ەلىمىزدەگى ەپيدەميولوگيالىق جاعداي تۋرالى دەنساۋلىق ساقتاۋ ءمينيسترىنىڭ مىندەتىن اتقارۋشى ل. اقتاەۆا, ۆەتەرينارلىق جانە ەپيزووتيالىق احۋال تۋرالى اۋىل شارۋاشىلىعى ءمينيسترى س. وماروۆ, بيولوگيالىق قاۋىپسىزدىك سالاسىنداعى عىلىمي-زەرتتەۋ قىزمەتى تۋرالى ءبىلىم جانە عىلىم ءمينيسترى ا. ايماعامبەتوۆ, جەكە قورعانۋ قۇرالدارىن ءوندىرۋ تۋرالى يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ, وڭىرلەردەگى احۋال تۋرالى اتىراۋ وبلىسىنىڭ اكىمى م. دوسمۇحامبەتوۆ, پاۆلودار وبلىسىنىڭ اكىمى ءا. سقاقوۆ باياندادى.
بيىل وتكەن جىلدىڭ سايكەس كەزەڭىمەن سالىستىرعاندا جۇقپالى اۋرۋلاردىڭ 57 ءتۇرى بويىنشا ناۋقاستانۋ دەڭگەيى تومەندەدى, ونىڭ ىشىندە مەنينگيتپەن اۋىرۋ 3,5 ەسە, قىزىلشامەن سىرقاتتانۋ 2,8 ەسە, سالمونەللەزبەن اۋىرۋ 2,1 ەسە تومەندەدى. بەس ايدىڭ ىشىندە 1,4 ملن ادامعا جۇقپالى اۋرۋلارعا قارسى پروفيلاكتيكالىق ەكپە جاسالدى, بۇل ەگىلۋگە ءتيىس ادامداردىڭ 92%-ىن قۇرايدى.
ال كوروناۆيرۋس ينفەكتسياسىنا قاتىستى جاعداي كۇردەلى دەڭگەيدە قالىپ وتىر. سوڭعى ەكى اپتادا بارلىق دەرلىك وڭىردە ناۋقاستار سانى كوبەيدى. مۇنىڭ نەگىزگى سەبەبى — ادامداردىڭ سانيتارلىق تالاپتاردى ورىنداماۋى مەن باقىلاۋدىڭ ناشارلىعى.
ۇكىمەت باسشىسى مەملەكەت باسشىسىنىڭ تاپسىرماسى بويىنشا ۆەدومستۆوارالىق كوميسسيانىڭ شەشىمىمەن الداعى دەمالىس كۇندەرى بىرقاتار ءىرى قالالار مەن تۇرعىندارىنىڭ سانى 50 مىڭنان اساتىن بارلىق وڭىرلەردىڭ ەلدى مەكەندەردە قوسىمشا شەكتەۋ شارالارى ەنگىزىلدى.
"بۇل شەشىم جەرگىلىكتى جەرلەردە ناقتى ورىندالۋى ءتيىس. اكىمدىكتەر سانيتارلىق نورمالار مەن قوعامدىق ورىنداردا الەۋمەتتىك اراقاشىقتىقتىڭ قاتاڭ ساقتالۋىنا ەرەكشە نازار اۋدارۋى ءتيىس. دەنساۋلىق ساقتاۋ مينيسترلىگىنە وڭىرلەردىڭ اكىمدىكتەرىمەن بىرلەسىپ, كوروناۆيرۋس ينفەكتسياسىنىڭ تارالۋىنا قارسى كۇرەس بويىنشا جاڭا شارالار كەشەنىن دايىنداۋدى تاپسىرامىن. ءاربىر وڭىردەگى جاعدايدى ەسكەرە وتىرىپ, ىسكە اسىرىلىپ جاتقان شارالاردى تۇزەتۋ بويىنشا جەدەل شارالار قابىلدانسىن", — دەدى ا. مامين.
پرەمەر-مينيستر جەكە قورعانۋ قۇرالدارىنىڭ وتاندىق ءوندىرىسىن ۇلعايتۋ جانە ولاردىڭ حالىق ءۇشىن قولجەتىمدى بولۋىن قامتاماسىز ەتۋ شارالارىن قابىلداۋدى, جاساندى تىنىس الۋ اپپاراتتارى مەن جەكە قورعانىش قۇرالدارىنىڭ جەتكىلىكتى قورىن قالىپتاستىرۋدى, ولاردىڭ مەملەكەتتىك ماتەريالدىق رەزەرۆتە بولۋىن قامتاماسىز ەتۋدى تاپسىردى.
اكىمدىكتەرگە ءىرى كاسىپورىنداردىڭ ءوز جۇمىسكەرلەرىن جەكە قورعانىش قۇرالدارىمەن قامتاماسىز ەتۋ ماسەلەسىن پىسىقتاۋ, اۋىل شارۋاشىلىعى مينيسترلىگىنە ءارتۇرلى ينفەكتسيالاردىڭ تارالۋىنا جول بەرمەۋ ءۇشىن پروفيلاكتيكالىق سانيتارلىق-ۆەتەرينارلىق ءىس-شارالاردىڭ ورىندالۋىن قاتاڭ باقىلاۋ تاپسىرىلدى.
ۇكىمەت باسشىسى حالىقتى جىل سايىنعى يممۋنيزاتسيالاۋ جوسپارىن ورىنداۋدى جانە كوروناۆيرۋس ينفەكتسياسىنا قاتىستى قازىرگى جاعدايدى ەسكەرە وتىرىپ, ءىس-قيمىل الگوريتمىن جانداندىرۋدى تاپسىردى.
