تيگەن اۋىلى – ۇلى جولدىڭ بويىنداعى ءوز زامانىنا لايىقتى الەۋمەتتىك جاعدايعا قاجەتتى پوشتا بايلانىسى, مادەنيەت ءۇيى جانە كىتاپحاناسى مەن دارىگەرلىك امبۋلاتورياسى, شاعىن دۇكەنى مەن مونشاسى بار كۇبىرسىپ وتىرعان شاعىن اۋىل ەدى. كەزىندە «وكتيابردىڭ 50 جىلدىعى اتىنداعى» دەپ اتالاتىن كەڭشاردىڭ ورتالىعى شايىر اۋىلىنان ەلۋ شاقىرىم قاشىقتىقتا ورنالاسىپ, الپىسقا تارتا وتباسى كۇنەلتىس جاساپ وتىرعان تيگەن اۋىلى اتالمىش شارۋاشىلىقتىڭ فەرماسى بولىپ ەسەپتەلەتىن. ءىرى قارانى قوسپاعاندا 20 مىڭداي ۇساق مالى بار, مەملەكەتكە ۇلكەن پايدا كەلتىرىپ وتىرعان ءىرى شارۋاشىلىقتىڭ ءبىر بولىمشەسى بولاتىن. فەرما ورتالىعىنىڭ توڭىرەگى مال جايىلىسىنا كەڭ جانە ماڭىندا بىرنەشە اتقىلاپ تۇرعان ارتەزيان سۋ كوزدەرىن پايدالانىپ سالىنعان بىرنەشە سۋارمالى ەگىستىكتەرى بار-دى. ول ەگىستىكتەردە مال ازىعىنا جەتكىلىكتى جوڭىشقا ەگىلىپ, سونىمەن قاتار كوكونىستەن مول ءونىم الىنىپ ەلگە ەداۋىر ىرىس بولعاندىعى جالعان ەمەس. فەرمانى كەزىندە كوزىن شارۋامەن اشقان, وبلىسقا بەلگىلى اۋىل شارۋشىلىعى مامانى الپىسباي ءشۇيىشوۆ باسقاردى. ءىرى-ءىرى شارۋاشىلىقتاردى جەكەشەلەندىرۋ باستالعان جىلدارى توز-توزى شىعىپ باسىنا بۇلت ۇيرىلگەن اۋىلداردىڭ قاتارىندا ءبىزدىڭ تيگەن اۋىلى تۇردى. ەل تاعدىرىنا ءجۇردىم-باردىم قاراعان سولاقاي باسشىلىقتىڭ كەسىرىنەن ءبىزدىڭ اۋىل «كەلەشەگى جوق» دەلىنەتىن اۋىلداردىڭ تىزىمىنە ەندى. ءبىزدىڭ اۋدان, وبلىس باسشىلىعىنان ءوتىنىپ سۇراعانىمىز – اۋىلدا بالا سانى جەتكىلىكتى بولعاندىقتان ءبىر باستاۋىش مەكتەپتىڭ كەرەكتىگى ەدى, بىراق ول وتىنىشىمىزگە قۇلاق اسقان ءبىر باسشى بولمادى. قالاي ەكەنى بەلگىسىز ءتۇتىن سانى جونىنەن ءبىزدىڭ اۋىلمەن شامالاس بەكى جانە تۇششىبەك اۋىلدارىنا مەكتەپ ءۇيى سالىنىپ پايدالانۋعا بەرىلىپ, ءبىزدىڭ اۋىل مەكتەبىنىڭ قۇرىلىسىنىڭ قازىعى سول قاعۋلى كۇيىندە قالدى. اتالعان ەكى اۋىل, كۇندەگەنىمىز ەمەس, قازىر ۇلكەن ەلدى مەكەنگە اينالىپ, ەل ىرگەسى ىدىراماستان كۇنەلتىپ وتىر. مەملەكەتتىڭ بايلىعى ادام بولاتىن بولسا, ادامعا ەڭ كەرەگى – اتامەكەنىنىڭ بولاشاعى, ال ونىڭ ورنىنىڭ جەرمەن-جەكسەن بولۋى ولار ءۇشىن ۇلكەن قاسىرەت. بىراق ءبىزدىڭ قاسىرەتىمىزدى ەلەگەن ءبىر لاۋازىم يەسى, ءبىر ەلدىڭ قالاۋلىسى بولعان جوق. اۋىلىندا بالاسىن قاراقانات بولعانشا وقىتاتىن ەڭ بولماسا باستاۋىش مەكتەبى جوق, الەۋمەتتىك سالانىڭ بارلىق تۇرلەرىنەن جۇرداي بولىپ, قۇلازىعان اۋىلداعى جۇرتتىڭ قولىنان وتىرعان اتامەكەنىن تاستاي كىم قايدا, باياعى قۋعىن-سۇرگىن جىلدارىنداعىداي جوڭكىلە كوشكەننەن باسقا كەلەر شارا قالمادى. كەزىندە ماماندار مەن فەرما جۇمىسشىلارى ءۇشىن سالىنعان ۇيلەر, جىلدا مول ءونىم بەرىپ تۇرعان كوكونىس باۋ-باقشالارى جانە كىتاپحانا, كلۋب, دارىگەرلىك امبۋلاتوريا, مونشا سىندى الەۋمەتتىك نىساندار – ءبارى قاڭىراپ بوس ادىرا قالدى. ەلدەگى ساۋاتى بار اۋىل تۇرعىندارىنىڭ ارىزدانىپ بارماعان جەرى, باسپاعان تاۋى قالمادى. ءبارىنىڭ ايتار ءۋاجى ءبىر ء«بىز بىلمەيمىز, ءبارىن جوعارى شەشەدى», ءيا, بولماسا ماسەلەنىڭ ءبارى عۇمىرى ءتۇبى جەتكىزبەيتىن قارجىعا كەلىپ تىرەلەدى. ۋادەلەرىن ءۇيىپ-توگىپ بەرىپ كەتكەن باسشىنىڭ شەتى جوق.
ماستەك قىستاعىنان وتەتىن گاز قۇبىرىن اۋىلدارىڭا جەتكىزىپ بەرەمىن دەپ كەزىندە ۋادە بەرگەن ماڭعىستاۋ اۋدانىنىڭ بۇرىنعى اكىمى جارماعانبەت ايتۋاروۆ قازىر وبلىستىق اكىمشىلىكتە جوعارى لاۋازىمدا وتىر دەپ ەستيمىز, جىگىتتىڭ قىزمەتتە وسكەنى بىزگە قىزعانىش ەمەس, بىزگە ەلگە بەرگەن ۋادەنىڭ ناتيجەسى كەرەك.
اۋىل احۋالىن وڭالتۋ, ەلدى مەكەندەردىڭ ينفراقۇرىلىمىن جاقسارتۋ, اۋىل تۇرعىندارىنىڭ زامانعا ساي لايىقتى تىرلىك كەشۋىنە جاعداي جاساۋ – مەملەكەتتىڭ ۇستانىمى جانە جەرگىلىكتى جەردەگى باسشىلارعا وسى ماقساتتا ارنايى تاپسىرمالار بەرىلىپ, مىندەتتەر جۇكتەلگەندىگىن بىلەمىز. جۋىردا ماڭعىستاۋ وبلىسىنىڭ اكىمى س.ترۇموۆ وبلىستاعى بىرقاتار اۋىلداردى ارالاپ ولاردىڭ بۇگىنگى دامۋىنا باعا بەردى, قولداۋ كورسەتەتىن بولىپ تارقاستى. ءبىر اۋىلعا جول سالىنسا, ءبىر اۋىلدا كاسىپورىن اشىلىپ, كەلەسى اۋىلدا الەۋمەتتىك نىسان, شاعىن كاسىپكەرلىك نىساندارى بوي كوتەرەتىن بولدى. بۇل جايلى بۇقارالىق اقپارات قۇرالدارى جارىسا حابار تاراتىپ جاتتى. ءبىز, تيگەندىكتەر, ول جاڭالىقتارعا تەك تەلمىرىپ, تەك قىزىعىپ قاراۋعا ءماجبۇرمىز. تيگەننىڭ جانە تيگەندىكتەردىڭ شەتقاقپاي بولۋىنىڭ سەبەبى نەدە؟ قازاقتا ايتىلاتىن «توقالدان تۋدى» دەلىنەتىن تىركەستى ەرىكسىز تيگەنگە تەلۋگە تۋرا كەلەتىندەي...
توقسان اۋىز ءسوزدىڭ توبىقتاي ءتۇيىنى, بىزگە ۇكىمەت كۇنەلتۋگە جاعداي جاساسا ءبىز اتامەكەنگە كوش باسىن قايتا بۇرعىمىز كەلەدى. بىزگە ول ءۇشىن كوپ نارسەنىڭ كەرەگى شامالى, ءالى تولىقتاي ەل كەتىپ ۇلگەرمەگەن ءبىزدىڭ تيگەن اۋىلىنا ەڭ باستىسى باستاۋىش مەكتەپ ءۇيى سالىنسا جانە اۋىلعا تاياۋ جەردەگى ماگيسترالدان گاز قۇبىرى تارتىلسا ەكەن.
امانكەلدى مىرزاتاەۆ,
تيگەن اۋىلىنىڭ تۇرعىنى, زەينەتكەر
ماڭعىستاۋ وبلىسى,
ماڭعىستاۋ اۋدانى
