وڭدەۋ جۇمىستارى ادامدار كوپ شوعىرلانعان اۋماقتاردى قامتىدى. اتاپ ايتقاندا, ساياباقتار, بازار مەن ساۋدا ءۇيى ماڭدارى. بيولوگيالىق قورعاۋ بولىمشەسىنىڭ اسكەري قىزمەتشىلەرى «جەرۇيىق», باۋىرجان مومىش ۇلى اتىنداعى جانە تۇڭعىش پرەزيدەنت ساياباقتارى مەن ەلوردالىق ارباتتا وڭدەۋ جۇمىستارىن جۇرگىزۋدە.
قالالىق اكىمدىكتىڭ ءوتىنىشى بويىنشا قارۋلى كۇشتەر جەكە قۇرام مەن ارنايى تەحنيكانىڭ قاجەتتى سانىن ءبولدى. وڭدەۋ ءاربىر وبەكتىدە كەزەكپەن, جەكە گازسىزداندىرۋ جيىنتىقتارىن قولدانۋمەن, سونداي-اق اۆتو قۇيۋ ستانتسياسىنىڭ كومەگىمەن جۇرگىزىلەدى.
«كوروناۆيرۋسپەن كۇرەستىڭ العاشقى كۇنىنەن باستاپ ءبىزدىڭ اسكەري قىزمەتشىلەر ەلوردادا دەزينفەكتسيا جۇمىستارىن جۇرگىزدى. جەكە قۇرام وسى مىندەتتى ورىنداۋ كەزىندە قانداي جاۋاپكەرشىلىك جۇكتەلگەنىن تۇسىنەدى. حالىقتىڭ دەنساۋلىعىنا ەش قاۋىپ توندىرمەۋ ءۇشىن, ساپالى دەزينفەكتسيا جۇىمستارىن جۇرگىزۋ ءبىز ءۇشىن ماڭىزدى بولىپ تابىلادى», - دەدى قر قك رادياتسيالىق, حيميالىق, بيولوگيالىق قورعاۋ جانە ەكولوگيالىق قاۋىپسىزدىك دەپارتامەنتىنىڭ اعا وفيتسەرى پودپولكوۆنيك باعلان انداسوۆ.
وسى دەمالىس كۇندەرى نۇر-سۇلتاندا شەكتەۋ شارالارى قولعا الىندى. اتاپ ايتقاندا, بىرقاتار نىسانداردىڭ قىزمەتى مەن قالا بويىنشا قوزعالىس توقتاتىلدى.
ەستەرىڭىزگە سالا كەتەيىك, ءبىر اي بۇرىن سانيتارلىق-ەپيدەمياعا قارسى ءىس-شارالاردى قامتاماسىز ەتۋ ءۇشىن شۇعىل تۇردە سانيتارلىق وڭدەۋدىڭ جيىنتىق وتريادتارى قۇرىلعان بولاتىن. ولار جەرگىلىكتى اتقارۋشى ورگانداردىڭ وتىنىمدەرى بويىنشا ەلىمىزدىڭ 19 قالاسىنداعى قوعامدىق ورىندار مەن الەۋمەتتىك ماڭىزى بار وبەكتىلەردى دەزينفەكتسيالاۋدى جۇزەگە اسىرادى.
