ايماقتار • 18 ماۋسىم، 2020

قاراعاندى وبلىسىنىڭ باس دارىگەرى: ۇيگە جۇگىرمەڭىز، دارىگەرگە جۇگىنىڭىز

440 رەت كورسەتىلدى

كوروناۆيرۋس ينفەكتسياسىنىڭ العاشقى بەلگىلەرى بايقالعان كەزدە، ماسەلەن دەنەنىڭ ىستىعى كوتەرىلىپ، جوتەل پايدا بولىپ نەمەسە ءدام ايىرۋ سەزىمى  باسەڭدەي باستاعان جاعدايدا ۇيگە تىعىلۋدىڭ ەش قاجەتى جوق. سەبەبى، بىردەن دارىگەردىڭ كومەگىنە جۇگىنبەي، ءوز بەتىنشە ەمدەلۋ – زاردابى اۋىر بولاتىن اسقىنۋلارعا اكەلىپ سوعۋى ابدەن مۇمكىن. بۇل تۋرالى  قاراعاندى وبلىستىق  دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆ ونلاين-بريفينگتە ايتىپ بەردى، – دەپ حابارلايدى Egemen.kz.

قاراعاندى وبلىسىنداعى بۇگىنگى جاعداي مىناداي: "جامان تۇماۋ" جۇقتىرعان بەس ادام ءوز بەتىنشە دەم الا المايدى، سول سەبەپتى ولار  وكپەنى جاساندى جەلدەتۋ ء(وجج)  اپپاراتتارىنا قوسىلعان. مىنە، وسى پاتسيەنتتەردىڭ ۇشەۋى دەر كەزىندە مەديتسينالىق كومەككە جۇگىنبەي، اۋرۋىن اسقىندىرىپ العان ەكەن.

"بۇل ناۋقاستار ۇيدە ەمدەلمەكشى بولعان. قازىر ولار دارىگەرلەردىڭ تاۋلىك بويى قاداعالاۋىندا جان ساقتاۋ بولىمىندە اۋىر كۇيدە جاتىر. بارلىق تۇرعىنداردى مەديكتەردىڭ ۇندەۋىنە نەمقۇرايدى قاراماۋعا شاقىرامىن. بۇل وتە ماڭىزدى ەكەنىن ەستە ۇستاۋ كەرەك. جەدەل جاردەم شاقىرۋدان قورىقپاعان ءجون، كەرىسىنشە دەرت سالدارىنان قورقۋ كەرەك"، – دەپ ەسكەرتتى ەرجان نۇرلىباەۆ.

وبلىستا بۇعان دەيىن ءوجج اپپاراتىنىڭ 28 داناسى بولىپتى. قازىرگى ۋاقىتتا بۇعان قوسىمشا 44 اپپارات ساتىپ الىنعان، ونىڭ 22-ءسى بۇگىنگى كۇندە وڭىرگە جەتكىزىلگەن.

باسقارما باسشىسى وبلىستا كۆي جۇقتىرعان ناۋقاستارعا كومەك كورسەتۋ ءۇشىن رەسۋرس پەن جابدىقتىڭ جەتكىلىكتى ەكەنىن ايتادى. مىسالى، قازىرگى ۋاقىتتا كوروناۆيرۋسپەن اۋىراتىن ناۋقاستاردى ەمدەۋ ءۇشىن توسەك ورنىنىڭ سانىن  كوبەيتۋ قولعا الىنعان. كەشەگى كۇننىڭ وزىندە اۋرۋحانالاردىڭ ءبىرىنىڭ بازاسىندا ينفەكتسيالىق باعىتتاعى قوسىمشا 100 توسەكتىك ورىن اشىلىپتى.

"كەلەسى اپتانىڭ باسىندا تاعى قوسىمشا توسەكتەر قويىلادى. قاراعاندىدا قازىر 647 توسەك ورنىنىڭ 66-سى بوس تۇر. كۇنىنە ءبىز شامامەن العاندا، كۆي نىشانى بار 50 ادامدى اۋرۋحاناعا جاتقىزامىز. جاعداي تولىق باقىلاۋدا، الدىن الۋ شارالارى قابىلدانعان. ءبىزدىڭ مىندەتىمىز – بارلىعىن دەر كەزىندە مەديتسينالىق كومەكپەن قامتاماسىز ەتۋ"، – دەيدى ەرجان نۇرلىباەۆ.

ءبىر قۋانارلىعى، وبلىستا كۆي ىندەتىن انىقتايتىن زەرتحانالار سانى ارتىپ كەلەدى ەكەن. وتكەن اپتادا وسىنداي ورتالىق جەزقازعان قالاسىندا اشىلعان. وسى ايدا مامانداندىرىلعان زەرتحانا تەمىرتاۋدا، ال تامىز ايىندا بالقاش قالاسىندا جۇمىس ىستەي باستايدى. مۇنداي جاعداي شىلدە ايىنىڭ وزىندە  زەرتتەۋلەر سانىن تاۋلىگىنە ءتورت مىڭعا دەيىن ارتتىرۋعا مۇمكىندىك بەرەتىن كورىنەدى.

وبلىستا سانيتارلىق-ەپيدەميولوگيالىق جاعدايعا بايلانىستى  ستاتسيونارلار جوسپارلى ەمدەۋگە جاتقىزۋدى ءىشىنارا توقتاتىپتى. وڭالتۋ ورتالىقتارى ينفاركت، ينسۋلت اۋرۋلارىن جانە جاراقاتتان كەيىن كومەك الۋشىلارعا قىزمەت كورسەتۋ ءۇشىن جۇمىسىن جالعاستىرا بەرەدى. ال ەمحانالاردا ۋاقىتشا سكرينينگ جانە ديسپانسەرلەۋ جۇرگىزىلمەيتىن بولعان. ەمحانالارعا كەلەتىن ادام سانىن ازايتۋ ماقساتىندا قاۋىپ توبىنداعى پاتسيەنتتەر ءۇشىن ءدارى-دارمەكتەر ۇيلەرىنە جەتكىزىلىپ بەرىلەدى.

ونلاين-بريفينگتىڭ سوڭىندا وبلىستىڭ باس دارىگەرى ەرجان نۇرلىباەۆ تۇرعىنداردى سانيتارلىق تالاپتاردى ساقتاۋعا،  ءوزىنىڭ جانە جاقىندارىنىڭ دەنساۋلىعىنا جاناشىرلىقپەن قاراۋعا شاقىردى.

سوڭعى جاڭالىقتار

29 قازاندا سەنات وتىرىسى وتەدى

پارلامەنت • بۇگىن، 17:57

ەلورداعا قارجى قۇيۋعا نيەتتى

ەلوردا • بۇگىن، 16:50

29-31 قازان كۇندەرى كۇن جىلىنادى

اۋا رايى • بۇگىن، 12:40

ۇقساس جاڭالىقتار