ايماقتار • 19 ماۋسىم، 2020

مۇرات ايتەنوۆ شىمكەنتتىكتەردى قالا كۇنىمەن قۇتتىقتادى!

407 رەت كورسەتىلدى

وسىدان تۋرا ەكى جىل بۇرىن 19 ماۋسىم كۇنى ەلباسى نۇرسۇلتان نازارباەۆ شىمكەنتكە رەسپۋبليكالىق قالا مارتەبەسىن بەرۋ تۋرالى جارلىققا قول قويعان بولاتىن. سونان بەرى وسى ايتۋلى داتا شىمشاھاردىڭ قالا كۇنى بولىپ بەكىتىلدى. بۇگىن سول ايتۋلى مەرەكەگە وراي شىمكەنت قالاسىنىڭ اكىمى مۇرات ايتەنوۆ شىمكەنتتىكتەردى مەرەيلى مەرەكەمەن قۇتتىقتادى، دەپ جازادى Egemen.kz

"قۇرمەتتى شىمكەنت قالاسىنىڭ تۇرعىندارى مەن قوناقتارى! سىزدەردى قالا كۇنى مەرەكەسىمەن شىن جۇرەكتەن قۇتتىقتايمىن! 

ەلباسى نۇرسۇلتان نازارباەۆتىڭ تاريحي جارلىعىمەن شىمكەنتكە رەسپۋبليكالىق قالا ستاتۋسى بەرىلگەنىنە، مىنە، ەكى جىل تولىپ وتىر. وسى ءبىر قىسقا مەرزىمدە ەلىمىزدەگى ءۇشىنشى مەگاپوليستى كوركەيتۋ مەن دامىتۋ جولىندا ءىرى جوبالار قولعا الىنىپ، ناقتى ىستەر جۇزەگە اسۋدا.

پرەزيدەنتىمىز قاسىم-جومارت توقاەۆ: "قازىر بىزگە تاۋەلسىزدىكتىڭ جەتىستىكتەرىن ەسەلەپ، ەلىمىزدى دامۋدىڭ جاڭا ساپالى كەزەڭىنە شىعارۋ مۇمكىندىگى بەرىلىپ وتىر"، دەگەن ەدى بيىلعى حالىققا ارناعان جولداۋىندا. وسى ورايدا شىمكەنت تە ءوزىنىڭ دامۋ ديناميكاسىندا شىن مانىندە ساپالى ساتىلارعا كوتەرىلىپ، زاماناۋي ينفراقۇرىلىم قالىپتاسىپ، جاڭا شاعىناۋداندار، كورىكتى عيماراتتار جىل ساناپ كوبەيىپ كەلە جاتقانىنا وزدەرىڭىز كۋاسىزدەر.

بيىلعى جىل قازاق حالقىنىڭ رۋحاني ومىرىندە اسا ماڭىزدى ورىن الىپ وتىرعانى بەلگىلى. رەسپۋبليكا كولەمىندە ەكىنشى ۇستاز ءابۋ ناسىر ءال-ءفارابيدىڭ 1150 جىلدىق جانە حاكىم اباي قۇنانباي ۇلىنىڭ 175 جىلدىق مەرەيتويى تويلانۋدا. وعان قوسا شىمكەنت قالاسى ءۇشىن دە ايرىقشا ماڭىزدى وقيعالارعا تولى جىل. شىمكەنتتىڭ 2200 جىلدىق مەرەيتويى يۋنەسكو كولەمىندە اتاپ وتىلەدى جانە ءبىزدىڭ سۇيىكتى قالامىز تمد ەلدەرىنىڭ مادەني استاناسى مارتەبەسىنە يە بولىپ وتىر.

بۇل − ءبىز ءۇشىن زور قۋانىش! 

مادەني استانا مارتەبەسى شىمكەنتكە بەكەر بەرىلگەن جوق. كۇن شۋاقتى شاھارىمىز  – مەيىرىمدى، ەڭبەكقور ءارى تالانتتى ادامدار تۇراتىن قالا. ول – جاڭا عاسىرداعى قازاقستان ونەرى مەن مادەنيەتىنىڭ التىن بەسىگى. مەرەكە اياسىنداعى  دوستاستىق مەملەكەتتەرى اراسىنداعى بىرلىك پەن ىنتىماقتاستىقتى دامىتۋعا سەرپىن بەرىپ، ۇلتتىق مادەنيەت پەن ونەرىمىزدى حالىقارالىق دەڭگەيدە ناسيحاتتاۋعا، شىمكەنتتىڭ حالىقارالىق ارەناداعى ابىرويى مەن بەدەلىن ارتتىرۋعا  جول اشادى. "شىمكەنت – تمد-نىڭ مادەني استاناسى" جىلىنىڭ رەسمي اشىلۋى ناۋرىز ايىندا ءوتۋى ءتيىس ەدى. الايدا، الەمدى جايلاعان پاندەمياعا بايلانىستى مۇنداي اۋقىمدى ءىس-شارانى وتكىزۋگە تىيىم سالىندى. سول سەبەپتى سالتاناتتى اشىلۋ ءراسىمى دە، مادەني ءىس-شارالار دا ونلاين رەجىمدە وتۋدە. قازىرگى كۇردەلى جاعدايعا قاراماستان كونە شىمكەنت قالاشىعى – تسيتادەلدى قالپىنا كەلتىرۋ جۇمىستارى جالعاسىن تابۋدا. اشىق اسپان استىنداعى بۇل عاجايىپ مۋزەي قالا تۇرعىندارى مەن قوناقتارىنىڭ زور قىزىعۋشىلىعىن تۋدىرادى.    

قادىرلى شىمكەنتتىكتەر! بىزدىڭ سۇيىكتى  شىمكەنتىمىزدىڭ بولاشاعى جارقىن ەكەنىنە كامىل سەنەمىز! 

قازىر قالامىزدى قاۋىپسىز ءارى ءومىر سۇرۋگە جايلى ەتۋ ماقساتىندا كوپتەگەن جۇمىستار اتقارىلۋدا. بيىل ءۇشىنشى مەگاپوليستە كوپقاباتتى 136 ءۇي نەمەسە 7 561 پاتەر پايدالانۋعا بەرىلەدى. قوعامدىق كولىك جۇيەسىن تولىعىمەن جاڭعىرتۋ باستالدى. 1 تامىزدان باستاپ جاڭا جۇيە ەنگىزىلىپ، جىل سوڭىنا دەيىن قالاعا 590 اۆتوبۋس اكەلىنەدى. شىمكەنت اۋەجايىندا جاڭا جولاۋشىلار تەرمينالى سالىنۋدا. سونداي-اق كونگرەسس-حولل، امفيتەاتر، "تسيتادەل" مۋزەيى بوي كوتەرۋدە. تەمىرجول ۆوكزالى، ورتالىق ستاديون، شىمكەنت مەملەكەتتىك زووباعى، دەندروساياباق جاڭىرتىلىپ جاتىر. قالانىڭ نەگىزگى سۋ ارناسى – قوشقار اتا وزەنىنىڭ بويى اباتتاندىرىلۋدا. اتشابار اۋماعىندا ەتنوقالاشىق سالۋ، 47 گەكتار جەرگە جاڭا ساياباق ءوسىرۋ، شىمكەنت-سيتي تۇرعىن الابىندا كوپفۋنكتسيونالدى سپورت كەشەنىن سالۋ بويىنشا جۇمىس جالعاسىن تابۋدا.

قۇرمەتتى قالا تۇرعىندارى! 

قازاقستانداعى ءۇشىنشى قالانىڭ گۇلدەنۋى – شىمكەنتتىكتەردىڭ ءپاتريوتيزمى مەن بەلسەندىلىگىنە بايلانىستى. تۋعان جەرگە، شىرايلى شاھارىمىزعا جاناشىرلىقپەن قاراپ، قامقورلىق تانىتۋ – پەرزەنتتىك پارىزىمىز. شىمقالامىز كورىكتى، ەلىمىز امان، اسپانىمىز اشىق بولسىن!"، دەلىنگەن اكىم قۇتتىقتاۋىندا.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار