قوعام • 16 ماۋسىم، 2020

ۆاكتسينا شىعاراتىن زاۋىت سالىنادى

43 رەت كورسەتىلدى

جامبىل وبلىسىنا جۇمىس ساپارى اياسىندا پرەمەر-مينيستر اسقار مامين تاراز قالاسىندا، جامبىل جانە بايزاق اۋداندارىندا، سونداي-اق قورداي اۋدانىنىڭ ماسانچي، قاراكەمەر، سورتوبە جانە قورداي اۋىلدارىندا بولىپ، ءوڭىردى دامىتۋدىڭ مەملەكەتتىك باعدارلامالارىنىڭ ىسكە اسىرىلۋ بارىسىمەن تانىستى.

ۇكىمەت باسشىسى قورداي اۋدانىنىڭ گۆاردەي­سكي كەنتىندە بيولوگيالىق قاۋىپسىز­دىك ماسەلەلەرى عىلىمي-زەرتتەۋ ينستيتۋ­تىنىڭ جانىنداعى ۆاكتسينا شىعاراتىن بيوفارماتسەۆتيكالىق زاۋىتتىڭ قۇرىلىسىن باستاپ بەردى. اتالعان زاۋىت ءتيىستى وندىرىستىك تاجىريبەنىڭ حالىقارالىق ستاندارتى بويىن­شا يممۋنوبيولوگيالىق ءدارى-دارمەك­تەر، ونىڭ ىشىندە كوروناۆيرۋس ينفەكتسياسى­نا قارسى ۆاكتسينا شىعارماق. قازىر ينستي­تۋت­تىڭ كوروناۆيرۋس ىندەتىنە قارسى كان­دي­داتتىق ۆاكتسيناسى ددۇ تىزىمىنە ەن­گى­زىل­گەن جانە كلينيكاعا دەيىنگى سىناقتان ءساتتى وتۋدە. سونداي-اق كاسىپورىندا پاندە­ميالىق تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە، كۇيىس قايىراتىن ۇساق جانۋارلار وباسىنا، قوي مەن ەشكىنىڭ كونتاگيوزدى ەكتيماسىنا، قوي شەشەگىنە، قۇتىرماعا جانە باسقا دا جۇقپالى اۋرۋلارعا قارسى ۆاكتسينالار شى­عارىلادى. قۇرىلىس جۇمىستارىن بيىل  جەل­توقسان ايىندا اياقتاۋ جانە جىل سايىن بيوفارماتسەۆتيكالىق پرەپاراتتاردىڭ 60 ملن دوزاسىنا دەيىن ءوندىرۋ كوزدەلگەن.

قازىرگى ۋاقىتتا عىلىمي-زەرتتەۋ ينستيتۋ­تى 5 زەرتحانا بازاسىندا وتاندىق ۆاكتسينا­لاردىڭ 67 ءتۇرىن وندىرگەن. ونىڭ ىشىندە دەنساۋلىق ساقتاۋ سالاسى ءۇشىن جوعارى پاتوگەندى قۇس تۇماۋىنا جانە جوعارى پاتوگەندى شوشقا تۇماۋىنا، سونداي-اق اۋىل شارۋاشىلىعى سالاسى ءۇشىن قۇس تۇماۋىنا جانە برۋتسەللەزگە قارسى جاڭا ۆەكتورلىق ۆاكتسينا بار. بيىل اۋسىل اۋرۋىنا قارسى ۆاكتسينا جانە 4 كوروناۆيرۋس ينفەكتسياسىنا قارسى ۆاكتسينا ازىرلەنۋدە. سونىمەن قاتار اتالعان ينستيتۋت شەتەلگە ۆاكتسينالار جەتكىزۋشى رەتىندە كەدەن وداعىنىڭ تىزىمىنە ەنگىزىلگەن. يسلام ىنتىماقتاستىعى ۇيىمىنا مۇشە مەملەكەتتەردىڭ ۆاكتسينالاردى وندىرۋشىلەر توبىنا كىرەدى.

جالپى، 2020 جىلدىڭ 5 ايىندا جامبىل وبلىسىنىڭ ەكونوميكاسى تۇراقتى ءوسىم كورسەتتى. وڭىردە «نۇرلى جەر»، «نۇرلى جول»، يدمب، «قاراپايىم زاتتار ەكونوميكاسى»، «جۇمىسپەن قامتۋدىڭ جول كارتاسى-2020» جانە باسقا دا دامۋ باعدارلامالارى بەلسەندى تۇردە جۇزەگە اسىرىلۋدا. ەكونوميكانىڭ بارلىق دەرلىك سەگمەنتىندە وڭ قارقىن بايقالادى – وتكەن جىلدىڭ ءتيىستى كەزەڭىمەن سالىستىرعاندا اۋىل شارۋاشىلىعى جانە مال شارۋاشىلىعى 2،9%-عا، نەگىزگى كاپيتالعا سالىنعان ينۆەستيتسيالار 2،6%-عا، قۇرىلىس كولەمى 8،7%-عا ءوستى.

بيىل جامبىل وبلىسىندا 550 مىڭ شارشى مەترگە جۋىق تۇرعىن ءۇي پايدالانۋعا بەرىلەدى، 34 سۋمەن جابدىقتاۋ نىسانىن پايدالانۋعا بەرۋ جوسپارلانعان. جەرگىلىكتى ماڭىزى بار اۆتوجولداردى جوندەۋ بويىنشا 23 جوبا ىسكە اسىرىلۋدا، ونىڭ ىشىندە «تاراز قالاسىنان قىرعىزستان شەكاراسىنا دەيىنگى وڭتۇستىك اينالما جول» اۆتوجولىن سالۋ»، «تاراز – سارىكەمەر – تۇيمەكەنت – اقشولاق» وبلىستىق ماڭىزى بار اۆتوموبيل جولىن رەكونسترۋكتسيالاۋ»، «تاراز – جەتىباي – تەگىستىك – ويىق» اۆتوموبيل جولىن رەكونسترۋكتسيالاۋ» جوبالارى بار. وڭىردە جالپى سوماسى 1051،6 ملرد تەڭگەگە 24 ينۆەستيتسيالىق جوبا جۇزە­گە اسىرىلىپ جاتىر. «قاراپايىم زات­تار ەكونوميكاسى» باعدارلاماسى بويىن­شا 68،6 ملرد تەڭگەگە 114 جوبا ماقۇلدان­دى، ونىڭ ىشىندە 2،2 ملرد تەڭگەگە 89 جوبا قارجى­لاندى­رىلدى. وسى جىلدىڭ 1 ماۋسىمىنداعى جاعداي بويىنشا جۇمىسپەن 17 مىڭ ادام قام­تىلدى. «جۇمىسپەن قامتۋدىڭ جول كارتا­سى» باعدارلاماسى اياسىندا 831 ينفراقۇ­رىلىمدىق جوبا جۇزەگە اسىرىلۋدا.

مەملەكەت باسشىسىنىڭ تاپسىرماسى بويىنشا جامبىل وبلىسىندا اۋىلدا كووپەراتسيالىق تىزبەكتى دامىتۋ جونىندەگى «الاڭنان سورەگە دەيىن»  جوباسى جۇزەگە اسىرىلىپ جاتىر. ول اۋىل شارۋاشىلىعى ونىمدەرىنىڭ يمپورتىن قىسقارتۋعا، باعانى تۇراقتاندىرۋعا جانە وتاندىق وندىرۋشىلەردى قولداۋعا باعىتتالعان. ازىق-ت ۇلىك تاۋارلارىن تۇراقتى ساتىپ الۋدى قامتاماسىز ەتۋگە 50 ساۋدا ورنى مەن كوتەرمە-تاراتۋ ورتالىعى، سونداي-اق 21 وڭدەۋ كاسىپورنى، 45 شارۋا قوجالىعى مەن 10 كووپەراتيۆ قاتىسادى. وسى جىلدىڭ سوڭىنا دەيىن قاراكەمەر، اۋقاتتى، بۇلار باتىر، سورتوبە، ماسانچي، قاراسۋ، وتەگەن سىندى 7 اۋىل گازداندىرىلادى.

«نۇرلى جەر» مەملەكەتتىك باعدارلاماسى اياسىنداعى قىرعىزستانمەن شەكاراداعى «قورداي» شەكارا وتكەلىن رەكونسترۋكتسيا­لاۋ جۇمىسى جولاۋشىلار اعىنىن 4 ەسەگە، ال اۆتوكولىكتىڭ مەملەكەتتىك شەكارا ارقىلى وتكىزۋ قابىلەتىن 2،5 ەسەگە ارت­تىرۋعا مۇمكىندىك بەرەدى. قۇرىلىس جۇمىس­تارىن بيىل جەلتوقسان ايىندا اياقتاۋ كوزدەل­گەن.

 

جامبىل وبلىسى

 

سوڭعى جاڭالىقتار

ۇقساس جاڭالىقتار