورلى ستاتسيوناردا 42 ناۋقاس ەمدەلۋدە. ال جالپى 115 ورىن بوس.
ودان بولەك, قالادا 1690 پروۆيزورلى ورىن بار. ونىڭ ىشىندە 1315-ىندە ناۋقاستار ەم الۋدا, قالعانى بوس. ياعني, پروۆيزورلى ورىنداردىڭ 77%-ى پايىزى تولىپ تۇر. سول سەبەپتى بۇگىن 500 پروۆيزورلى ورىن اشامىز. ال جەكسەنبى كۇنى 200, دۇيسەنبى كۇنى 500 پروۆيزورلى ورىن اشىلادى. سونداي-اق 51 مەكەمەدە 628 توسەك-ورىندىق كۇندىزگى ستاتسيونار اشتىق. ونىڭ 248-ءى بوس. اتالعان كۇندىزگى ستاتسيونارداعى ءبىر ورىن كۇنىنە 5 ادامدى قابىلداي الادى. ال جۇمىس ۋاقىتى تاڭعى 08:00-دەن كەشكى 20:00-گە دەيىن (دەمالىسسىز) ىستەيدى. ايتا كەتەيىن, وسى كۇندىزگى ستاتسيونارلاردا ناۋقاستار تىركەلگەن ەمحاناسى بويىنشا تەگىن ەمدەلەدى. حالىققا دەر كەزىندە مەديتسينالىق كومەك كورسەتۋ ءۇشىن ەمحانالاردىڭ جۇمىسىن ەكى ەسە كۇشەيتەمىز", – دەدى قالا اكىمى.
اتالعان بريفينگتە شىمكەنت قالالىق دەنساۋلىق ساقتاۋ باسقارماسى باسشىسى رۋستام الباەۆتىڭ ايتۋىنشا, قالادا كوروناۆيرۋس ينفەكتسياسىمەن اۋىرىپ جاتقان 2084 ناۋقاس تىركەلگەن. ونىڭ 45 پايىزى – سيمپتومسىز. پروۆيزورلى ستاتسيونارلاردىڭ توسەك قورى 89 پايىزعا جۇكتەلگەن. ال ءدارى-دارمەكتىڭ ەكى ايلىق قورى بار.
بريفينگ سوڭىندا ءسوز العان قالا باسشىسى مۇرات دۇيسەنبەك ۇلى قازىرگى كەزدە مەديتسينا ماماندارىنا جۇكتەلگەن مىندەتتىڭ اۋىر ەكەندىگىن العا تارتىپ, تىنىمسىز ەڭبەك ەتىپ جاتقان مامانداردىڭ جۇمىسىنا تۇسىنىستىكپەن قاراۋعا شاقىردى. ەڭ باستىسى, قولايسىز ەپيدەميالىق جاعدايعا بايلانىستى تۇرعىندارعا ساقتىق شارالارىن قاتاڭ ۇستانۋ قاجەت ەكەندىگىن ەسكەرتتى.
