ەكونوميكا • 19 ماۋسىم، 2020

قازاقستاندا مەديتسينالىق ماسكا شىعاراتىن تاعى 4 جاڭا كاسىپورىن اشىلادى

55 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا جەكە قورعانۋ قۇرالدارىن ءوندىرۋ تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ باياندادى، - دەپ حابارلايدى Egemen.kz.

ءمينيستردىڭ ايتۋىنشا، ىشكى نارىقتى جەكە قورعانۋ قۇرالدارىمەن قامتاماسىز ەتۋ ماقساتىندا وتاندىق ونىمدەردى شىعارۋ بويىنشا وندىرىستىك قۋاتتى ۇلعايتۋ جالعاستىرىلۋدا.

مەديتسينالىق ماسكالار ءوندىرىسى

دەنساۋلىق ساقتاۋ مينيسترلىگىنىڭ دەرەكتەرى بويىنشا 6 ايعا ماسكاعا دەگەن قاجەتتىلىك 111،2 ملن دانانى قۇرايدى.

"بۇگىنگى تاڭدا 9 وتاندىق كاسىپورىننىڭ قۋاتتىلىعى تاۋلىگىنە 490 مىڭ دانا مەديتسينالىق ماسكا شىعارۋعا مۇمكىندىك بەرەدى. ءوندىرىس كولەمىن ۇلعايتۋ ماقساتىندا وسى جىلدىڭ سوڭىنا دەيىن 4 جاڭا كاسىپورىن اشۋدى جوسپارلاپ وتىرمىز"، — دەدى ب. اتامقۇلوۆ.

وسى جوبالاردى ىسكە قوسۋ جانە جۇمىس ىستەپ تۇرعان كاسىپورىنداردىڭ ءوندىرىس كولەمىن ۇلعايتۋ تاۋلىگىنە 1،1 ملن دانا ماسكا شىعارۋعا مۇمكىندىك بەرەدى. 

كوپ رەتتىك ماسكالار ءوندىرىسى

تۇتاستاي العاندا حالىقتىڭ ماسكاعا دەگەن قاجەتتىلىگى وسى كەزەڭدە (6 اي) 144 ملن دانانى قۇرايدى.

بۇگىندە بارلىق ماسكالاردىڭ تاۋلىك سايىنعى كولەمى 413 مىڭ دانانى قۇرايدى.

"حالىقتى قاجەتتى ماسكالار سانىمەن قامتاماسىز ەتۋ ءۇشىن ءبىز تىگىن كاسىپورىندارى ەسەبىنەن كوپ مارتە قولدانىلاتىن، الدىن الۋ، قورعاۋ ماسكالارىنىڭ ءوندىرىس كولەمىن تاۋلىگىنە 800 مىڭ داناعا دەيىن ۇلعايتۋدى جوسپارلاپ وتىرمىز"، — دەدى مينيستر.

جەرگىلىكتى اتقارۋشى ورگاندار تىگىن كاسىپورىندارىمەن كوپ مارتە قولدانىلاتىن ماسكالار قورىن قۇرۋ بويىنشا جۇمىستى باستادى.

مەديتسينالىق قولعاپتار ءوندىرىسى

مەديتسينالىق قولعاپتارعا قاجەتتىلىك 83،7 ملن جۇپ قولعاپتى قۇرايدى. قازىرگى ۋاقىتتا ەكى كاسىپورىن تاۋلىگىنە 330 مىڭ جۇپ قولعاپ شىعارادى، ءارى قاراي ءبىز ءوندىرىس كولەمىن تاۋلىگىنە 460 مىڭ جۇپقا دەيىن ارتتىرۋدى جوسپارلاپ وتىرمىز.

قورعانىش كوستيۋمدەرىمەن قامتۋ

6 ايعا قورعانىش كوستيۋمدەرىنىڭ قاجەتتىلىگى 1،3 ملن.دانانى قۇرايدى (دەنساۋلىق ساقتاۋ جۇيەسى ءۇشىن 747 مىڭ دانا جانە مەملەكەتتىك ورگاندار ءۇشىن 540 مىڭ دانا). ءوندىرىس كولەمىن ارتتىرۋ ءۇشىن وسى جىلدىڭ سوڭىنا دەيىن 3 جاڭا كاسىپورىندى ىسكە قوسۋ جوسپارلانعان.

"سونداي-اق ءبىز جۇمىس ىستەپ تۇرعان كاسىپورىنداردىڭ ءوندىرىس كولەمىن ۇلعايتۋدى جوسپارلاپ وتىرمىز. بۇل شارالاردىڭ بارلىعى قورعانىس كوستيۋمدەرىن ءوندىرۋ كولەمىن ايىنا 800 مىڭ داناعا دەيىن جەتكىزۋگە مۇمكىندىك بەرەدى"، — دەدى ب. اتامقۇلوۆ.

وكپەنى جاساندى جەلدەتۋ اپپاراتتارى ءوندىرىسى

دەنساۋلىق ساقتاۋ مينيسترلىگىنىڭ اقپاراتى بويىنشا 6 ايدا اتالمىش قۇرىلعىعا دەگەن قاجەتتىلىك 132 دانانى قۇرايدى. "كوكشەتاۋ-4پ" موبيلدىك اپپاراتتارى "تىنىس" اكتسيونەرلىك قوعامى بازاسىندا وندىرىلەدى.

بۇگىندە 380 بىرلىك وكپەنى جاساندى جەلدەتۋ اپپاراتى ءوندىرىلدى، ونىڭ ىشىندە 164 بىرلىك جونەلتۋگە دايىن، 216 بىرلىك زاۋىتتىق سىناقتاردان وتۋدە. قالعان 200 بىرلىك وسى جىلدىڭ شىلدە ايىنىڭ سوڭىنا دەيىن تاپسىرىلادى. ستاتسيونارلىق اپپاراتتاردى قوسىمشا شىعارۋ ماقساتىندا تۇرىك جانە قىتاي سەرىكتەستەرىمەن ءوندىرىستى يگەرۋ جۇرگىزىلۋدە.

"بارك تەحنولودجي" جاۋاپكەرشىلىگى شەكتەۋلى سەرىكتەستىگى قازاقستاندىق جوعارى تەحنولوگيالىق جوباسى ازىرلەنۋدە (نۇر-سۇلتان ق.)

"وسى جىلدىڭ شىلدە ايىنىڭ سوڭىنا دەيىن كومپانيا ءوز ازىرلەمەلەرىن اياقتايدى جانە اقىسىز نەگىزدە قر دەنساۋلىق ساقتاۋ مينيسترلىگىنە تەستىلەۋ ءۇشىن 20 اپپارات بەرەدى. قالعان 112 بىرلىك وسى جىلدىڭ تامىز-قىركۇيەك ايلارىندا شىعارىلادى"، — دەدى ب. اتامقۇلوۆ.

ايتا كەتۋ كەرەك، "قازمەدتپريبور" جاۋاپكەرشىلىگى شەكتەۋلى سەرىكتەستىگى، "ورالمەدرەگيون" جاۋاپكەرشىلىگى شەكتەۋلى سەرىكتەستىگى وكپەنى جاساندى جەلدەتۋ اپپاراتتارىن شىعارۋعا بارلىق تەحنيكالىق بازاسى بار، ولار قاجەتتى ءونىم شىعارۋعا دايىن.

فارماتسەۆتيكالىق سالاداعى مەملەكەتتىك قولداۋ شارالارىنىڭ ءبىرى — تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە ۇزاق مەرزىمدى شارتتار جاساسۋ.

"سونداي-اق وتاندىق تاۋار وندىرۋشىلەردى قولداۋ ماقساتىندا جەرگىلىكتى اتقارۋشى ورگانداردى وتاندىق كاسىپورىنداردىڭ ونىمدەرىنە باسا نازار اۋدارۋدى سۇرايمىز. بۇل ءبىزدىڭ كاسىپورىندارعا وندىرىستىك قۋاتتاردى ارتتىرۋعا جانە جاڭا وندىرىستەردى ىسكە قوسۋعا سەرپىن بەرەدى"، — دەپ تۇيىندەدى مينيستر.

سوڭعى جاڭالىقتار

ۇقساس جاڭالىقتار