«ۇلتتىق كوميسسيا وتباسى مەن بالالاردىڭ مۇددەلەرىن قورعاۋعا قاتىستى وزەكتى ماسەلەلەردى تالقىلاۋ بويىنشا قوعامدىق ديالوگتى دامىتۋدى جالعاستىرۋدا. «وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى» زاڭ جوباسى ازىرلەندى. بۇگىنگى تاڭدا قۇقىق قورعاۋشى ۇەۇ-نىڭ بەلسەندى قاتىسۋىمەن 13 ونلاين-تالقىلاۋ وتكىزىلدى», دەدى ل.رامازانوۆا.
وتىرىستا ەلىمىزدەگى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ جونىندەگى ءىس-شارالار جوسپارىنىڭ ءبىرىنشى كەزەڭىنىڭ ورىندالۋ قورىتىندىسى باياندالدى.
جيىندا بەلگىلى بولعانداي, وتباسى ينستيتۋتىن نىعايتۋعا, وتباسىلىق قۇندىلىقتاردى ىلگەرىلەتۋگە باعىتتالعان بىرقاتار الەۋمەتتىك-ماڭىزدى جوبالار ىسكە اسىرىلعان. جوعارعى سوتتىڭ قولداۋىمەن «باقىتتى وتباسى» وتباسىلىق سوتتار جانىنداعى وتباسىن رەسۋرستىق قولداۋدىڭ 12 ورتالىعىنىڭ قىزمەتى قامتاماسىز ەتىلگەن (نۇر-سۇلتان, الماتى قالالارىندا, قاراعاندى, اقمولا, اتىراۋ, جامبىل, قوستاناي جانە شىعىس قازاقستان وبلىستارىندا). ەسەپتى كەزەڭدە ورتالىقتارعا 2 750-دەن استام ادام, ونىڭ ىشىندە اجىراسۋ ماسەلەلەرى بويىنشا – 2030 ادام ءوتىنىش جاساعان. تاتۋلاسۋعا دايىن ادامدار سانى 38,1%-دى (774 ادام) قۇراعان.
«ÓNEGE» جوباسى شەڭبەرىندە 9 وڭىردە الەۋمەتتىك قىزمەتتەر 1125 كونسۋلتاتسيالىق قىزمەت كورسەتتى جانە وتباسىلارداعى ومىرلىك قيىن جاعدايدىڭ 225 وقيعاسى بويىنشا كومەك بەرگەن. 19 مىڭ ادام تەگىن كەڭەس العان. ولاردىڭ 350-ءى قيىن ومىرلىك جاعدايعا تاپ بولعان.
«رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ قۇرىلىمىندا وتباسى ينستيتۋتىن زەرتتەۋ ورتالىعى اشىلعان. بيىل ورتالىق تاراپىنان وتباسىنىڭ وزەكتى ماسەلەلەرى بويىنشا بىرقاتار زەرتتەۋلەر جۇرگىزىلمەك.
2019 جىلى نۇر-سۇلتان قالاسىندا «جانۇيا» ورتالىعى اشىلدى, ول ء«بىر تەرەزە» قاعيداتى بويىنشا قالا تۇرعىندارىنا كورسەتىلەتىن مەملەكەتتىك قىزمەتتەردى بىرىكتىرەدى جانە وتباسىلارمەن جەكە جۇمىس جۇرگىزەدى. بۇگىنگى كۇنى ورتالىققا 14,8 مىڭ سۇراقپەن 7 مىڭعا جۋىق ادام جۇگىنگەن. 11,5 مىڭنان استام كەڭەس بەرىلىپ, ونىڭ بارىسىندا 3,5 مىڭنان استام ماسەلە شەشىلدى.
تالقىلاۋ بارىسىندا قازاقستانداعى وتباسىلىق جانە گەندەرلىك ساياسات سالاسىنداعى نىسانالى ينديكاتورلارعا قول جەتكىزۋگە بايلانىستى بىرقاتار ماسەلەلەر اتاپ ءوتىلدى. وتىرىسقا قاتىسۋشىلارعا يۋنفپا-نىڭ قازاقستانداعى وكىلدىگى وتكىزگەن «ۇرپاق جانە گەندەر» زەرتتەۋ قورىتىندىلارى ۇسىنىلدى. دەموگرافيالىق دامۋدى انىقتايتىن حالىقتىڭ قونىستانۋى سالاسىنداعى فاكتورلاردىڭ ءبىرى ادامنىڭ رەپرودۋكتيۆتى دەنساۋلىعىن قورعاۋ بولىپ تابىلاتىنى, ال ونىڭ باستى ماقساتى – دەنى ساۋ بالالاردىڭ دۇنيەگە كەلۋى اتاپ ءوتىلدى.
سوڭىندا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ 20 جىلدىعىنا ارنالعان كىتاپ تانىستىرىلدى. وتىرىس قورىتىندىسى بويىنشا ءتيىستى مينيسترلىكتەر مەن جەرگىلىكتى اتقارۋشى ورگاندارعا ناقتى تاپسىرمالار بەرىلدى.
