"شىن مانىندە, وزىق ويلى زيالى قاۋىمنىڭ پىكىرى الەۋمەتتىك شيەلەنىس كەزىندە ماڭىزدى ءرول اتقارادى. ادامدار اقىل-پاراساتى ارقىلى ىشكى تۇيسىگىنە قۇلاق اسىپ, وزىنە قاجەتتى قورىتىندى جاساپ, وتكەن ىستەن ساباق الادى. اسىرەسە بۇل ەجەلدەن كەلە جاتقان ءداستۇرى بار ءبىزدىڭ قوعام ءۇشىن وتە وزەكتى. پاندەميا كەزىندە مەملەكەتتىك ساياساتتى جۇزەگە اسىرۋعا قوسقان ەلەۋلى ۇلەسى ءۇشىن بارشا زيالى قاۋىم وكىلدەرىنە, ونىڭ ىشىندە اكادەميك تورەگەلدى شارمانوۆقا شىنايى ريزاشىلىعىمدى بىلدىرەمىن. سونداي-اق ءبىزدىڭ بەلگىلى اقىن-جازۋشىلارىمىز سوڭعى كەزدەگى وقيعالارعا بەلسەندىرەك ارالاسىپ, جاستارعا ومىرلىك تاجىريبەسىن ۇيرەتىپ, تەمىرقازىق سەكىلدى جول كورسەتە الادى دەپ ويلايمىن", - دەدى پرەزيدەنت.
مەملەكەت باسشىسى قازىر بۇكىل دۇنيەجۇزى پاندەميا سالدارىمەن كۇرەسىپ جاتقانىن, الەمدىك ەكونوميكا كوز الدىمىزدا قۇلدىراپ, جۇرتتىڭ ءومىر ءسۇرۋ سالتى وزگەرگەنىن جانە وسى ۇردىستەر كۇن تارتىبىندەگى وزەكتى ماسەلەلەرگە اينالعانىن باسا ايتتى.
"مىنە, وسىنداي كەزدە جاس ۇرپاققا بەدەلدى اقىل-وي يەلەرىنىڭ پاراساتتى پىكىرى اۋاداي قاجەت. ءبارىمىزدى, اسىرەسە جاستاردى "ارى قاراي قالاي ءومىر سۇرەمىز؟" دەگەن ساۋال مازالايدى. وسىنداي ساتتە ءبىزدىڭ كوزقاراسىمىز, بولمىسىمىز, وسى ءبىز ءومىر ءسۇرىپ جاتقان جاڭا زاماننىڭ تالابىنا ساي بولۋى كەرەك. ياعني تاريحي تۇرعىدان جاڭارتىلعان قۇندىلىقتارعا بەت بۇرۋعا ءتيىسپىز. بىزگە قازىرگى زاماننىڭ سىن-قاتەرلەرىنە توتەپ بەرەتىن اقىل-وي تۇجىرىمى قاجەت. جوعارى زاماناۋي تەحنولوگيا, روبوتتار, جاساندى ينتەللەكت داۋىرىندە اقىل-كەڭەس تۇسىنىگى ەرەكشە ماڭىزدى بولماق. جاڭا زاماندا ار, نامىس, ۇيات سياقتى ادامي قاسيەتتەرگە قاجەتتىلىك بولا ما؟ مەنىڭ ويىمشا, بۇل – زيالى قاۋىم وكىلدەرى تالقىلايتىن اۋقىمدى فيلوسوفيالىق ماسەلە. ۇلگى-ونەگە, ۇلتتىق قۇندىلىقتار بولماسا, ماشينالار مەن روبوتتار الەمىندە جۇتىلىپ كەتەتىنىمىز ءسوزسىز. ءبىزدىڭ ۇلى اقىن-جازۋشىلارىمىزدىڭ شىعارمالارى دا ماڭىزىن جوعالتادى. ارينە, مۇنداي جاعدايدىڭ مۇلدە بولماعانى جاقسى. سوندىقتان زيالى قاۋىم وكىلدەرى بولاشاق ءومىر تۋرالى ماسەلەنى قازىردەن وي تارازىسىنا سالا بەرۋگە ءتيىس", - دەدى ەل پرەزيدەنتى.
