25 ماۋسىم، 2020

جامبىلدا جىل سايىن جاقسىلىق ۇشكەمپىروۆ اتىنداعى تۋرنير وتەدى

67 رەت كورسەتىلدى

م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە اۋليەاتا وڭىرىنەن شىققان تانىمال سپورتشىلارمەن كەزدەسۋ ءوتتى. جيىندا جامبىل وبلىسىنىڭ اكىمى بەردىبەك ساپارباەۆ اتاقتى سپورت ساڭلاقتارىنا ەلىمىزدىڭ مارتەبەسىن اسقاقتاتىپ جۇرگەن ەڭبەكتەرى ءۇشىن العىسىن ءبىلدىردى. سونىمەن قاتار ول جامبىلدىق سپورتشىلاردىڭ بىرنەشە رەت وليمپيادا چەمپيونى بولعانىن اتاپ ءوتتى، - دەپ حابارلادى Egemen.kz.

جالپى، جامبىل وڭىرىندە سپورت سالاسىن قولداۋ جوعارى دەڭگەيدە. ماسەلەن، وبلىس ورتالىعىنداعى "تاراز-ارەنا" سپورت سارايىنىڭ جانىنان مۇز ايدىنى، جەڭىل اتلەتيكا مانەجى، تەننيس كورتى اشىلىپ، اعىمداعى جىلى وبلىس بويىنشا 13 سپورت نىسانى مەن 92 الاڭشا سالىنادى. سونىمەن قاتار قازىرگى تاڭدا وڭىردەگى بارلىق مەكتەپتەردىڭ سپورت زالدارى رەتكە كەلتىرىلىپ، وقۋشىلارعا سپورتپەن شۇعىلدانۋعا بارىنشا جاعداي جاسالعان. بولاشاقتا بارلىق اۋلالار سپورت الاڭشالارىمەن، بارلىق اۋدان ورتالىقتارى سپورت كەشەندەرىمەن قامتىلادى. جيىن بارىسىندا بەردىبەك ساپارباەۆ جاستاردى سپورتقا باۋلۋ ماقساتىندا اۋقىمدى تۋرنيرلەر وتكىزۋ كەرەكتىگىن ايتتى. بۇل رەتتە ايگىلى سپورتشى، قازاقستاننىڭ ەڭبەك ەرى جاقسىلىق ۇشكەمپىروۆ اتىنداعى حالىقارالىق كۇرەس ءتۋرنيرىن ۇيىمداستىرۋ كەرەكتىگى ايتىلدى. كەزدەسۋدە بەردىبەك ساپارباەۆ جاقسىلىق ۇشكەمپىروۆتىڭ وسىدان 40 جىل بۇرىن وليمپيادا ويىندارىندا جەڭىسكە جەتكەن العاشقى قازاق ەكەنىن، ءداستۇرلى تۇردە وتەتىن تۋرنير وسى ايتۋلى داتاعا ارنالۋى كەرەك ەكەنىن اتاپ ءوتتى. اتاقتى سپورتشى قۇرمەتى ءۇشىن وبلىس اكىمىنە العىس ايتتى.

سونىمەن قاتار جيىنعا قاتىسقان وزگە دە سپورتشىلار مەملەكەتتىڭ قولداۋىنىڭ جوعارى دەڭگەيدە ەكەنىن اڭگىمەلەدى. پاراليمپيادا چەمپيونى ءزۇلفيا گابيدۋللينا سپورتتىق-ساۋىقتىرۋ كەشەنىن سالۋ كەرەكتىگىن جەتكىزدى. ال، بەردىبەك ساپارباەۆ سپورتشىنىڭ ۇسىنىسىن قولدايتىنىن ايتىپ، بۇل ماسەلەنى مىندەتتى تۇردە قاراستىرۋعا ۋادە بەردى. كەزدەسۋ بارىسىندا "قازاقستان بارىسى" ءتۋرنيرىنىڭ ءۇش دۇركىن جەڭىمپازى بەيبىت ىستىباەۆ سپورتتىق مەكتەپ-ينتەرناتتىڭ كوبەيۋى اۋىل بالالارىنىڭ سپورتپەن اينالىسۋىنا ۇلكەن مۇمكىندىكتەر بەرەتىنىن اتاپ ءوتتى. سونداي-اق، كەزدەسۋدە بولات ءجۇمادىلوۆ، باقتيار ارتاەۆ، اقجۇرەك تاڭاتاروۆ، ەلدوس سمەتوۆ، گۋزاليا گافۋروۆا، ءابىلحان امانقۇل، رۋسلان جاپاروۆ سياقتى جامبىلدىق تانىمال سپورتشىلار دا بولدى. ال، جيىن سوڭىندا م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ بۇگىندە ۇمىتىلىپ بارا جاتقان ۇلتتىق سپورت تۇرلەرىنە ءتيىستى كوڭىل بولىنبەي وتىرعانىن جەتكىزدى. بۇل رەتتە بەردىبەك ساپارباەۆ بۇل ۇسىنىستى قولدايتىنىن ايتتى.

 

جامبىل وبلىسى

سوڭعى جاڭالىقتار

ۇقساس جاڭالىقتار