قۇزىرلى مەكەمەنىڭ بارلىق فيليالدارىنا جول شەبەرلەرى, ينجەنەر-سمەتاشى, زەرتحاناشىلار, جول ينجەنەرلەرى, اۆتوگرەيدەر جۇرگىزۋشىلەرى مەن مەحانيزاتورلار جەتىسپەيدى. ءبىر قۋانتارلىعى, سوڭعى جىلدارى وتاندىق جوعارى وقۋ ورىندارى مەن كوللەدجدەردە جول سالاسى ماماندارىن دايارلاۋ ءىسى جاڭادان قارقىن الدى. بۇل سالاعا مەملەكەتتەن جىل سايىن گرانت بولىنەدى. ماسەلەن, 2019-2020 وقۋ جىلىنا 9750 گرانت قارالىپ وتىر.
شاحماردان ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيەتەتى مەن حالەل وزبەكعاليەۆ اتىنداعى ماڭعىستاۋ پوليتەحنيكالىق كوللەدجىمەن ماڭعىستاۋ وبلىسىنداعى جول ساپاسىن باقىلاۋ ورتالىعى ارىپتەستىك بايلانىس ورناتقان. وعان بيىل 4-ءشى كۋرس وقيتىن ەكى ستۋدەنتتىڭ فيليال عيماراتىندا اقىلى وندىرىستىك تاجىريبەدەن ءوتىپ جاتقانىن دالەل رەتىندە ايتۋعا بولادى.
نارتاي ۋرىنباەۆ پەن ورازالى اقىلبەكوۆ ەسىمدى جاستار جولدان بۇرعىلانىپ الىناتىن سىنامالاردى (كەرن) زەرتحانالىق جاعدايدا تەكسەرۋ, ولاردىڭ تىعىزدىعى مەن باسقا دا تەحنيكالىق تالاپتارعا سايكەس كەلۋىن باقىلاۋ جۇمىستارىن كورىپ قانا قويماي, ءوز قولدارىمەن اتقارىپ تا ءجۇر.
"جول سالاسىنىڭ مامانى اتانۋدى مەكتەپتە وقىپ جۇرگەن شاعىمدا ماقسات ەتىپ العا قويدىم. شۇكىر, بۇگىندە ارمانىم ورىندالدى. بۇيىرسا, وقۋىمدى اياقتاعان سوڭ "جول اكتيۆتەرىنىڭ ۇلتتىق ساپا ورتالىعى» ماڭعىستاۋ فيليالىنا جول زەرتحاناشىسى بولىپ قىزمەتكە تۇرۋدى قالايمىن. قازىرگى تاڭدا ءبىراز تاجىريبە جيناقتاپ قالدىم. ءبىر جاعىنان وندىرىستە جۇرگەنىم ءۇشىن قوماقتى اقى دا تولەنەدى. كەلەشەك وسى ۇجىمنىڭ ءبىر مۇشەسى بولعىم كەلەدى", دەيدى نارتاي ۋرىنباەۆ.
"جول اكتيۆتەرى ۇلتتىق ساپا ورتالىعى" رمك باس ديرەكتورى زامير ساعىنوۆتىڭ باستاماسىمەن 2020 جىلى "1000 مەكتەپ" ناۋقانى باستالدى. كوزدەلگەن ماقسات − مەكتەپ بىتىرۋشىلەرمەن تىكەلەي كەزدەسۋ وتكىزىپ, جول ماماندىعىنا تارتۋ.
"كارانتين باستالعانعا ورتا ءبىلىم بەرۋ مەكەمەلەرىنە ورتالىقتىڭ جول ينجەنەرلەرى, زەرتحاناشىلارى مەن كارتوگراف-ديەزيست ماماندارى بارىپ, بۇگىن وقۋشى − ەرتەڭگى جاس ماماندارمەن جۇزدەستى. سانەپيدەميولوگيالىق جاعداي تۇراقتالعان سوڭ, بۇل جۇمىستار جاڭا قارقىنمەن جالعاسادى. ماڭعىستاۋ وبلىسىندا 154 مەكتەپ بولاتىن بولسا, ءبىزدىڭ ۇجىم قىزمەتكەرلەرى 26 ورتا ءبىلىم بەرۋ ورداسىنا بارىپ, 9-11 سىنىپ وقۋشىلارىمەن كەزدەستى. بۇل جەردە اقتاۋ قالاسىنان بولەك, ورتالىققا جاقىن تۇرعان مۇنايلى جانە تۇپقاراعان اۋداندارى دا قامتىلدى", دەيدى فيليال ديرەكتورى ەلتاي تاياليەۆ.
تانىمدىق كەزدەسۋلەردە وبلىستا سالىنىپ جاتقان كولىك جولدارىنىڭ ساپاسىن باقىلاۋ ايتىلىپ, جول ماماندىقتارى تۋراسىندا جان-جاقتى تۇسىنىك بەرىلدى.
