تولەبي اپب-نە جەرگىلىكتى تۇرعىن شاعىم تۇسىرەدى. جابىرلەنۋشى ايەلدىڭ ايتۋىنشا وزىنە جاقسى تانىس ەمەس ادام, ءۇش جىل مەرزىمگە باس بوستاندىعىنان ايىرىلعان قاينىسىن تۇرمەدەن بوساتىپ بەرەمىن دەپ الداپ, سەنىمىنە كىرگەن. سودان تۇرعىن الاياققا الدانىپ, بىرنەشە ءبولىپ اقشا بەرگەنىن, ءانى-مىنە شىعارادى دەگەنىنە سەنگەنىن, وسىلايشا جىلعا جۋىق ۋاقىت ءوتىپ, ەندى پوليتسەيلەردەن باسقا ەشكىم كۇدىكتىنى ۇستاي المايتىنىن ايتىپ, كومەك سۇراعان.
اتالعان جايت قر قك-ءنىڭ 190-بابى “الاياقتىق” بويىنشا تىركەلگەن. جابىرلەنۋشىگە كەلتىرىلگەن شىعىن كولەمى 1,5 ميلليون تەڭگەنى قۇرادى. تولەبيلىك تۇرعىندى الداپ تۇسىرگەن الاياقتى انىقتاپ, ۇستاۋ ماقساتىندا تولەبي اۋداندىق پوليتسيا ءبولىمىنىڭ قىراعى پوليتسەيلەرى قاتارىنان جەدەل-تەرگەۋ توبى قۇرىلعان. ءتارتىپ ساقشىلارى جابىرلەنۋشىنىڭ ايتۋىمەن كۇدىكتىنى ىزدەپ, باسقا اۋدان, قالالارعا باعىتتامالار بەرگەن.
ناتيجەسىندە الاياقتىڭ جەكە-باسى انىقتالىپ, قاشىپ جۇرگەن ول, ۇيىنە كەلگەن جەرىنەن ۇستالدى. كۇدىكتى شىمكەنت قالاسىنىڭ تۇرعىنى بولىپ شىقتى. تەرگەۋ بارىسىندا انىقتالعانداي كۇدىكتى جابىرلەنۋشىمەن كەزدەيسوق كەزدەسىپ قالىپ, اڭگىمە اراسىندا سوتتالعان قاينىسىن شىعارا الاتىن ايتىپ, الداپ, ودان اقشا العانىن تولىق مويىندادى. كۇدىكتى ءوز سوزىندە وسى قىلمىستى اقشا قاجەت بولعاندىقتان, وڭاي جولمەن ولجالى بولۋ ماقساتىندا جاساعانىن جەتكىزدى. كۇدىكتىنىڭ باس شاراسى قولحاتپەن بوساتىلدى. قازىرگى تاڭدا سوتقا دەيىنگى تەرگەۋ امالدارى “الاياقتىق” بابىمەن جۇرگىزىلىپ, جيناقتالعان ماتەريالدار سوتقا جولدانعان.
تۇركىستان وبلىسىنىڭ پوليتسەيلەرى تۇرعىندارعا وزىڭىزگە بەيتانىس ادامدارعا سەنبەۋدى, ولاردىڭ زاڭسىز ۇسىنعان ۇسىنىستارىن قابىل الماۋدى ەسكەرتەدى. “جۇمىسقا تۇرعىزىپ بەرەمىن, مەملەكەتتىك جاردەماقى, كومەك الىپ بەرەمىن, كەزەكسىز تىرلىگىڭىزدى ءبىتىرىپ بەرەمىن” – دەگەن سارىندا ۋادە بەرەتىن الاياققا سەنىم ارتپاۋعا شاقىرادى.
