ەلنارانىڭ حالىقارالىق ۇيىمدارداعى اقپارات جانە كوممۋنيكاتسيا سالاسىنداعى جۇمىسى قاتارداعى قىزمەتتىڭ ءبىرى سەكىلدى كورىنگەنىمەن, وعان جۇكتەلگەن جاۋاپكەرشىلىك وتە جوعارى. سەبەبى ەۋروپالىق وداق, بۇۇ سەكىلدى بەدەلدى ۇيىمدار قازاقستاندى, ونىڭ حالقىن, تۇرمىسىن جانە قۇندىلىقتارىن جاس ماماننىڭ كۇندەلىكتى جۇمىسى ارقىلى تانيدى. ەل تۇرعىندارىنىڭ كوڭىل كۇيىن, ولارعا نە قاجەت ەكەنىن دە جەتكىزەتىن وسى – ەلنارا. اسا ماڭىزدى حالىقارالىق قۇجاتتار مەن ستراتەگيالار اتقارىلعان جۇمىسقا نەگىزدەلىپ جاسالاتىنى دا انىق. وسىلايشا, ونىڭ قازىرگى جۇمىسى حالىقارالىق قوعامداستىق الدىندا قازاقستاننىڭ بەينەسىن قالىپتاستىرۋ سەكىلدى ودان دا بيىك ماقساتقا قىزمەت ەتىپ كەلەدى. وسىنى تۇسىنگەن كەيىپكەرىمىز ءار جوبانى قولعا العاندا ونىڭ ءساتتى شىعۋىنا ەرەكشە ءمان بەرەتىنىن ايتادى.
قازىر ەلنارا بىرىككەن ۇلتتار ۇيىمىنىڭ قازاقستاندا تىركەلگەن 22 اگەنتتىگىنىڭ اقپاراتتىق جۇمىسىن ۇيلەستىرىپ, قاداعالاپ وتىرادى. بۇل ۇيىمدار قاتارىندا بارشاعا بەلگىلى بۇۇ دامۋ باعدارلاماسى, يۋنيسەف بالالار قورى, يۋنەسكو ءبىلىم, عىلىم جانە مادەنيەت جونىندەگى ۇيىمى جانە بۇۇ-ايەلدەر سەكىلدى ۇجىمدار بار. ودان بولەك ول حالىقارالىق ۇيىمنىڭ ماقساتى مەن مىندەتتەرىن, ماڭىزدى قۇجاتتارى مەن باستامالارىن ءوز وتانداستارىنا ءتۇسىندىرىپ, ەكىجاقتى ىنتىماقتاستىق ورناتۋعا تىرىسادى. بالا كەزىنەن ونەرگە قىزىققان كەيىپكەرىمىز بۇگىنگى جۇمىسىندا دا مادەني شارالارعا كوپ كوڭىل بولەدى ەكەن.
– جالپى, بارشاعا تۇسىنىكتى ءبىر ءتىل بولسا, ول – ونەر ءتىلى. مەن حالىقارالىق ۇيىمدارداعى جۇمىس تاجىريبەمدە وعان تولىق كوز جەتكىزدىم. كەز كەلگەن ويدى, جوبانى ونەر ارقىلى نە شىعارماشىلىق تۇرعىدان جەتكىزگەندە بارشاعا تۇسىنىكتى بولادى. ونەردى ءتۇسىنۋ ءۇشىن ارنايى بىلىكتىلىكتىڭ قاجەتى جوق, بۇل – بارشا ادامزاتقا ورتاق قۇندىلىق, – دەيدى ول.
ەلنارا كەلتىرگەن مىسالدارعا قاراپ, راسىندا, حالىقتار دوستىعىن بارلىق تاراپقا ورتاق دۇنيەلەر ارقىلى نىعايتۋعا بولاتىنىنا ءسوزسىز كەلىسەسىڭ. ماسەلەن, ەۋروپا ەلدەرىنىڭ ۇلتتىق تاعامدارىنا ارنالعان قازاق تىلىندەگى اسپازدىق كىتاپقا قىزىققاندار كوپ بولعان. ودان بولەك جاقىندا ەۋروپا حالىقتارىنىڭ ەرتەگىلەرى دە قازاقشا سويلەيتىنىن بىلدىك. ايتىلعان جوبالارعا يلليۋستراتسيالار سالۋدى قازاق سۋرەتشىلەرىنە سەنىپ تاپسىرعان. بۇل دا بولسا الەم تۇرعىندارىن جاقىنداستىرىپ, ءبىرىنىڭ بويىنان وزگەشەلىك ەمەس, ورتاق نارسە ىزدەۋگە سەپ بولادى. سوڭعى وقيعالار دۇنيە ءجۇزىن «جۇقپالى جاۋعا» بىرگە قارسى تۇرۋعا ءماجبۇر ەتتى. كۇش بىرىكتىرۋ, ىنتىماقتاستىق تۇسىنىگى بۇرىن-سوڭدى ءدال بۇگىنگىدەي وزەكتى بولماپ ەدى. بەلگىسىز ىندەتتىڭ اۋىرتپاشىلىعى بارشاعا بىردەي تۇسكەن ساتتە بەلگىلى ۇيىمدار قول قۋسىرىپ قالمادى. وسى ورايدا جاس ديپلومات بالالارعا ارنالعان جوبالاردىڭ ءبىرىن ەرەكشە ماقتانىشپەن ايتىپ بەردى. ءبىر ساتتە دۇنيە جۇزىندە ميلليونداعان ويىن بالاسىنىڭ ۇيدە وتىرۋى اتا-اناعا وڭاي بولماعانى بەلگىلى. بىرىككەن ۇلتتار ۇيىمى COVID-19 ىندەتى تۋرالى, ۇيدە وتىرۋدىڭ, ساقتىق شارالارىنىڭ ماڭىزدىلىعىن تۇسىندىرەتىن, قازاق ءتىلىن قوسا العاندا 17 تىلگە اۋدارىلعان ەرتەگىنى ۇسىندى. كەيىپكەرىمىز كەيىن اتا-انالار مەن باستاۋىش سىنىپ مۇعالىمدەرىنىڭ جىلى لەبىزدەرى تولاسسىز بولعانىن قۋانىشپەن جەتكىزدى. ءوز جۇمىسىڭنىڭ قوعامعا بەرگەن پايداسىن كورۋ – كەز كەلگەن مامان ءۇشىن ۇلكەن مارتەبە.
ەلنارانى سوزگە تارتقانىمىزدا, ەڭ الدىمەن, ءوزىنىڭ جۇمىسى, ءساتتى شىققان جوبالارى تۋرالى ايتا جونەلدى. بۇل دا تۇسىنىكتى. ادام تۋرالى ونىڭ جەتكەن جەتىستىكتەرى مەن اتقارعان جۇمىسى ايتىپ تۇرۋى كەرەك دەگەن قاعيداعا ءبىز دە سەنەمىز. دەسە دە وقىرمانعا دارىندى ماماننىڭ ءجۇرىپ وتكەن جولى قىزىق بولارى ءسوزسىز. حالىقارالىق ۇيىمدا قىزمەت ەتۋ ءۇشىن شەتەلدە ءبىلىم الۋ كەرەك دەگەن قاتىپ قالعان تۇسىنىكتى ەلنارا تولىقتاي تەرىسكە شىعارادى. ەلىمىزدەگى ۇلتتىق ۋنيۆەرسيتەتتىڭ بىرىندە حالىقارالىق قاتىناستار ماماندىعى بويىنشا ءبىلىم العان ول وتاندىق ءبىلىم بەرۋ سالاسىن جوعارى باعالايدى. ول ءبىزدىڭ ءبىلىم وشاقتارى شەتەلدەگىلەردەن كەم تۇسپەيتىنىن ايتا كەلە, بارلىعى ادامنىڭ وزىنە بايلانىستى دەگەن پىكىردى العا تارتتى.
– جاستارعا باسقالارعا جالتاقتاماۋعا جانە ءوزىن وزگەلەرمەن سالىستىرماۋعا كەڭەس بەرەمىن. ادام بويىنداعى قاسيەتتەر مەن بىلىمگە, تابىستى بولۋعا دەگەن تالپىنىس اسا ماڭىزدى. شەتەلدە وقىپ كەلگەن ستۋدەنتتەردىڭ جوعارى لاۋازىمدا جۇمىس ىستەۋىم كەرەك دەۋىن قۇپتامايمىن. ودان بولەك جۇمىس بەرۋشىلەردىڭ وزگە ەلدە ءبىلىم العانداردى قازاقستاندا وقىعان جاستاردان جوعارى ساناۋى دۇرىس ەمەس. مۇنداي جاعداي كەيدە كەزدەسىپ جاتادى. باستىسى, ازاماتتىڭ بويىنداعى كاسىبي داعدىعا ءمان بەرۋ كەرەك, – دەيدى جاس مامان.
قازاقستاندا باكالاۆر, ماگيستراتۋرا جانە دوكتورانتۋرانى تامامداعان ەلنارا كەيىنىرەك اقش, ەۋروپا ەلدەرىندە بىرنەشە ايلىق تاعىلىمدامادان دا وتكەن. بۇل ونىڭ حالىقارالىق قاتىناستار بويىنشا العان ءبىلىمىن تاجىريبەمەن ۇشتاستىرۋعا تاپتىرماس مۇمكىندىك بولدى. ەڭبەك جولىن الەمدىك ەكونوميكا جانە ساياسات ينستيتۋتىنان (اەسي) باستاعان ول بۇگىندە حالىقارالىق دارەجەدەگى ديپلوماتقا اينالدى. ونىڭ قاجىرلى ەڭبەگىن حالىقارالىق ۇيىمدار عانا ەمەس, وتاندىق ساراپشىلار دا جوعارى باعالادى. ەلنارا «قازاقستاننىڭ 100 جاڭا ەسىمى» جوباسىندا جەڭىمپاز اتانۋىن ماراپاتتان گورى, ءوزى سەكىلدى دارىندى جاستارمەن تانىسىپ-بىلىسۋگە بەرىلگەن تاماشا مۇمكىندىك دەپ ەسەپتەيدى. ء«وز سالاسىندا ۇزدىك اتانعان جاستارمەن تانىسىپ, بىرلەسكەن جوبالاردى جۇزەگە اسىرۋعا بولادى. وسىلايشا, بولاشاعىنان ءۇمىت كۇتتىرەتىن جاستار ءبىر الاڭعا جينالىپ, ءوزارا تانىستىقتى ورتاق مۇراتقا پايدالانا ءبىلۋىمىز كەرەك», دەيدى ە.باينازاروۆا.
كەيىپكەرىمىز بولاشاقتا ءوزىن بۇۇ قۇرىلىمىندا قازاقستاننان شىققان حالىقارالىق دارەجەدەگى ديپلومات رەتىندە كورگىسى كەلەتىنىن ايتادى. بۇل تالپىنىسىنا ەلىمىزدە ۇلگى بولاتىن تۇلعا دا بار. ەل پرەزيدەنتى قاسىم-جومارت توقاەۆتىڭ بۇۇ باس حاتشىسىنىڭ ورىنباسارى, جەنەۆاداعى بولىمشەسىنىڭ باس ديرەكتورى لاۋازىمدارىندا قىزمەت ەتكەنىن بىلەمىز. ەلنارانىڭ ايتۋىنشا, جالپى ۇيىم قىزمەتكەرلەرىنىڭ قاتارىندا قازاقستاننان, ورتالىق ازيادان شىققان ماماندار كوپ ەمەس, ال ايەل ديپلوماتتار ءتىپتى سيرەك كەزدەسەدى. حالىقارالىق بەدەلدى ۇيىمدا قىزمەت ەتۋ, ءوز ەلىڭدى تانىستىرۋ – كەز كەلگەنگە بۇيىرمايتىن باق. بۇل تاجىريبەدەن وتكەن ماماننىڭ كاسىبي بىلىكتىلىگىنە ءشۇبا كەلتىرۋ قيىن. جىلدار بويى جيناعان باي تاعىلىمىن ۋاقىتى كەلگەندە تۋعان ەلىنىڭ يگىلىگى ءۇشىن ايانباي قولداناتىنىنا كامىل سەنەمىز. ال تالاپشىل دا العىر ەلنارانىڭ اسقاق ارمانى ورىندالاتىنى ءسوزسىز.
