ماسەلەن, 2022 جىلى وبلىستاعى 17 اۋدان مەن 3 قالا تولىقتاي جاڭا سپورتتىقساۋىقتىرۋ كەشەندەرىمەن قامتىلادى دەگەن ماقسات ورىندالۋدا. بيىل جىل سوڭىنا دەيىن 7 كەشەن قولدانىسقا بەرىلمەك. قازىر سپورت نىساندارىنىڭ قۇرىلىسى رايىمبەك, ەسكەلدى, بالقاش, كوكسۋ, ۇيعىر, قاراساي جانە اقسۋ اۋداندارىندا قىزۋ ءجۇرىپ جاتىر. اتالعان التى اۋدانداعى سپورت كەشەنى الداعى كۇزدە اشىلماق. بۇل ماقساتقا 8 ملرد تەڭگە قارجى ءبولىنىپتى. نىساندار پايدالانۋعا بەرىلگەننەن كەيىن ايماقتاعى سپورتتىق نىسانداردىڭ اۋماعى بىردەن 29,5 مىڭ شارشى مەترگە ۇلعايادى دەگەن ءۇمىت بار. مۇنان بولەك تاعى 6 سپورت نىسانى كۇرەلى جوندەۋدەن وتپەك. ونىڭ ىشىندە تالدىقورعان قالاسى مەن ەڭبەكشىقازاق اۋدانىنداعى سپورتتىق-ساۋىقتىرۋ كەشەندەرىنە كۇردەلى جوندەۋ جۇرگىزۋ جوسپارلانسا, ەسكەلدى, كەربۇلاق جانە ىلە اۋدانىنداعى نىساندارعا اعىمداعى جوندەۋ جۇمىسى جاسالماق. جالپى, قۇرىلىسى باستالعان نىسانداردىڭ تورتەۋى «اۋىل – ەل بەسىگى» جوباسى اياسىندا سالىنىپ جاتىر. ناتيجەسىندە اۋىل تۇرعىندارىنىڭ سالاماتتى ءومىر سالتىن ۇستانۋىنا جول اشىلماق. اسىرەسە جاستاردىڭ بۇقارالىق سپورتقا بەت بۇرۋىنا جاعداي جاسالماق. ال قازىرگى ساتتە اۋىلدا تۇراتىن جاستار سانى 320 مىڭ شاماسىندا. ياعني اۋىلداردان اشىلاتىن سپورت ورتالىقتارىنا اعىلاتىن ادام سانى جەتكىلىكتى بولارى انىق.
ايتپاقشى, ءوڭىر اكىمدەرىنە 100 سپورت ساۋىقتىرۋ كەشەنىن سالۋعا پارمەن بەرگەن ەلباسى بۇل ىسكە ءوزى باس بولىپ كىرىسىپ, ۇلگى كورسەتكەن بولاتىن. بىلتىر نۇرسۇلتان نازارباەۆ تۋعان اۋىلىندا زاماناۋي تالاپقا تولىقتاي ساي كەلەتىن سپورت كەشەنىن سالىپ, تۇرعىندارعا تارتۋ ەتكەن-ءدى. «تۋعان جەر» باعدارلاماسى بويىنشا ەلباسى قارجىسىنا سالىنعان «ۇشقوڭىر» سپورت كەشەنىندە قازىر بوكس, كۇرەس جانە ترەناجەر زالى, ءجۇزۋ باسسەينى, تەننيس كورتى, باسقا دا سپورت ينفراقۇرىلىمى جۇمىس ىستەپ تۇر.
– ءبىزدىڭ بالالىق شاعىمىزدا سپورتپەن شۇعىلدانۋ ءۇشىن مۇنداي جاعداي بولمادى. ال قازىر جاستار ءۇشىن بارلىق مۇمكىندىك بار. كوپتەگەن تابىستى ازاماتتارىمىز تۋعان اۋىلى مەن اۋداندارىنا قولداۋ كورسەتەدى دەپ ويلايمىن. جاڭا سپورت كەشەنىندە جاتتىعاتىنداردىڭ اراسىنان بولاشاق چەمپيوندار شىعادى دەپ سەنەمىن. مەنىڭ وتباسىم جانە جاقىندارىم وسى سپورت كەشەنىن ارنايى تۇرعىنداردىڭ يگىلىگى ءۇشىن سالدى, – دەگەن بولاتىن «ۇشقوڭىر» سپورت كەشەنىنىڭ اشىلۋ سالتاناتىندا ءسوز العان نۇرسۇلتان نازارباەۆ.
وتكەن جىلى ءدال وسىنداي ورتالىق تالعار اۋدانىندا دا اشىلعان بولاتىن. سپورتتىڭ جەكپە-جەك جانە جاۋىنگەرلىك جاتتىعۋ تۇرلەرىنە ارنالعان 180 ورىندىق دەنەشىنىقتىرۋ-ساۋىقتىرۋ امبەباپ كەشەنى اياسىندا تالعار اۋدانىنىڭ «المالى» بالالار مەن جاسوسپىرىمدەر سپورت مەكتەبى دە جۇمىسىن باستاعان. كەشەن اۋماعىندا ترەناجەرلىق, ويىن, كۇرەس, بوكس جانە جاتتىعۋ زالدارىنان بولەك, ۆولەيبول, باسكەتبول, فۋتبول سپورتتىق الاڭدارى مەن 400 ورىندىق كورەرمەن تريبۋناسى ورنالاسقان. ال «المالى» بالالار مەن جاسوسپىرىمدەر سپورت مەكتەبى بالالاردى سپورتتىڭ 15 تۇرىنە باۋليدى. مۇندا بوكس, باسكەتبول, ۆولەيبول, گرەك-ريم جانە ەركىن كۇرەس, قازاقشا كۇرەس, جەڭىل اتلەتيكا, فۋتبول, گاندبول, تاەكۆوندو, كاراتە-دو, سامبو, جەكپە-جەك, ساداق اتۋعا جاتتىعۋ ءۇشىن قاجەتتى جاعداي جاسالعان.
بىلتىر الاكول اۋدانىنىڭ ورتالىعى ءۇشارال قالاسىندا دا «تارلان» اتتى امبەباپ دەنەشىنىقتىرۋ-ساۋىقتىرۋ كەشەنى ىسكە قوسىلدى. اتاپ ايتارلىعى, بۇل كەشەن وڭىردەن شىققان بەلگىلى مەملەكەت قايراتكەرى ساۋات مىڭباەۆتىڭ جەكە قارجىسىنا سالىنعان بولاتىن. بۇگىندە سپورت كەشەنىندە بوكس, كۇرەس, دزيۋدو, تاەكۆوندو, اۋىر اتلەتيكامەن اينالىسۋعا جانە فۋتبول ويناۋعا بارلىق مۇمكىندىك بار. ءتۇرلى سپورت جاتتىعۋلارىنا بەيىمدەلگەن زالداردان بولەك, فۋتبول الاڭى مەن «Street workout» الاڭقايى دا جۇمىس ىستەپ تۇر. ال وسى دەنەشىنىقتىرۋ-ساۋىقتىرۋ كەشەنىنىڭ قۇرىلىسىنا ينۆەستور 500 ملن تەڭگە قارجى جۇمساعان ەكەن.
جالپى, بۇقارالىق سپورت نىساندارىن سالۋ ىسىنە «جۇمىسپەن قامتۋدىڭ جول كارتاسى-2020» باعدارلاماسى دا قوسىمشا قارقىن قوستى. اۋداندارداعى قۇرىلىسقا جان بىتىرگەن جول كارتاسى اياسىنداعى جۇمىس ەلدى ەڭبەكپەن قامتۋعا دا جول اشتى. ماسەلەن, كوكسۋ اۋدانىنداعى سپورت كەشەنى بيىل قولدانىسقا بەرىلمەك. قازىر اۋدان ورتالىعى بالپىق بي كەنتىندە نىسان قۇرىلىسى قىزىپ تۇر. 180 ورىندىق دەنەشىنىقتىرۋ كەشەنىنىڭ قۇرىلىسىنا 300 ملن تەڭگە قارجى باعىتتالعان. جالپى اۋماعى 2 گەكتار جەردى الىپ جاتقان جاڭا كەشەندە ۆولەيبول, باسكەتبول, گاندبول, شاعىن فۋتبول, بادمينتون, تەننيس الاڭدارى مەن بوكس جانە كۇرەس زالدارى دا اشىلماق. نىسان اۋماعىندا حوككەي الاڭى مەن سكالودروم سالۋ دا قاراستىرىلعان ەكەن.
– ەلباسى نۇرسۇلتان نازارباەۆ وسىدان ءبىراز ۋاقىت بۇرىن «وڭىرلىك دەڭگەيدەگى رەزەرۆتەردى تاۋىپ, بۇقارالىق سپورت پەن دەنە شىنىقتىرۋدىڭ قولجەتىمدىلىگىن ارتتىرۋ قاجەت» دەپ ايماقتاردا اتقارىلاتىن جۇمىستىڭ باعىتىن ايقىنداپ بەرگەن ەدى. مەملەكەت باسشىسى قاسىم-جومارت توقاەۆ تا بۇقارالىق سپورتتى دامىتۋدى باستى نازاردا ۇستاپ, قولدانىستاعى, اسىرەسە مەكتەپتەردەگى سپورت عيماراتتارىن ءتيىمدى پايدالانىپ, دەنەشىنىقتىرۋمەن اينالىسۋ ءۇشىن اۋلالاردى, پاركتەردى, ساياباقتاردى جابدىقتاۋ ماسەلەسىن كۇن تارتىبىنەن تۇسىرگەن ەمەس. الماتى وبلىسىندا بۇل باعىتتا اۋقىمدى جۇمىس اتقارىلۋدا. ءبىز ايماقتا سالاماتتى ءومىر سالتىن ناسيحاتتاپ قانا قويماي, ادامداردىڭ سپورتپەن اينالىسۋىنا جاعداي جاساپ وتىرمىز. ناتيجەسىندە وبلىس تۇرعىندارىنىڭ 30 پايىزىن بۇقارالىق سپورتپەن قامتۋعا قول جەتكىزدىك. جاقسى ءىس جالعاسىن تابا بەرەدى. 2022 جىلعا دەيىن وبلىستاعى 17 اۋدان مەن 3 قالا جاڭا سپورتتىق-ساۋىقتىرۋ كەشەندەرىمەن تۇگەلدەي قامتىلىپ, سپورتتى سەرىك ەتكەن جەتىسۋلىقتار قاتارى كوبەيە تۇسەدى, – دەيدى وبلىس اكىمى اماندىق باتالوۆ.
