جالپى, بۇگىندە تەڭىزدەن جىلىنا جەتى مىڭ تونناداي بالىق اۋلانىپ, ونىڭ ەكى مىڭ تونناسى ەكسپورتتالادى. قازىر ايدىن 18 اۋماققا ءبولىنىپ, اۋداندا 8 بالىق وڭدەۋ زاۋىتى جۇمىس ىستەپ تۇر. ولاردىڭ ءونىمى قازىر الەمنىڭ ءار تۇكپىرىنەن تابىلادى.
بىراق بوگەت ارقىلى بالىقتىڭ ءولى تەڭىزگە قاراي اۋىپ كەتۋى وسى كۇنگە دەيىن وزەكتى ماسەلە بولىپ كەلگەن ەدى. حالىقارالىق ارالدى قۇتقارۋ قورى ماماندارى ىزدەنىسىنىڭ ناتيجەسىندە كوكارالدا بالىقتاردى توسپادان وتكىزبەيتىن گيدرواكۋستيكالىق قۇرىلعى ىسكە قوسىلدى. قور مەن حالىقارالىق ىنتىماقتاستىق جونىندەگى گەرمان قوعامداستىعى (GIZ) جانە وبلىستىق اكىمدىك اراسىنداعى مەموراندۋمى اياسىندا جۇزەگە اسقان جوبا قۇنى – 150 ملن تەڭگە.
حالىقارالىق ارالدى قۇتقارۋ قورى ديرەكتسياسىنىڭ ديرەكتورى بولات بەكنياز قۇرىلعىنى «بالىق شارۋاشىلىعى عوو» جشس ماماندارى پاتەنتتەپ العانىن ايتادى.
– جىل سايىن كىشى ارالدان ءولى تەڭىزگە قاراي 5 مىڭ تونناعا جۋىق ءىرىلى-ۇساقتى بالىق اۋىپ, قىرىلىپ قالىپ جاتىر. وسىنى بولدىرماۋ باعىتىنداعى ءبىزدىڭ ىزدەنىسىمىزدى حالىقارالىق ىنتىماقتاستىق جونىندەگى گەرمان قوعامداستىعى (GIZ) قولداپ, توسپاعا قوندىرعى ورناتىلدى. ماماندار ونى 2 جىل كولەمىندە تاجىريبەدەن وتكىزەدى, – دەيدى بولات قابىكەن ۇلى.
شاراعا گەرمانيا فەدەراتيۆتىك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى تيلو كلينەر, وبلىس اكىمىنىڭ ورىنباسارى باقىت جاقانوۆ, كەزىندە ەلىمىزدىڭ بالىق شارۋاشىلىعى مينيسترلىگىن باسقارعان, بەلگىلى مەملەكەت جانە قوعام قايراتكەرى قۇدايبەرگەن سارجانوۆ قاتىسىپ, باستاماعا ساتتىلىك تىلەدى.
– ادامزات بالاسى ءۇشىن تابيعات ورتاق. سوندىقتان دا بىرلەسكەن ءىسىمىزدىڭ بۇگىنگى ناتيجەسىن كورىپ قۋانىپ تۇرمىن. ونىڭ ءساتتى بولارىنا سەنەمىن, – دەدى ەلشى تيلو كلينەر.
توسپا تۇبىنە ورنالاسقان قۇرىلعى بالىقتى دابىل ارقىلى ۇركىتىپ تۇرادى. ماماندار بالىق «اۋەنگە» بوي ۇيرەتىپ الماۋى ءۇشىن قۇرىلعى شىعاراتىن دىبىستى ءجيى وزگەرتىپ تۇرۋدى ويلاستىرىپ وتىر.
قىزىلوردا
