قوعام • 19 ماۋسىم، 2020

سوڭعى 5 اي ىشىندە 49 ينفەكتسيا بويىنشا اۋرۋشاڭدىق تومەندەدى - مينيسترلىك

34 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي تۋرالى دەنساۋلىق ساقتاۋ ءمينيسترىنىڭ مىندەتىن اتقارۋشى ءلاززات اقتاەۆا باياندادى، - دەپ حابارلايدى Egemen.kz.

ل. اقتاەۆا كوروناۆيرۋس ينفەكتسياسىن قوسپاعاندا، ينفەكتسيالىق اۋرۋلار بويىنشا ەپيدەميولوگيالىق جاعداي جالپى قازاقستان رەسپۋبليكاسى بويىنشا تۇراقتى ەكەنىن اتاپ ءوتتى. 

64 ينفەكتسيالىق اۋرۋ بويىنشا مونيتورينگ جۇرگىزىلۋدە، 5 ايدىڭ قورىتىندىسى بويىنشا 49 ينفەكتسيا بويىنشا سىرقاتتانۋشىلىق تومەندەگەن. 

بيىل ادامداردىڭ وبا، تىرىسقاق، ءىش سۇزەگى، قۇتىرۋ، تۋليارەميا، ديفتەريا، سىرەسپە، قىزامىق جانە باسقا دا جۇقپالى اۋرۋلارمەن سىرقاتتانۋى تىركەلگەن جوق. 

وتكەن جىلدىڭ وسىنداي كەزەڭىمەن سالىستىرعاندا سالمونەللەزبەن، قىزىلشامەن، ءىرىڭدى مەنينگيتپەن، سەروزدى مەنينگيتپەن، تۋبەركۋلەزبەن سىرقاتتانۋشىلىقتىڭ تومەندەگەنى بايقالدى.

ا ءجىتى ۆيرۋستىق گەپاتيتپەن (1،8 ەسە)، بوتۋليزممەن (3 ەسە)، سكارلاتينامەن سىرقاتتانۋشىلىقتىڭ 4،3 ەسە ءوسۋى بايقالدى. 

سونىمەن قاتار قازاقستان اۋماعىندا اسا قاۋىپتى ينفەكتسيالار — وبا، تۋليارەميا، گەمورراگيالىق قىزبالار (كقگق، بسگق)، كۇيدىرگى جانە باسقا دا زوونوزدىق ينفەكتسيالاردىڭ بەلسەندى تابيعي وشاقتارى بار.

وبا جانە باسقا دا تابيعي-وشاقتىق ينفەكتسيالاردىڭ الدىن الۋ ماقساتىندا پروفيلاكتيكالىق ءىس-شارالار جۇرگىزىلەدى. وسى جىلدىڭ 5 ايىندا وباعا قارسى كۇرەس ۇيىمدارى زەرتحانالىق زەرتتەي وتىرىپ 223،1 مىڭ شارشى كم-ءدى جانە 4 ملن ەكتوپارازيتتەر مەن كەمىرگىشتەردى تەكسەردى، وبانىڭ 14 قوزدىرعىشى ءبولىندى، بۇل قوزدىرعىشتىڭ تسيركۋلياتسياسىن كورسەتەدى.

وباعا قارسى كۇرەس ستانتسيالارى 21 ەلدى مەكەننىڭ اينالاسىندا قورعانىش ايماعىن قۇردى، كەنتتىك دەراتيزاتسيا، كەنتتىك دەزينسەكتسيا جۇرگىزدى، وباعا قارسى 50 مىڭنان استام ادام ەگىلدى. 

2020 جىلعى 12 ماۋسىمداعى جاعداي بويىنشا كونگو-قىرىم گەمورراگيالىق قىزبا اۋرۋىنىڭ 3 جاعدايى راستالدى، ونىڭ ىشىندە 2 جاعداي تۇركىستان وبلىسى تۇرعىندارىنىڭ اراسىندا جانە جامبىل وبلىسىندا 1 جاعداي تىركەلگەن.

كقگق الدىن الۋ ماقساتىندا سانيتاريالىق-ەپيدەميولوگيالىق قىزمەت كقگق بويىنشا قولايسىز 313 ەلدى مەكەننىڭ اينالاسىندا سانيتاريالىق-قورعانىش ايماعىن قۇردى. 

جەرگىلىكتى اتقارۋشى ورگاندار كقگق بويىنشا قولايسىز ايماقتا كەنەگە قارسى 5،8 باس مالدى، 1001 ەلدى مەكەندە 362 مىڭ مال قوراسىن وڭدەدى، اۋدانى 19،8 ش. كم بۋفەرلىك ايماق قۇردى.

2020 جىلدىڭ 5 ايىندا 1 411 647 ادام ەگىلدى، قر بويىنشا ۆاكتسيناتسيامەن قامتۋ ەگۋگە جاتاتىندار سانىنىڭ 92%-ىن قۇرادى.

"ۆاكتسيناتسيالاۋمەن جەتكىلىكسىز قامتۋ توتەنشە جاعداي كەزىندە جوسپارلى پروفيلاكتيكالىق ەگۋلەر جۇرگىزۋدىڭ توقتاتىلۋىنا بايلانىستى. قازىرگى ۋاقىتتا جوسپارلى ۆاكتسيناتسيا قايتا باستالدى، ونىڭ ىشىندە توتەنشە جاعداي كەزىندە ەكپە الماعان بالالار ەگىلۋدە"، — دەدى ءمينيستردىڭ م. ا.

2020 جىلدىڭ ءى توقسانىندا رەسپۋبليكادا پروفيلاكتيكالىق ەگۋلەردەن 1 423 باس تارتۋ ەسەپكە الىندى، 2019 جىلدىڭ وسىنداي كەزەڭىمەن سالىستىرعاندا 13%-عا وسكەنى بايقالدى. بۇل رەتتە باس تارتقان ادامدار اراسىندا ەگىلگەندەر سانى 725-تەن 309-عا دەيىن 2 ەسە تومەندەدى.

باس تارتۋ سەبەپتەرى بويىنشا ەڭ ۇلكەن ۇلەس سالماق جەكە سەنىم بويىنشا باس تارتۋعا كەلەدى جانە ول جالپى باس تارتۋ سانىنىڭ 52،9%-ىن قۇرايدى، ءدىني پايىمداۋلار بويىنشا – 29%، ۆاكتسيناعا سەنىمسىزدىك – 11،2%، باق-تاعى تەرىس اقپارات بويىنشا – 6،4%. باس تارتقاندار اراسىندا 309 ادام ەگىلدى.

2020 جىلدىڭ 5 ايىندا 2019 جىلدىڭ وسىنداي كەزەڭىمەن سالىستىرعاندا قىزىلشامەن سىرقاتتانۋشىلىقتىڭ 2،8 ەسە تومەندەۋىنە قول جەتكىزىلدى.

"قىزىلشامەن سىرقاتتانۋشىلىقتى تومەندەتۋ ماقساتىندا 9-10 ايلىق بالالارعا قوسىمشا ۆاكتسيناتسيا جۇرگىزىلدى. 260 مىڭنان استام بالا ەگىلدى. بۇل وسى جاس توبىنداعى سىرقاتتانۋشىلىقتى 2،5 ەسە تومەندەتۋگە مۇمكىندىك بەردى. بۇدان باسقا اۋىرعان ەرەسەكتەر اراسىندا 55%-دان استامى 20-29 جاس ارالىعىنداعى توپ ەكەنىن ەسكەرە وتىرىپ، وسى جاس توبىنا قىزىلشاعا قارسى قوسىمشا ۆاكتسيناتسيا جۇرگىزىلدى، 1 759 459 ادام ەگىلدى"، — دەدى ل. اقتاەۆا. 

قازاقستان رەسپۋبليكاسىندا مەنينگيتپەن سىرقاتتانۋشىلىق دەڭگەيىنىڭ تومەندەۋىنىڭ وڭ سەرپىنى بايقالادى.

 قازاقستان رەسپۋبليكاسىندا مەنينگوكوكك ينفەكتسياسىمەن سىرقاتتانۋشىلىقتىڭ ورتاشا كوپ جىلدىق دەڭگەيىنىڭ كورسەتكىشى 100 مىڭ تۇرعىنعا شاققاندا 2،1-ءدى قۇرايدى، بۇل رەتتە قازىرگى ۋاقىتتا قازاقستاندا سىرقاتتانۋشىلىق دەڭگەيى 100 مىڭ تۇرعىنعا شاققاندا 0،15-ءتى قۇرايدى، بۇل شەكتى دەڭگەيدەن 14 ەسە تومەن. سونىمەن بىرگە شىمكەنت قالاسىندا اۋرۋ سانىنىڭ 2-دەن 6 جاعدايعا دەيىن ۇلعايعانى بايقالادى. 

سوڭعى جاڭالىقتار

شيرەك فينالعا ءوتتى

تەننيس • كەشە

ۇقساس جاڭالىقتار