ايماقتار • 17 ماۋسىم، 2020

دەنساۋلىققا كوڭىل ءبولۋ - حالىق مۇقتاجىن اقتاۋ

12 رەت كورسەتىلدى

بۇگىن سولتۇستىك قازاقستاننىڭ وبلىستىق اۋرۋحاناسىندا جاڭادان ساتىپ الىنعان جوعارى ساپالى، اسا قىمبات ماگنيتتى-رەزونانستى توموگراف (مرت) اپپاراتى ىسكە قوسىلدى، - دەپ جازادى Egemen.kz

ونىڭ قويىلىپ، جۇمىسقا قوسىلعان شاعىن سالتاناتىنا وبلىس اكىمى قۇمار اقساقالوۆ تا قاتىستى. ءوزىنىڭ ينستاگرامداعى پاراقشاسىنا ول: "ەندى دارىگەرلەر وسى زامانعى جەتىلدىرىلگەن مرت-نى پايدالانىپ، ساپالى دياگنوستيكالار جاسايتىن بولدى. جىلدىڭ اياعىنا دەيىن ونكوكولوگيالىق ديسپانسەرگە دە وسىنداي اپپاراتتىڭ ءۇشىنشىسىن قوياتىن بولامىز. بۇلار كەزەككە تۇرۋ مەرزىمىن ازايتاتىن بولادى"، دەپ جازدى.

سولتۇستىك قازاقستان وبلىسىندا مەدتەحنيكالار ساتىپ الۋعا 2018 جىلى 636 ملن، ال 2019 جىلى بۇل سوما 3 ەسە كوبەيىپ - 2،8 ملرد تەڭگەگە جەتكەن ەدى. سونىڭ وزىندە مرت-عا كەزەككە تۇرعان ادامداردى كورىپ، اكىم بۇل ماسەلەنى شۇعىل شەشۋگە كىرىسەتىنىن ايتقان. سول ءسوز جەردە قالماي بيىلعى جىلى، قازىردىڭ وزىندە 2،4 ملرد تەڭگەگە تەحنيكالار ساتىپ الىندى. مىنا ساپالى مەدتەحنيكا سونىڭ ءبىرى. جىلدىڭ اياعىنا دەيىن بيىل تاعى ەكى مرت، كت، انگيوگراف پەن مامموگراف، ۋلترادىبىستىق زەرتتەۋ جانە جوعارى ساپالى رەنتگەن اپپاراتتارى ساتىپ الىنباقشى.  

وبلىستا مەديتسينالىق كادرلار ماسەلەسى دە وڭ شەشىمىن تاۋىپ كەلەدى. ەگەر 2018 جىلى جاڭادان 56 دارىگەر قابىلدانعان بولسا، بىلتىر ولاردىڭ سانى ەكى ەسە ءوسىپ، 108 مامانعا جەتكەن. ال بيىلعى جىلدىڭ قورىتىندىسى بويىنشا جاڭادان قابىلداناتىن دارىگەرلەر سانى 120 جاس مامانعا جەتەدى دەپ بولجانىپ وتىر. ونىڭ ۇستىنە بيىل دەنساۋلىق ساقتاۋ سالاسىنىڭ 32 نىسانى جوندەۋدەن وتكىزىلەدى. قالىنىڭ "بەرەكە" ىقشام اۋدانىندا كوپبەيىندى جاڭا اۋرۋحانانىڭ دا قۇرىلىسى باستالدى.

 

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار