ء«تىل ماسەلەسىنە بەيجاي قاراپ, نەمقۇرايدىلىق تانىتاتىن بولساق, مەملەكەتتىگىمىز بەن ۇلتتىق قاۋىپسىزدىگىمىزگە قاتەر ءتوندىرىپ الۋىمىز مۇمكىن» دەي كەلىپ مەملەكەت باسشىسى مەملەكەتتىك ءتىلدىڭ اياسىن كەڭەيتۋگە بايلانىستى ورەلى تۇجىرىمدارىن ورتاعا سالادى. «قازاق تىلىندە سويلەۋ ماقتانىش بولۋى ءۇشىن قوعامدا وعان دەگەن قاجەتتىلىكتى ارتتىرعان ءجون. مەملەكەتتىك قىزمەتكە, ونىڭ ىشىندە, حالىقپەن تىعىز جۇمىس ىستەيتىن لاۋازىمعا تاعايىنداۋ كەزىندە كاسىبي بىلىكتىلىگىنە قوسا, قازاق ءتىلىن جاقسى بىلەتىن ازاماتتارعا باسىمدىق بەرۋ كەرەك». مەملەكەتتىك قىزمەتشىلەر مەملەكەتتىك ءتىلدى ءبىلۋى ءتيىس دەپ ءجيى ايتىلاتىن اڭگىمەنىڭ باستى تەتىگى وسى. پرەزيدەنت قازاق تىلىنە قاجەتتىلىكتى ارتتىرۋ قاجەت ەكەنىن, حالىقپەن ەتەنە جۇمىس ىستەيتىن لاۋازىمعا كاسىبي بىلىكتىلىگىنە قوسا, قازاق ءتىلىن جاقسى بىلەتىن ازاماتتارعا باسىمدىق بەرۋ كەرەك ەكەندىگىن تايعا تاڭبا باسقانداي ايتىپ وتىر ەمەس پە. الداعى كۇندەرى پرەزيدەنتتىڭ وسى وي ورامدارى بيلىك تاراپىنان جۇزەگە اسىرىلاتىن بولسا, مەملەكەتتىك تىلگە قاتىستى قوردالانعان ماسەلەنىڭ ءتۇيىنى تارقاتىلا تۇسەتىنى انىق.
تاعى ءبىر تىلگە تيەك ەتەر جايت, مەملەكەت باسشىسى انا تىلىنەن بەيحابار ازاماتتارعا بايلانىستى قاتقىلداۋ سىني پىكىرىن ءبىلدىردى. ياعني «پارلامەنتتە نەمەسە ءباسپاسوز ءماسليحاتتارىندا مەملەكەتتىك تىلدە سويلەپ, پىكىر الماسا المايتىن مەملەكەتتىك قىزمەتكەر ۇعىمى, ەڭ الدىمەن, قازاق ازاماتتارىنىڭ اراسىندا – اناحرونيزمگە اينالۋعا ءتيىس». بيلىكتەگى قازاقتار انا ءتىلىن ءبىلۋى ءتيىس دەپ ۇقتىق ءبىز مۇنى.
قاسىم-جومارت توقاەۆتىڭ سۇحباتىندا ەلدىك ماسەلەسى دە, ەلدىكتى كوركەيتەتىن ەڭبەك ماسەلەسى دە قوزعالعان. ەلدىك دەمەكشى, پرەزيدەنت ەلىمىزدى وركەندەتۋ ءوز قولىمىزدا ەكەنىنە دە ايرىقشا توقتالعان. ء«بىزدىڭ وسىنداي سىندارلى ساتتە قاتەلەسۋگە ەش قاقىمىز دا, قۇقىمىز دا جوق. جانە مەملەكەت قۇرۋشى ۇلت رەتىندە بۇل ماسەلەنى ءبىرىنشى كەزەكتە ءوزىمىز تەرەڭ سەزىنۋىمىز قاجەت. ويتكەنى قازاق حالقىنىڭ تاعدىرى تاريح تارازىسىندا تۇر…» دەپ تۇيىندەدى مەملەكەتتىلىككە قاتىستى تۇجىرىمىن مەملەكەت باسشىسى.
ال ەڭبەككە قاتىستى ويى ءالى كۇنگە بەيقام قازاققا, جاھاندانۋ زامانىندا, باسەكەلەستىك كەزەڭ بەلەڭ العان تۇستا تويشىل داعدىسىنان ارىلماعان اعايىنعا قاراتا ايتىلعان ارناۋ ءسوز دەپ قابىلدادىق.
«قازىر «تويىڭ تويعا ۇلاسسىن» دەپ اندەتىپ, توي تويلاپ جۇرەتىن ۋاقىت ەمەس. بۇگىنگىدەي تەحنولوگيانىڭ زامانىندا توي-تومالاقتىڭ اڭگىمەسىن ايتىپ, ءبىر-ءبىرىن اسىرا ماقتاپ, اس ءىشىپ, اياق بوساتقانعا ريزا كەيىپتە ءجۇرۋ ادەتىنەن ارىلۋ كەرەك». پرەزيدەنت ق.توقاەۆتىڭ ەلدىك كرەدوسى بۇل. «حالىقتىڭ قازىناسى توي ەمەس», تىنىمسىز تىرلىك, ۇزدىكسىز ەڭبەك, سول ارقىلى ەلدىڭ وركەندەۋى, حالىقتىڭ كوركەيۋى ەكەندىگىن اڭعارتادى.
«مەملەكەتتىڭ ءوزى ولەرمەندىكپەن ءومىر سۇرەتىن كەزگە كەلدىك. سوندىقتان ەڭبەك ەتۋ – ءومىر ءسۇرۋ سالتىنا اينالىپ, باستى مىندەت سانالۋعا ءتيىس. توي قۋالايتىن ەمەس, وي قۋالايتىن كەزەڭمەن بەتپە-بەت كەلدىك. بۇل ءداۋىر – اقىل-ويدىڭ, عىلىم مەن ءبىلىمنىڭ, ەڭبەكتىڭ ءداۋىرى!» پاراساتتى پرەزيدەنتتىڭ پايىمى بۇل. وي قۋالاعان قازاقتىڭ ءورىسى دە كەڭەيىپ, وركەنيەتتەگى دە ورنى بولەك بولۋعا ءتيىس. ەندەشە, سول كۇندەرگە تەزىرەك جەتۋ ءۇشىن ەتكەن ەڭبەگىمىزدىڭ ەسەسىن بەرسىن.
