– وسى ۋاقىتقا دەيىن «نە ءۇشىن دارىگەر بولدىم؟» دەگەن ساۋالعا باس قاتىرىپ كورمەپپىن. بارلىق ارىپتەستەرىم سولاي ويلايتىن شىعار. ويتكەنى مەديتسينالىق ءبىلىم الۋعا نيەت ەتىپ, وقۋعا قۇجات تاپسىرعان كەزدە ءبىز ءوزىمىزدىڭ تاڭداۋىمىزدى جاساپ قويدىق قوي. ماسەلەن, دارىگەر بولۋ ءۇشىن باسقا ماماندىق يەسىنە قاراعاندا ۇزاق جىل وقۋعا تۋرا كەلەدى. ءبىزدىڭ قاتارلاستارىمىز ديپلوم الىپ, ەڭبەككە ارالاسىپ, ەلەۋلى بولىپ جاتقاندا ءبىز جاس مامان بولىپ ەندى عانا ينستيتۋت ءبىتىرىپ شىقتىق. جالپى, ادامنىڭ جىگەرى مەن قۇلشىنىسىن العا جەتەلەپ وتىراتىن ونىڭ بولاشاقتاعى جوسپارى بولسا كەرەك. ياعني ادام ءوز جولىن دۇرىس تاڭداۋ ارقىلى سۇيىكتى ماماندىعىن مەڭگەرىپ, ونىڭ جەمىسىن ادامدارعا ۇسىنۋى ءتيىس. مەنىڭشە, «نە ءۇشىن دارىگەر بولدىم؟» دەگەن ساۋالدىڭ جاۋابى وسىندا جاتقان سياقتى, – دەيدى ەڭبەكشىقازاق اۋداندىق اۋرۋحاناسى جۇقپالى اۋرۋلار ءبولىمىنىڭ دارىگەرى اسەم وماروۆا.
ايتپاقشى, بۇل اۋدان – جۇقپالى ىندەت وشاعىنا اينالعان ايماقتىڭ ءبىرى. قازىر دەرتتىڭ اسقىنۋى مەن تارالۋى ازداپ سەيىلگەنىمەن, قاۋىپ دەڭگەيى ءالى دە جوعارى. اۋرۋحانادا كوروناۆيرۋسپەن كۇرەس كەزەڭىندە ءۇش ساتىلى ستاتسيونارلىق ورتالىق ۇيىمداستىرىلعان. اۋرۋحاناداعى كارانتين ستاتسيونارى 13 ناۋرىزدان باستاپ اشىلىپ, قازىرگە دەيىن ەكى جۇزگە جۋىق پاتسيەنت قابىلداعان. ەم العان 100 ناۋقاس تولىقتاي وڭالىپ, ۇيلەرىنە بارۋعا رۇقسات الىپتى. ال پروۆيزورلىق ستاتسيونار توتەنشە جاعداي جاريالانعان العاشقى كۇننەن باستاپ قىزمەتكە كىرىسكەن. وسى ارالىقتا پروۆيزورلىق باقىلاۋعا جالپى 86 پاتسيەنت الىنسا, ونىڭ سەكسەنى تولىق ەمدەۋ كەزەڭىنەن ءوتىپ, دەرتتەن ايىققان ەكەن. سونداي-اق اۋرۋحاناداعى ينفەكتسيالىق ستاتسيونار دا 29 ناۋرىزدان باستاپ كوروناۆيرۋسقا شالدىققان پاتسيەنتتەردى قابىلداي باستادى. مۇندا 84 پاتسيەنت جاتىپ, جازىلىپ شىققان.
– جۇمىس قانشالىقتى قيىنداعانىمەن, قاباق شىتۋعا قاقىمىز جوق. قولىمىزدان كەلگەنىنشە ناۋقاستاردى بار كۇش-جىگەرىمىزدى سالىپ ەمدەپ, جۇقپالى دەرتتەن ايىعۋعا ۇلەس قوستىق. جاقىندا اۋرۋحانا جانىنان پتر زەرتحاناسى اشىلدى. بۇل ءبىزدىڭ جۇمىسىمىزدى جەڭىلدەتتى. ناۋقاستار ءۇشىن دەر كەزىندە ءتيىستى ەم قابىلداۋعا مۇمكىندىك بەردى. ويتكەنى پوليمەرلى تىزبەكتى رەاكتسيا تالداۋى ارقىلى ادام بويىندا كوروناۆيرۋس ينفەكتسياسىنىڭ بار-جوعىن جىلدام ءارى ناقتى انىقتاۋعا بولادى. ياعني زەرتحانا جۇمىسى مولەكۋليارلى بيولوگيا تاسىلىمەن ءجۇرىپ, فەرمەنتتەردىڭ كومەگىمەن جۇقپالى ىندەتتىڭ ءىزىن ەرتە تاۋىپ, ەمدەي الامىز, – دەيدى ينفەكسيونيست-دارىگەر اسەم بيحاسىمقىزى.
الماتى وبلىسى
