1921 جىلدىڭ 1 قاڭتارىندا دۇنيەگە كەلگەن سوعىس ارداگەرى اتامىزدىڭ اسەرلى اڭگىمەسىن تىڭدادىق, اق باتاسىن الدىق, گارمونمەن تارتقان اۋەنىن تىڭدادىق! ءبىر كەزدە كوزىمىز توردە ءىلۋلى تۇرعان ادەمى سۋرەتكە ءتۇستى دە:
– اتا, انا جانىڭىزدا وتىرعان اق شاشتى ادەمى اجەمىز كىم؟ – دەپ سۇرادىق جۋرناليستىك اۋەستىكپەن. ال مايدانگەر قارت ءسال-ءپال ويلانىپ وتىرىپ:
– قۇداعي عوي, تۋعان قۇداعيىم گۇلنار مىرجاقىپقىزى دۋلاتوۆا, – دەگەنى. ەلەڭ ەتە قالدىق. سودان سوڭ: – مارقۇمنىڭ پەيىشتە نۇرى شالقىسىن, كەرەمەت ادام ەدى عوي, شىركىن! قىزىم جاننانىڭ سۇيىكتى ەنەسى بولاتىن, – دەدى تاعى دا.
گۇلنار اجەمىزدىڭ التى الاشتىڭ ارداعى, ۇلتىمىزدىڭ ۇلى تۇلعاسىنىڭ ءبىرى مىرجاقىپ دۋلاتوۆتىڭ قىزى ەكەنى بەلگىلى. ءبىز ول كىسىنىڭ 2013 جىلى 98 جاسىندا دۇنيەدەن وتكەنىن, ال ومىرلىك سەرىگىنىڭ قازاقتىڭ قابىرعالى قالامگەرىنىڭ ءبىرى, كەزىندە «قازاق ادەبيەتى» گازەتىنىڭ رەداكتسياسىن باسقارعان, «قازاق سوۆەت ەنتسيكلوپەدياسى» باس رەداكتورىنىڭ ورىنباسارى قىزمەتىن اتقارعان, مويىنقۇم جەرىندە تۋعان ابەن ساتىبالديەۆ ەكەنىن بۇرىننان بىلەتىنبىز.
يسا اتامىزدىڭ قىزى جاننا كەرىمتاەۆا بەلگىلى تەاتر جانە كينو اكتريساسى, قازاقستاننىڭ ەڭبەك سىڭىرگەن ءارتىسى. ول گۇلنار اجەمىز بەن ابەن اتامىزدىڭ بالاسى, بەلگىلى باسپاگەر ەرلان ساتىبالديەۆتىڭ زايىبى ەكەن.
– سوندا بۇل سۋرەت قاشان, قاي جەردە تۇسىرىلگەن؟ – دەپ سۇرادىق ەندى.
– وسىدان ون شاقتى جىل بۇرىن, سول كىسىلەردىڭ ۇيىندە, – دەدى سوزگە ارالاسقان قاريانىڭ ۇلكەن كەلىنى سۆەتلانا. – ءبىزدى اپامىز ءجيى-ءجيى قوناققا شاقىرىپ تۇراتىن. سونداي كەزدىڭ بىرىندە عوي.
... ۇلاعاتتى ۇستازدىق قىزمەتىن سوعىسقا دەيىن دە اتقارعان, ونان كەيىن دە ۇزبەي ۇزاق ۋاقىت مۇعالىم, مەكتەپ ديرەكتورى بولعان قازاقتىڭ قاھارمان جەڭىمپاز جاۋىنگەرىنىڭ ءبىرى يسا تولەڭگىت ۇلى اتامىز بىزگە اق تىلەگىن اقتارىلا ايتىپ قالا بەردى...
بەرىكباي قادىقوۆ,
جۋرناليست
الماتى وبلىسى,
قاراساي اۋدانى
