بىلەتىنىمىز, قاشىقتان وقىتۋ ۇدەرىسى ەلىمىزدە ۇكىمەتتىڭ قاۋلىسىمەن 2012 جىلعى 19 قاڭتاردان باستاپ قولعا الىندى. بۇل ۇدەرىس ەلىمىزدەگى جوعارى وقۋ ورىندارىندا ءوز ورنىن تاپقان. دەسەك تە وسى ءبىر ىندەتتىڭ سالدارىنان كوپتەگەن تۇيتكىلدى قيىندىقتارعا تاپ بولعانىمىز انىق. اتالعان فاكتور الەمنىڭ بارلىق ءبىلىم بەرۋ مەكەمەلەرىندە بايقالعاندىعىن اتاپ وتكەن ءجون.
بۇل – سەرۆەر, عالامتوردىڭ قۋاتى جانە وتكىزۋ ارنالارىنىڭ ناشارلىعى, پەداگوگتەردىڭ ءالسىز تسيفرلى قۇزىرەتتىلىگى, وفلاين فورماتتاعى جوعارى كاسىبيلىككە قاراماستان, كەيبىر وقىتۋشىلارعا ونلاين-ساباقتاردى قايتا قۇرۋ جانە وتكىزۋدىڭ قيىندىق تۋدىرۋى, ساندىق كونتەنت جانە وقىتۋ ادىستەمەسىنىڭ قاشىقتان وقىتۋ ءۇشىن قولايسىزدىققا اكەپ سوعۋى.
پەداگوگيكانىڭ قىر-سىرىن بىلەتىن عالىمدار, عىلىمي قىزمەتكەرلەر, ۇستازداردىڭ پىكىرىنشە, كۇندىزگى وقۋ فورماتىنا كوزقاراس زاڭنامالىق دەڭگەيدە قايتا قارالاتىن بولسا وقۋ ۇدەرىسىنە كوپ پايداسىن تيگىزەرى ءسوزسىز. قازىرگى تاڭداعى قاشىقتان وقىتۋ ۇدەرىسى ءاربىر ستۋدەنتتىڭ جەكە باسىنىڭ جاۋاپكەرشىلىگىنە بايلانىستى. سەبەبىنە قاراساق, ءار ستۋدەنت ءوز الدىنا ۇيىندە نەمەسە كىتاپحانادا تاعى باسقا ىڭعايلى ورىندا دايىندىق جۇرگىزگەندە باقىلاۋ اسا ءبىر قاجەتتىلىك تۋدىرمايدى. وقۋ ورنىنىڭ قاشىقتان جىبەرىلگەن تاپسىرماسى مىندەتتى تۇردە مەرزىمى وتپەي ورىندالىپ جاتسا ستۋدەنت پەن وقۋ ورنىنىڭ ۇلكەن جەتىستىگى. سوندىقتان ستۋدەنتكە نە قاجەت؟
ول قاجەتتىلىككە جارامدى جەتى ءتۇرلى ەكراندى قۇرىلعى: تەلەديدار, كومپيۋتەر, پلانشەت, تابلەت, فابلەت, سمارتفون جانە سمارت-ساعات. ءبىلىم بەرۋ جۇيەسىن تسيفرلى قۇرالعا بەيىمدەۋدىڭ ءبىرىنشى كەزەكتەگى مىندەتى – ستۋدەنتتەردىڭ قاجەتتىلىكتەرىنە باعدارلانعان وقىتۋدىڭ ينتەراكتيۆتى ۇدەرىسىندەگى ۇستازدىڭ نەگىزگى ءرولىن ساقتاۋ (جوعارى جانە جوعارى وقۋ ورنىنان كەيىنگى ءبىلىم بەرۋ جۇيەسىن قازاقستاننىڭ ساندىق قۇرىلعىسىنا بەيىمدەۋ تۇجىرىمداماسى, «جاڭا تەحنولوگيالار/HiEdTec ارقىلى ورتالىق ازيادا جوعارى ءبىلىمدى جاڭعىرتۋ» ەۋرازيالىق قۇرىلىمدىق جوباسىنىڭ ناتيجەسى) ءتيىس.
2020 جىلعى 5 مامىردا «Egemen Qazaqstan» گازەتىندە جاريالانعان ماقالادا مەملەكەت باسشىسى قاسىم-جومارت توقاەۆتىڭ: «جالپى, سوڭعى جىلداردا قاشىقتان وقىتۋ ءتاسىلى جاھاندىق ءۇردىس رەتىندە قالىپتاستى. الەمنىڭ كوپتەگەن جوعارى وقۋ ورىندارى بۇل ءادىستى كەڭىنەن قولدانىپ كەلەدى. مۇنىڭ ارتىقشىلىعى دا, كەمشىن تۇستارى دا بار. اسىرەسە قازىرگىدەي كارانتين جاعدايىندا بۇعان بالاما جوق. سوندىقتان الداعى ۋاقىتتا ونى جەتىلدىرە تۇسكەن ءجون», دەپ ايتۋىنىڭ ءوزى ءبىراز دۇنيەنى اڭعارتادى.
سونىمەن قاتار وقىتۋشى-پروفەسسورلار قۇرامىنىڭ وي پىكىرىنشە, ستۋدەنتتەردى عىلىمي ىزدەنۋدىڭ داعدىلارى مەن بىلىكتىكتەرىن دامىتۋعا, IT-قۇزىرەتتىلىك نەگىزىندە كرەاتيۆتى ويلاۋ مەن شىعارماشىلىق قابىلەتتىلىكتى قالىپتاستىرۋعا جانە دامىتۋعا باعىتتالعان وقىتۋدىڭ زەرتتەۋ ءتاسىلىن بەلسەندى پايدالانۋ قاجەت.
سونداي-اق ستۋدەنت جاستاردىڭ پىكىرى ارقيلى, ونىڭ سەبەپ-سالدارى جەتەرلىك. ونىڭ ءبىرى – ينتەرنەت جۇيەسىندەگى تسيفرلى جۇيەنىڭ السىزدىگى. بۇل وزەكتى ماسەلەنىڭ سەبەبىن ەلىمىزدەگى كارانتين جاعدايىنداعى وقۋ ورىندارىنداعى قاشىقتان وقىتۋ كەزىندەگى تسيفرلى جۇيەنىڭ تەجەلىپ, ۋاقىت جوعالتۋىنان اڭعارۋعا بولادى.
بىزدەگى عالامتوردىڭ قىمباتتىلىعى, تسيفرلاندىرۋ جۇيەسىنىڭ ناشارلىعى اسىرەسە اۋىل-ايماقتارداعى وقۋشىلار مەن ستۋدەنتتەردىڭ قينالىسىن تۋعىزدى. جاسىراتىنى جوق, مۇنىڭ ءبارى الەۋمەتتىك جەلىلەردەن كورسەتىلدى, تالقىلاندى. كارانتين ۋاقىتى ەلىمىزدەگى تسيفرلى تەحنولوگيانىڭ قانداي دارەجەدە ەكەنىن ايقىن كورسەتتى. بۇگىنگى تاڭداعى وسىنداي وزەكتى ماسەلەلەر ءبىر شەشىمىن تاپپاي كوشتىڭ ءجۇرۋ قادامى قيىنعا سوعاتىنى بارىمىزگە بەلگىلى. ياعني تەز دامۋ ۇستىندەگى جاھاندانۋ زامانىندا وسىنداي قاجەتتى دۇنيەمىزدى تەز ىلگەرىلەتپەسەك كوشتىڭ سوڭىندا قالۋىمىز بەك مۇمكىن.
جۇماعالي ەرگەشباەۆ,
جۋرناليست
