ءىس-شارانىڭ ماقساتى COVID-19 پاندەمياسىنان تۋىنداعان جاعدايدى تۇراقتاندىرۋ جونىندە ۇكىمەتتەر قابىلداعان شارالار شەڭبەرىندە ميگرانتتارعا كومەك كورسەتۋدە تاجىريبە الماسۋ بولدى.
ونلاين ءىس-شارانى اشۋ راسىمىندە كوشى-قون جونىندەگى حالىقارالىق ۇيىمنىڭ باس ديرەكتورى انتونيو ۆيتورينو بۇل ماسەلەنىڭ كوروناۆيرۋسپەن جاھاندىق كۇرەس اياسىنداعى ماڭىزدىلىعىن اتاپ ءوتتى. ول پاندەميا جاعدايىندا بۇكىل الەم بويىنشا ادامداردىڭ موبيلدىلىك دەڭگەيى كۇرت تومەندەگەنى تۋرالى ايتتى. ودان ءارى نيگەريا, فرانتسيا, قازاقستان, زيمبابۆە جانە ەگيپەت وكىلدەرى ءسوز سويلەدى.
جەنەۆاداعى قر-دىڭ بۇۇ جانە باسقا دا حالىقارالىق ۇيىمدار جانىنداعى تۇراقتى وكىلى جانار ايتجانوۆا ءوز سوزىندە قازاقستاننىڭ ميگرانتتاردى قولداۋعا, ونىڭ ىشىندە توتەنشە جاعداي مەن كارانتين كەزىندە شەتەلدىكتەردىڭ بولۋ ەرەجەلەرىن ازىرلەۋگە, ميگرانتتار ءۇشىن ۆيزالار مەرزىمىن ۇزارتۋعا, ولارعا گۋمانيتارلىق كومەك كورسەتۋگە, سونداي-اق 500 قىرعىز جانە جۇزدەگەن وزبەكستان ازاماتتارىنا مەملەكەتتىك شەكارا ارقىلى وتكىزۋدى قامتاماسىز ەتۋگە قابىلداعان بىرقاتار شارالارىن اتاپ ءوتتى.
قازاقستاندىق ديپلومات ەلىمىزدىڭ سىرتقى ىستەر مينيسترلىگى وزبەكستان جانە تاجىكستانداعى ارىپتەستەرىمەن 243 ميگرانتقا ترانزيتتىك ءدالىز ۇسىنۋ ماسەلەسىندە ءوزارا تابىستى ءىس-قيمىلىن اتاپ ءوتتى.
ءسوز سوڭىندا ج.ايتجانوۆا قازاقستان ميگرانتتارعا الەمدە قالىپتاسقان كۇردەلى ەپيدەميولوگيالىق جاعدايدا كومەك كورسەتۋدى جالعاستىرادى دەپ مالىمدەدى.
