قازاقستان • 24 ماۋسىم، 2020

بەيبىت اتامقۇلوۆ رامين ناميك وگلى گۋلۋزادامەن تەلەفون ارقىلى سويلەستى

26 رەت كورسەتىلدى

يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ازەربايجان رەسپۋبليكاسىنىڭ كولىك، بايلانىس جانە جوعارى تەحنولوگيالار ءمينيسترى رامين ناميگ وگلى گۋلۋزادە تەلەفون ارقىلى سويلەستى. بۇل تۋرالى يدم ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

تاراپتار كولىك تاسىمالى، جۇك ءترانزيتى، اۋە قاتىناسى سياقتى سالالارداعى ەكىجاقتى ىنتىماقتاستىقتىڭ قازىرگى جاعدايى تۋرالى اقپارات الماستى. كوروناۆيرۋس پاندەمياسىنىڭ تارالۋىنا قارسى ەنگىزىلگەن ۋاقىتشا شەكتەۋ شارالارىنا قاراماستان تەمىرجول جانە اۆتوموبيل كولىگىمەن جۇك تاسىمالى كولەمى ارتقان.

وتكەن جىلى قازاقستان مەن ازەربايجان اراسىندا اۆتوكولىكپەن جۇك تاسىمالداۋ كولەمى 22 مىڭ توننانى قۇرادى. قازاقستان تەمىر جولىمەن جۇك ءترانزيتىنىڭ كولەمى 38،66 مىڭ توننانى قۇراپ، 32% ارتتى.. بىلتىر ءساۋىر ايىندا اقتاۋ-باكۋ فيدەرلىك جەلىسىنىڭ اشىلۋى ارقاسىندا كونتەينەرلىك تاسىمال كولەمى 14،7 مىڭ جفب-دان 24،8 مىڭ جفب-عا دەيىن ءوستى.  

كوروناۆيرۋستىق ينفەكتسيانىڭ تارالۋىنا جول بەرمەۋ ماقساتىندا بۇگىنگى تاڭدا اقتاۋ جانە قۇرىق تەڭىز پورتتارى ارقىلى جولاۋشىلار تاسىمالىنا ۋاقىتشا تىيىم سالىنعانىن ايتۋ كەرەك. بىراق ونىڭ وتانعا ورالاتىن قازاقستان ازاماتتارىنا قاتىسى جوق. ال جۇك تاسىمالى شتاتتىق رەجيمدە ورىندالۋدا. بيىلعى 6 ايدا تاسىمال كولەمىن 1 ملن تونناعا دەيىن جەتكىزۋ جوسپارلانىپ وتىر. بۇل وتكەن جىلدىڭ ءتيىستى كەزەڭىمەن سالىستىرعاندا 17% كوپ.

سونداي-اق تاراپتار ەلدەردەگى جانە الەمدەگى ەپيدەميالىق جاعدايعا قاراي ەكى ەل اراسىنداعى اۋە قاتىناسىن ۇستىمىزدەگى جىلدىڭ 1 تامىزىنان قايتا باستاۋ تۋرالى ماسەلەنى قاراستىرۋعا كەلىستى. قازىرگى كەلىسىمدەرگە سايكەس ءار تاراپقا اپتاسىنا 16 جولاۋشى جانە جۇك رەيسىن ورىنداۋعا رۇقسات ەتىلگەن.  

ەسكە سالا كەتەيىك، كوروناۆيرۋس پاندەمياسىنا بايلانىستى شەكتەۋ شارالارى ەنگىزىلگەنگە دەيىن قازاقستاندىق اۋە كومپانيالارى  ("ەير استانا"، "SCAT") اپتاسىنا 13 رەيس جاساپ كەلدى. ال ازەربايجاننىڭ اۋە كومپانيالارى  ("اZAL"، "Silk Way West") اپتاسىنا 5 رەيس ورىندايتىن.

سوڭعى جاڭالىقتار

ۇقساس جاڭالىقتار